¹ Pakuti twenelezya nu lwitiko, tulu nu mutende nu Chala ukwizila mwa Mwene u Yesu Kilisitu. ² Ukwendela mu mwache weyo atwighulila inzila ukuti mu lusubilo ni chisa cha Chala motukwimilila, sona tukubusa mu lusubilo mu bukulu bwa Chala. ³ Te aponyene pene awe, tukubusa mukasi mu nthamyo zitu. Tukumanya ukuti inthamyo zikupangaisya umunthu ukba wa kujimba. ⁴ Ukujimba kukumupa umunthu inkhalo inyiza, sona inkhalo inyiza yikutupa ulusubilo, ⁵ sona ulusubilo lutakukozya insoni chofukwa cha lughano lwa Chala lo abikite mu myoyo yitu ukwizila mu Muzimu umuswepu, gho atupile. ⁶ Bo tuchili tatakalite, ko kabalilo kako ko u Kilisitu akafwila bo batakwiputa. ⁷ Chipala nkani ukuti umunthu afwile umunyantche napo yumo angaba wakubomba iziza, lumo umunthu angakazya umoyo ukufwila umunhtu umwiza. ⁸ Loli u Chala akusimikizya pakulangizya ulughano lwache ku kwitu ukuti po tukaba swe bananga mbibi, u Kilisitu akatufwila. ⁹ Mubwinji, po, ulu tweneleziwa ni daba lyache, po tuli nu bwanaloli ukuti tukwiza ukupokiwa ku bukali bwa Chala. ¹⁰ Nanthi lumo, bo tuchili swe balwani, tukahobokeliwa nu Chala ukwizila mu bufwe bwa mwana wache,mubwinji, bo twahobokeliwa, tukwiza ukupokiwa nu bumi bwache. ¹¹ Te popanonyene pene, tukwiza ukusekelela mwa Chala ukwendela mwa Mwene witu u Yesu Kilisitu, momu mwache yo tumupokilite pakutumanyania uku. ¹² Po ulu, ngati ukwizila mwa munthu weka Ukunanga kukiza mu chisu, munziala iyi ubufwe bukiza ukwendela mu mbibi. ¹³ Sona ubufwe bukaya ku munthu wensi, chifukwa bonsi bakananga. Pakuti bo kute indaghilo, ukunanga kukabako mu chisu, loli kutakaba ukubelenga imbibi bo indaghilo zitaliko. ¹⁴ Napo, ubufwe bukalamula ukufuma kwa Adamu mpaka kwa Mose, nabo batakananga we Adamu yo atakivwila, yo akaba chifwani cha yo akwiza. ¹⁵ Loli ichabupi chitayanite nukunanga hagha.Pakuti ukunanga kwa munthu weka abinji bakafwa, chingaba bwinji buli ichisa cha Chala sona chabupi pa chisa cha munthu weka, u Yesu Kilisitu, akafwila abinji. ¹⁶ Pali sona imphambano pakasi pa chabupi nu kunanga kwa munthu weka.Ubulongi bukakonka ukunanga koka po bukiza nukususiwa,loli ichabupi chikakonka ukunanga ukwinji po chikiza nukubenelezya. ¹⁷ Po nanthi, pa kunanga kwa yumo, ubufwe bukalaghila ukwendela mwa weka, vili bulibuli ku bala bo bapokela ubukulu bwa chisa sona chabupi cha buswepu ukulaghila mu bumi ukwendela mwa yumo, Yesu Kilisitu. ¹⁸ Polelo, ukunanga koka kukizisya ukunangania abanthu bonsi, po sona ukwendela mwa weka yo akisenda muswepu akiza wakulondiwa ku bumi bwa banthu bonsi. ¹⁹ Po ukwendela ukusita kusubila kwa munthu weka abinji bakaba bananzi, napo ukwendela mwa kusubila kwa weka abinji bakwiza ukuba baswepu. ²⁰ Loli imbibi zikapeghiwa ukuti ukunanga kube kwinji ukulusya kale. Loli po imbibi zikavula, ichisa chikaba chikulu nkani. ²¹ Ichi chikabombiwa ukuti, ukunanga kukulamula mu bufwe, po ulu ichisa chibaghile ukulamula ukwendela mu buswepu bwa bumi bwa bwilebwile ukwendela mwa Yesu Kilisitu u Mwene witu.