¹ Po ulu ute nichakunena, iwe munthu, we ukulonga, pakuti mo ukulongela abanyanko ukwisusya wemwene. Nuwe we wakulonga ukubomba ivyonyene. ² Loli tumenye ukuti ubulonzi bwa Chala buli nu bwanaloli pala bwiza ku bo bakubomba ngati ivyonyene. ³ Loli ukonke chino, uwe we munthu, we ukulonga bo ngati bakubomba ivi po nuwe vyovyo ukubomba ngati ivyonene.Ka ukwiza ukupona ku bulonzi bwa Chala? ⁴ Ka pamo ukwining'ona panandi pa vya bukabi ni chisa chache, ukuchedwa kwa chilango, nu buchimyeka bwache? Ka umenye ukuti ichisa chache chingakupangisya uwe ukuti upinduke? ⁵ Loli chifukwa cha bukavu bwa moyo wako po ukusengula wemwene ubukali pi siku lya bukali, lyo, lisiku lyakuvumbula ubugholosu bwa bulonzi bwa chala. ⁶ Akwiza ukumupa umunthu ali wensi ukuyana ni mbombo zyache: ⁷ Ku bo ukuyana nakabonembele, ka mbombo zyabo iziza, bali ni nyining'ono zya buchindamu, umuchinzi, po u Chala akwiza ukubapa ubumi wa bwilebwile. ⁸ Loli ku bo bakwilondela bene, bo bakukana ubwanaloli loli bakwitikizya ubusita bugholosu,ubukali sona nukoghofya vizu kwiza. ⁹ U Chala azukwiza ni vya ku baba sona ni vya kuyinvya ku buzimu bwa munthu yo akabombanga ivibibi, kubwandilo bwa ba Yuda, sona na ku ba Giliki. ¹⁰ Loli ubuchindamu, umuchinzi, sona nu mutende buzukwiza kwa wensi yo akubomba ubwiza, aba Yuda babwandilo, po bizenge aba Giliki. ¹¹ U Chala ate nukusala yumo. ¹² Pakuti abinji banangite ukusita ululaghilo bope bakwiza ukukomanika ukusita lulaghilo, sona abinji banangite nu kuchindika ululaghilo bakwiza ukulongiwa nu lulaghilo. ¹³ Pakuti te bo bakwivwa indaghilo bo baswepu panthazi zya Chala, loli babomba mbombo ba ndaghilo bobo bakusendiwa kuba ba bwanaloli. ¹⁴ Pakuti aba kunzi, batakaba nu lulaghilo, bakubomba pa bwikazi ivinthu vya lulaghilo, lo lulaghilo kukwabo bene, napo batalumenye ululaghilo. ¹⁵ Pa chino bakubonesya imbombo zyo zikulondiwa pa lamulo lyo lisimbiwe mu myoyo yitu. Isibo zyabo inthi zibabikile ubwa kamboni, sona aminong'ono ghabo pamo zikubapoka pa bene na bene ¹⁶ sona nu Chala wepe. Viliza vibombiwe pisiku lyo uChala aliza alonge ivisinsi vya banthu bonsi, ukuyana na mazwi ghane, ukwendela mwa Yesu Kilisitu. ¹⁷ Loli nanthi ukwinena wemwene ukuti we mu Yuda nu kusubila mu lulaghilo sona nu kwitumvya mwa Chala, ¹⁸ sona nkumanya ubwighane sona nu kwitikizya cho cha bwanaloli chifukwa ukabuziwa ukufuma mwilamulo; ¹⁹ sona pala ukwikutisiwa pakuti uwe wemwene ukulingilila ku bafwa maso, bo bwelu kubo bali mu chisi, ²⁰ umulingilili wa bupunganu nu mumanyisi wa bana abanandi, sona yo muli nawe mwi lamulo mu chibonesyo cha mahala sona nu bwanaloli, ka po yo akubomba vino vikwanfyania namo wikalile nu bumi bwako? ²¹ Uwe we ukumanyisya abanyankho,ka utakwimanyisya wemwene? Uwe we ukulumbilila ivya bwivi, ka uwe utakwiba? ²² Uwe we ukunena ukuti manyi pabe yumo uwakupanga ubwa malaya, ka uwe utakubomba ubwa malaya? Uwe we ubengite ivifwani, ka uwe utakwiba mu ma tempeli? ²³ Uwe we ukwitutumula mu lulaghilo, ka utakumupa u Chala umuchinzi pakuleka ukwivwila ululaghilo? ²⁴ Pakuti '' izina lya Chala likususiwa ku ba panzi chifukwa chinu,'' ngati mo vikasimbiliwa. ²⁵ Pakuti ukudumuliwa momumo kuli ni chakwaghapo ku kwinu nanthi mukwivwila ilamulo, ukudumuliwa kwako kukwiza ukuba kusita kudumuliwa. ²⁶ Po, nanthi, umunthu yo atadumuliwe akusunga ivyakulondiwa vya ndaghilo, atakwiza ukuba ngati wa kusita kudumuliwa loli akwiza ukusendiwa ngati wakudumuliwa? ²⁷ Sona atazukuba wa bamo bo mubwikazi batadumuliwe akwiza ukubasusya nanthi asunga ululaghilo? Ichi chili mwa ulu chifukwa chakuti muli nu lulaghilo lo lusimbiwe sona nukudumuliwa, loli mukukana ululaghilo! ²⁸ Pakuti te we mu Yuda yo ali nakanenele ka vinthu vya kunzi; pamo te wakudumuliwa ko kukubombiwa ku mubili loli kutakuboneka kunzi hagha. ²⁹ Loli we mu Yuda yo mukasi, sona adumuliwe kuli mu moyo, namu Muzimu, te mo mu kalata hagha. Ukusalifya kwa munthu ngati uyu kutakufuma ku munthu hagha loli kukufuma kwa Chala.