2 She nimwe mwevenesho mumanyile ahinza sana ukuti isiku lya Mwene akwinza ngati mwiva mukasi muvusiku.
3 Ilelo lye vakuti, "Kuli umutende nu vwihalo," pe umwakwivushizya ulunanjiho lukwinza pa vavo. Vuliva ngati vuvavu vwa mpapo kumwantanda uwa pa vumwamu. Patalivapo apakutoloshela. 4 Nkandi imwe, vamwitu, mutali mushisi ukuti isiku ilyo lihavagandushizye imwe ngati mwiva.
5 Pakuti imwe mwenti mwe vana va vuzelu havili mwe vana vamusanya . Te twe vana va vusiku pamu avashisi.
6 Ishi lelo, iswe tutasyupilaje inza she ve vasyaye vakuvomba. Loli, iswe tudamulile havili tuyisunde.
7 She vala ve vakusyupila vakuvomba vunuvwo pa vusiku, havili vala ve vakuholwa vakuvomba vunuvwo pa vusiku. 8 Loli pakuti iswe twe va kuvuzelu, tuhondeye tuyisunde havili tuzwalwe ulwitiho nishikunzi ngati shijela sha kuziga ishifuva, havili ulusuvilo lwa vuposhi kuva shakuzwala shitu ishakwitwe.
9 Pakuti uMulungu atahatuseva iswe kuvuhalazu, loli ukukava uvuposhi ukujendela mwa Mwene witu uYesu Chilisiti,
10 we ahatufwila iswe ukuti, nape tungadamuha pamu tungasyupila, tuhatendame poka nawo.
11 Pelelo musuvazanie woka nuwamwavo havili muzengane uno nuwamwavo, inza she mukuvomba hali. 12 Iswe tukuvalambilizya imwe, vamwitu, ukuti muvitihaje vala ve vakuvomba pakasi pinyu havili vakuvalongozya imwe mwa Mwene na ve vakuvalingania imwe,
13 havili muvashindihaje nkani venevo nukuvakunda mulandu wa mbombo zyavo. Muve numutende pakasi pinyu.
14 Iswe tukuvagomya imwe, vamwitu: Muvasoshe vala ve vahata, muvagomye vala ve vasilikitililwe, muvavwe avayeyevazu, havili muve mwevakuteshelela ku pavonti. 15 Mwenye ukuti patahave nawumo uwakupyanizya uvuvivi pa vuvivi kuwamwavo. Loli tuvombelane she shinza kuwoka nuwamwavo na kuvonti.
16 Museshelaje shima.
17 Muputaje shisita kuleha.
18 Musalifyaje muvyonti. She uku kwe kwanza kwa Mulungu mwa Chilisiti uYesu kwimwe. 19 Mutamuzimyaje uMupepo.
20 Mutahavupepusyaje uvukuvwi.
21 Muvipime vyonti ivintu. Mukakatile she shinza.
22 Mutantame kuhavele honti ahavutalamalandu. 23 UMulungu wa mutende amalizyaje ukuvazelufya imwe. UMupepo winyu wonti, umwoyo, nu muvili wuyisunjilile ukusita kulongwa nashimo pa kwinza kwa Mwene witu uYesu Chilisiti.
24 Musuvalilwa wula we akuvita imwe, wula we havili alishivomba. 25 Vamwitu, mutuputile niswe vwelele.
26 Mulamushe vonti avamwitu nulufipo ulufinjile.
27 Ine nkuvalajila imwe mwe mwa Mwene ukuti muve nu kalata uno muvelenje kuvonti avamwitu.
28 Uvwila vwa Mwene witu uYesu Chilisiti vuvanje poka nimwe.