¹ Ka pali bwiza buli bo aba Yuda bali nabo? Sona phindu buli lyo lilipo pakudumulika? ² Pali iphindu ilikulu nkani munzila yonsi. Pabwandilo pa vyonsi, aba Yuda bakasubalilika nu buvumbukwe ukufuma kwa Chala. ³ Buli nanthi pakaba aba Yuda bamo bo te bakusubalilika? ⁴ Vitangabombiwa. Mu buyo bwache, leka u Chala abe wa bwanaloli, napo buli umunthu wensi mumyansi. Namo visimbiliwe, '''Mungaboneka mwe biza chifukwa cha mazwi ghinu, sona mungawina nanthi bakubalonga inongwa.'' ⁵ Loli nanthi ukuleka ukuba nu bwanaloli kukubonesya ukuti u Chala wa bwanaloli, ngapo tunganena ichoni? Ka tunganena ukuti u Chala te wa bwanaloli po akulangizya ubukali pa uswe? ( Nkubomvya amadali gha bunthu) ⁶ vitangabombiwa! Pala vingabanga ubonyene vingaba bulibuli ukuti u Chala alonge ichisu chonsi? ⁷ Nanthi ubwanaloli bwa Chala ukwizila mu mwane bukubalizya ubuchindamu bwache, ngapo choni cho nkulongiwa ngati ne wakunanga imbibi? ⁸ Choni cho tutanganena, tupange iviza ukuti bamutamanthile, napo bamo po bakusimikizya ukuti tukunena ivyonyene, '' Za tubombe ububibi, ukuti ubwiza bwize?'' Ichilango chabo chikwiza ukubayana. ⁹ Choni polelo? Ka uswe tukwibika swe biza paswebene? Napo panandi. Pakuti twanena kale ukuti twebonsi aba Yuda na ba Giliki swe bananzi, bonsi, bali pansi pa bunanzi. ¹⁰ Chili ngati mo chisimbiwile: '' Atalipo nayumonayumo yo wa bwanaloli, napo weka. ¹¹ Atalipo nayumo yo akwivwisya. Atalipo nayumo yo akumulondalonda u Chala. ¹² Bonsi bakamusambukila. Bonsi poka bate ni mbombo nayimoyimo. Atalipo nayumo yo akubomba ubwiza, nayumo, nanthi weka.'' ¹³ '' Kukamilo kwabo kukuyana bwaka ni pumpha lyo liwukite. Amalulimi ghabo ghakunena ivyabumyansi. Ubukali bwa njoka bwikalite mu milomo yabo.'' ¹⁴ ''Mu milomo mwabo mwizwile nu bughune nu kubabwa.'' ¹⁵ ''Bakwenda mwa lubilo ukuya pakukoma. ¹⁶ Ukukomania nu kuyimba kuli monsi mo bakwenda. ¹⁷ Abanthu aba batamenye inzila ya mutende.'' ¹⁸ ''Batakumoghopapo u Chala napo panandi panthanzi pa maso ghabo.'' ¹⁹ Ulu tumenye ukuti vyo indaghilo zikutubuzya, zikunena ku bo bali pansi pa ndaghilo. Ivi vili mu lubatiko ukuti umulomo ghonsi ghusobe ichakunena, pakuti ichisu chonsi chibe chakubelengeka kwa Chala. ²⁰ Ichi chifukwa chakuti kutanganeniwa ukuti wensi akwiza ukuba mugholosu kwa Chaka chifukwa cha kumanya indaghilo mu maso mwache. Pakuti ukwendela mu ndaghilo momo tukumanyila ububibi. ²¹ Loli ulu ukufumyako ululaghilo ubwiza bwa Chala bwavumbukwa. Pakaba ubu kamboni pa ndaghilo na baghonela, ²² koko, bwiza bwa Chala ukwizila mu lwitiko lwa Kilisitu ku bonsi bo bakumusubalila. Pakuti pate ukupambana. ²³ Pakuti bonsi bakananga, bakapotwa mu bufumu bwa Chala, ²⁴ bali nu bwabuke pakubenelezya mu chisa cha Chala ukwizila ko kuli mwa Yesu Kilisitu. ²⁵ Pakuti u Chala akamubika u Yesu Kilisitu mu bufwe bwache ukuti yibe ngati yo nzila yakuhobokela imbibi ukwendela mu lwitiko lwa daba lyache. Akamubika u Kilisitu ukulangizya yo nzila ya kubaghila abanthu, ukuleka ukubelengela imbibi zyabo izya kale ²⁶ pakunyosya umoyo. Vyonsi ivi vikabombiwa chifukwa cha kubonesya ubwiza bwache pa kabalilo aka. Vikaba ulu ukuti ilangizye mu bugholosu, nukumwenelezya wensi ubugholosu chifukwa cha lwitiko mwa Yesu. ²⁷ Po wewenu yo angikuzya? Atangabapo nayumo. Ka ghungaba mutundu buli uwa ndaghilo? Zyo mbombo? Awe, loli ukwendela mu ndaghilo zya lwitiko. ²⁸ Tukumalizya ukuti umunthu akweneleziwa ukuba mwiza te chifukwa cha mbombo zya lusubilo nanthi pate imbombo zya ndaghilo. ²⁹ Pamo u Chala we Chala wa ba Yuda bene? Ka te sona we Chala wa maluko aghanji? Eeh, na ba kunzi bope. ³⁰ Nanthi , momumo, u Chala ali weka, akwiza ukubenelezya abakudumulika mu lwitiko, sona nabo te bakudumulika ukwizila mu lwitiko. ³¹ Ka kokuti inthi tuleke pa kukonka indaghilo ukwizila mu lwitiko? Vitangabombiwa! Mu buyo bwache, tukuzikola indaghilo.