¹ Pelelo, lwe iswe tupositwe ukujimbilila, tuhasiva ukuti shamile ahinza ukusyala tweka mu Ateni.

² Tuhamutuma uTimoti, uwamwitu havili umuvomvi uwamwitu mwa Mulungu mwipangwi ilyinza ilya Chilisiti, ukuvagomya nukuvasuvazya imwe kulandatana nu lusuvilo lwinyu, F23

³ ukuti nawumo atayinganaje namayimba ganaga. She nimwe mwenemwe mumanyile ukuti pashinishi iswe tuhasevwa. ⁴ Nalyoli, lye iswe tulipoka nimwe, tuhavavuzizya nzila ukuti tuli mupipi ukuyimba, nishi shavomvilwe vunuvwo, ngati mwe muzimanyiye.

⁵ Pashifukwa shinishi, lwe ine mpositwe ukujimbilila, ine nkamutuma ukuti ine pamu ningamanya ulwitiho lwinyu. Lumo uwakulinga angavalinga imwe, pe imbombo yitu yali ya vwelele. ⁶ Nkandi uTimoti ahinza kuliswe kufuma kukwinyu pe ahatuletela iswe ipangwi ilyinza ilya lwitiho lwinyu nishikunzi. Uwene ahatuvuzya iswe kuti mukutukumbuha ahinza sana, havili mukusamba ukutwenya iswe inza she niswe tukusamba ukuvenya imwe.

⁷ Mulandu wishi, vamwitu, tuhayusuvazyaga mwimwe mulandu wa lwitiho lwinyu, mwonti muvupotwe na mumayimba. ⁸ She kunsalizi twevalanzi, inga mukuyisipha mwa Mwene.

⁹ Kali tungasalifya kusalifya vuli kwa Mulungu pashifukwa shinyu, pa luseshelo lwonti lwe tulinalwo pantanzi pa Mulungu witu shifukwa shinyu?

¹⁰ Uvusiku nu musanya tukuputa na maha sana ukuti tengenya isheni shinyu nukuvavwilizya she shikusovela mulwitiho lwinyu. ¹¹ UMulungu witu nuTata umwenesho, havili uMwene witu uYesu, alongozye idala lyitu kwinza kwimwe.

¹² UMwene avonjelezye nukuyisipha mulugano woka nuwamwavo havili na kuvantu vonti, inza she niswe tukuvomba kwimwe.

¹³ Uwene agomyaje amoyo ginyu ukuti gave masita kulongwa nashimo muvufinjile pantanzi pa Mulungu witu nuTata pakwinza kwa Mwene witu uYesu poka navonti avantu vakwe avafinjile.