2 She imwe mumanyile ukuti ndinganio vuli zye twavapiye imwe ukujendela mwa Mwene uYesu. 3 She uku kwanza kwa Mulungu, ukuzelupa kwinyu, ukuti imwe mwepushe ku luvembu,
4 ukuti wonti uwimwe amanye she angawusunjilila umuvili wakwe muvufinjile na mumushinzi,
5 tekuva nishinyoto muphapilo (ngati vakunzi ve vatamumanyile uMulungu).
6 Kutavanje nawumo umuntu uwakushizania nukumunanjila uwamwavo munongwa zinizi. She uMwene we mulanduzi muvyonti ivintu vinivi, inza she twatalisile twavasoha imwe havili twasimishizizye. 7 Pakuti uMulungu atahatwita iswe ukuva muvuhandamanu, nkandi ku vufinjile.
8 Pelelo, wula we akushihana ishi atakuhana vantu, nkandi uMulungu, we akupa uMupepo wakwe uMufinjile kwimwe. 9 Ukuyanana nishikunzi shapavwanamuntu, izi zitahondeye ukuti wumo avasimbilaje imwe, she imwe mweka avasambilizizye uMulungu ukukundana woka nuwamwavo.
10 Mwemumwo, muvombaje ishi kuvonti avamwinyu ve vali mwonti mu Makedoniya. Loli iswe tukuvagomya imwe, vamwitu, ukuvomba ishi nukushila.
11 Iswe havili tukuvagomya imwe ukuti muve mwe va phumaje muhatendamile, kila muntu asajilile imbombo yakwe, havili muvombe ninyove zinyu, inza she twavahomeshezizye imwe,
12 ukuti imwe mujendaje ahinza pantanzi pa vakunzi havili mutasovelwaje nashimo. 13 Iswe tutakwanza ukuti mutazimanyaje, vamwitu, izya vala ve vasyupiliye, ukuti imwe mutasulumanyaje ngati vanji, ve vatali nulusuvilo.
14 Pe inga iswe tukwitiha ukuti uYesu ahafwa nu kuzyuha havili, inza vunuvwo uMulungu alivaleta poka nu Yesu vala ve vasyupiliye mwa wuyo.
15 Pishi iswe tukuyanga kwimwe kujendela mwizwi lya Mwene, ukuti iswe twevapuma, twe tusyaye pakwinza kwa Mwene, nalyoli lyoli tutalivaleshelela vala ve vasyupiliye. 16 Pakuti uMwene umwenesho aliyiha kufuma kumwanya. Uwene aliyinza nukuholela, poka nizwi lya havizya umupiti, havili poka ninsaji ya Mulungu, pe ve vafwiliye mwa Chilisiti valitalishila ukuzyuha.
17 Pe iswe twe twevapuma, twe tusyaye, twenti poka navo tulinyatulwa kwinjila mwivingo ukuhomana nu Mwene muphepo. Pe vwevulo iswe tuliva shima poka nu Mwene.
18 Pelelo, musuvizanie woka nuwamwavo poka namazwi ganaga.