¹ Pamo mutazimenye, ba wamwitu,(pakuti une nkunena ku banthu bo bazimenye indaghilo), ukuti ululaghilo lukumulamula umunthu pa kabalilo ko mumi? ² Pakuti umwanakazi umusendwe akukonkha ululaghilo lwa mulume po wa bumi, loli nanthi umulume afwa, akusatuka ku lulaghilo lwa musendwe. ³ Po sona, nanthi umulume wa bumi, po inga akuba nu mwanalume uyunji, akwitiziwa ukuti we malaya. Loli nanthi umulume afwa,akusatuka ku lulaghilo, po ata kuba we malaya nanthi angaba nu mwanalume uyunji. ⁴ Polelo, ba wamwitu, mukapangiwa mufwile mu lusubilo ukwendela mu mubili wa Kilisitu. Ivi vili ngati bunonyene ukuti mukungane kwayunji. Kokuti ku mwene yo akuzyuka ku bufwe, umwakuti tupange imbeyu ya Chala. ⁵ Po tukaba ku mubili, ichinyonywa icha mbibi, vyo vikiza nu lulaghilo, vikabombanga imbombo ukuti ivigaba vya mibili yitupe imbeyu iyifwe. ⁶ Polelo ulu swe basatuke ukufuma ku ndaghilo. Tufwile mu chicho tukakungiwako. Vili ngati ulu ukuti tubombele mubupya bwa Muzimu, sona te mo mubukulu awe ubwa kalata. ⁷ Po tunenechi ulu? Ka indaghilo mbibi? Vitangaba ngati ubonyene awe. Po buli, Une nge nthazimenye imbibi, nanthi nthakendangamo mu ndaghilo. Pakuti ngali nthachimenye ichinyonywa nanthi indaghilo zikunena, ''utakanyonywe.'' ⁸ Loli imbibi zikagha umwabi ukwendela munkomelezyo sona zikwiza nivinyonywa vyonsi mu mwache. Nanthi pate indaghilo, imbibi bo bufwe. ⁹ Pa kabalilo kamo une nkaba mumi kusita ndaghilo, loli bo inkomelezyo ziza , imbibi zikaba nu bumi, sona une nkafwa. ¹⁰ Inkomelezyo zyo zikamphanga ubumi zikang'anamuka ukuba bufwe bwane. ¹¹ Pakuti imbibi zikaba nu mwabi ukwendela mu nkomelezyo sona zika mphusika. Ukwendela mu nkomelezyo zikankoma. ¹² Po indaghilo ziswepu, sona ni nkomelezyo ziswepu, zigholosu, sona ziza. ¹³ Ka cho chiza chingaba bufwe kukwane? Vitangaba ngati ulu. Loli imbibi, mumalo ghakuboneka ukuti mbibi yikandetela ubufwe kukwane ukwendela mu viza, sona ukwendela mu nkomelezyo imbibi zingaba zikulu umwakusita kupimika. ¹⁴ Pakuti tumenye ukuti indaghilo zya ku buzimu, loli une ne wa mubili. Une nkawuziwa pansi pa buzya bwa mbibi. ¹⁵ Loli nanthi nabomba, une nthakwivwisya. Pakuti cho une nkulonda ukuti mbombe, nthakuchibomba, sona cho une ntchibengite, nkuchibomba. ¹⁶ Loli nanthi nachibomba cho une nthakuchilonda, une nkwivwana ni ndaghilo ukuti indaghilo ziza. ¹⁷ Loli ulu te ne nkubomba sona ichi, loli zyo mbibi zyo zili mu mwane. Pakuti menye ukuti mumwane, cho chili mu mubili wane, vitakwikala mu bwiza. ¹⁸ Pakuti ubwighane bwa bwiza buli mumwane, loli nthangachibomba. ¹⁹ Pakuti ubwiza bo une nkulonda, nthakububomba, loli ububibi bo une nthakulonda, bo nkububomba. ²⁰ Ulu nanthi une nkubomba cho une nthakulonda ukubomba, kokuti tenene sona nkupanga, loli pamo imbibi zyo zili mumwane. ²¹ Po, une nalwagha ululaghilo ulu: Po une nkulonda ukubomba ubwiza, ububibi buli nune. ²² Pakuti une nkuhoboka mu lulaghilo lwa Chala nu munthu wane uwa mukasi. ²³ Loli nkulolela ululaghilo ulwakulekana mu vigaba vya mubili wane. Ukulwana nu luluaghilo ulupya munsibo zyane. Lukumpha ukupinyiwa nu lulaghilo ulwa mbibi mu vigaba vya mubili wane. ²⁴ Une ne munthu umupela chisa! Wewenu yo angiza amfumye ku mubili uwu uwabufwe? ²⁵ Loli amapalo ghabe kwa Chala ukwendela mwa Yesu Kilisitu u Mwene witu! Po ulu, une nemwene nkubombela ululaghilo lwa Chala ninsibo zyane. Napo buli, nu mubili une nkubombela ululaghilo lwa mbibi.