¹ Ka po inthi tunenechi? Po tupitilile ni mbibi umwakuti ichisa chibaghile ukubukilila? ² Temo vingabela. Uswe swe tufwile ku mbibi, po tungikala bulibuli mu ivyonyene? ³ Ka mutakumanya ukuti mo abinji bakoziwa mwa Yesu Kilisitu kokuti bakoziwa mu bufwe bwache? ⁴ Uswe tukasiliwa, nawe ukwendela mulozyo ukuya ku bufwe. Ichi chikabombiwa ukuti ngati mo u Yesu akazyukila ukufuma ku bufwe mu buchindamu bwa Tata, po nuswe tungiza twende mu bumi ubupya. ⁵ Pakuti uswe twaba poka nawe umwakuyana nimfwa yache, nuswe tuliza tube poka nawe mukuzyuka kwache. ⁶ Uswe tuchimenye ichi, ukuti usekulu witu akapayikiwa poka nawe umwakuti umubili uwa mbibi ghubaghile ghunangike. ⁷ Ichi chikabimbiwa bunonyene ukuti manye tube bazya ba mbibi. Uyu yo afwa akwitiziwa mugholosu nu wa muchinzi ku mbibi. ⁸ Loli nanthi uswe tufwile nu Kilisitu, tukusubila ukuti nuswe tuliza twikale nawe poka. ⁹ Tuzimenye ukuti mo u Kilisitu akazyukila ukufuma ku bufwe, atangafwa sona; ubufwe butakumulmula sona. ¹⁰ Pakuti ukuyana nu bufwe bo akafwila mu mbibi, akafwa lyoka mphela. Napo, buli ubumi bo akwikala, akwikala mwa Chala. ¹¹ Munzila yinonyene, numwe mubaghile mwiyaghanie ukufwa ku mbibi, loli mube babumi kwa Chala mwa Kilisitu Yesu. ¹² Polelo mutakitizye ukuti imbibi zilamule imibili yinu iyakufwa ukuti mwivwile ukukomania kwache. ¹³ Mutakabike ivigaba vya mubili ku mbibi, ukuba vibimbelo vya kusita bugholosu. Loli mwibike mwebene kwa Chala ngati bo bala bo bakafuma ku bufwe ukwiza ku bumi, sona mubike ivigaba vya mibili yinu kwa Chala ngati vibombelo vyakubombela ku bugholosu. ¹⁴ Mutakitikizye imbibi zibalamule umwe. Pakuti mute pansi pa ndaghilo, loli pansi pa bwila. ¹⁵ Po choni? Ka tubaghile tunangenge chifukwa chakuti tute pansi pa ndaghilo, loli pansi pa bwila? Temo vingabela. ¹⁶ Ka muzimenye ukuti nanthi umwe mwibika mwebene ngati mwe ba kayidi, po mwe ba kayidi ba yumo yo mukumwivwila? Mungaba lumo bazya ku mbibi, zyo zikababika ku bufwe, pamo bazya ku kwivwila, ko kukubabika ku bugholosu. ¹⁷ Loli amapalo ghabe kwa Chala! Pakuti mukaba mwe bazya ba mbibi, loli mwivwila ukufuma mu myoyo yinu cho chigaba cha bumanyili bo mukapeghiwa. ¹⁸ Mwaba mwe basatuke ku mbibi, po mwapangiwa ukuba bazya ba bugholosu ¹⁹ Nkunena ngati ne munthu chifukwa cha budedebazu bwa mibili yinu. Po ngati mo mukabikila ivigaba vya mibili yinu ngati bazya ku vinyale na ku bubibi, munzila iyonyene, po mubike ivigaba vya mibili yinu ngati bazya ba bugholosu ba buswepu. ²⁰ Pakuti po mukaba mwe bazya ba kunanga, mukaba mwe babuke ku bugholosu. ²¹ Pakabalilo kala, ka chikomwa buli cho mukaba nacho icha vinthu vyo ulu vikubakozya insoni? Ivyakukonka ivinthu ivi yomfwa. ²² Loli ulu mwasatuka ku mbibi sona mwakungiwa kwa Chala, muli nacho ichikomwa chinu ichabuswepu . Ubumalilo bwa bumi busita kumala. ²³ Pakuti umuvwalo wa mbibi yomfwa, loli ichabupi cha Chala bo bumi bwa muyilayila mwa Kilisitu Yesu u Mwene witu.