¹ Ulu uswe swe tuli namaka tubaghile ukusenda ivyakufoka vya bakufoka, sona tubaghile ukwihobosya twebene. ² Leka wensi mwa umwe ahobosyenge umupalamani wache nacho chiza umwakuti amuzenge. ³ Pakuti u Yesu wepe ata kihobosya mwene. Mu buyo bwache, vikaba ngati mo vikasimbiliwa, ''Umusamu gho bakakusamula ghukangwila une.'' ⁴ Pakuti chonsi cho chikasimbiwa kale chikasimbiwa pakutulamula umwakuti ukufumila mu buchimyeka sona ukufumila mulukazyo ulwa masimbo tungaba nu lusubilo. ⁵ Po leka u Chala uwa bufisa lyoyo sona uwa lukazyo abape insibo iyakuyanana weka nu yunji ukufwana mwa Yesu Kilisitu. ⁶ Leka yo akubomba ichi abombe umwakuti ninsibo yoka mumuchindike nu mulomo ghoka u Chala nu Tata uwa Mwene witu u Yesu Kilisitu. ⁷ Polelo mupokele weka nu yunji, ngati mo u Kilisitu wepe akakupokelela uwe, ku buchindamu bwa Chala. ⁸ Pakuti une nkuti bati u Kilisitu akapangiwa ukuba mubombi uwakudumulika mumalo mwa bwanaloli bwa Chala, mumalo mwa kughomya amalaghano gho ghakapewa ku ba sekulu, ⁹ sona nukuti abamitundu bamuchindike u Chala chifukwa cha chisa chache. Ngati mo visimbiliwe, ''Polelo inti mbapale pakasi pa ba mitundu nu kwimbila izina linu.'' ¹⁰ Akuti sona, ''Hoboka, umwe ba kunzi poka na banthu binu.'' ¹¹ Nkunyokezya sona, '' Mupale u Mwene, mwebonsi ba kunzi; leka abanthu bonsi bamupale.'' ¹² Sona, u Yesaya akuti, '' Umusisi wa Jesse inthi wize, wugho inthi ghufume ukwiza palamula aba kunzi; mu mwache aba kunzi inthi bize bamusubile.'' ¹³ Leka u Chala uwa lusubilo abizuzye umwe nu buhobosu bonsi poka nu mutende mukusubila, umwakuti na maka gha Muzimu Ughuswepu mube mukasi mu lusubilo. ¹⁴ Une nemwene nikutisiwa numwe, ba wa mwitu. Une nikutusiwa nukuti numwe mwebene mwizwile nu bwiza na kamanyile konsi. Une nikutisiwa ukuti mungamanyisania. ¹⁵ Loli une nkubasimbila ivinji nubukivu ivya vinthu vimo ivyakubakumbusya umwe sona, chifukwa cha bwila bo u Chala akampa. ¹⁶ Ichabupi chakuti imbe ne mubombi wa Kilisitu Yesu uwa kutumiwa ku ba kunzi, ukuti nipe ngati ne muputi wabulumbilili bwa mazwi gha Chala, ukuti ukwipa kwa ba kunzi kube kwakwitikiziwa, nukufikapo mwa Muzimu Umuswepu. ¹⁷ Mwa Kilisitu Yesu indi nacho ichifukwa ichakwitumvizya pa bubombi bwane kwa Chala. ¹⁸ Pakuti ntakwiza ukusayila ukunena chimo ukulusya cho u Kilisitu afisizye mu mwane ukuti aba kunzi babe bakwivwila. Ivi vyo vinthu vyo vikibombeka mu mazwi na mumbombo, ¹⁹ mu maka gha vibonekelo ni viswigho na mumaka gha Muzimu. Vikaba ulu ukuti nyamule ubulumbilili bwa Kilisitu ukufuma mu Yelusalemu ukuzyungulila mpaka ukufika ku Illyricum, ukuti mbombe imbombo yonsi. ²⁰ Mu nzila iyi, ukulonda kwane kukaba kwakuti mfumusye ubulumbilili, konsi ko izina lya Kilisitu litamanyikizwe, umwakuti ntakazenge ulufula pa munthu uyunji. ²¹ Chili ngati mo chisimbiliwe: '' Na bakusita kubuziwa intumi bakwiza pakumulinga, sona nabo batakamwivwa bakwiza pa kwivwisya,'' ²² Polelo naba newa kukanizika akabalilo akinji ukuti nize ku kwinu. ²³ Loli ulu, nte sona na malo aghanji muchigaba ichi, sona naba ne wakunyonywa ku myaka iyinji ukuti nize kukwinu. ²⁴ Nkusubila pakubalolela pala inti mpulusanienge uko pa bulendo bwane ukuya ku Sipeni, ukuti mwize munavweko pa bulendo ubwa kubuka, pala niza nilagha ukuba numwe kwakabalilo. ²⁵ Loli ulu naya ku Yelusalemu, pakubombela abanthu abaswepu aba Chala. ²⁶ Pakuti kakaba kabalilo akiza abaku Makedonia na ku Achaia pakusangula ubutuli bumo ukuti bwavwe abanthu abapina abaswepu aba mu Yelusalemu. ²⁷ Inga, kakaba kabalilo kabo akiza, sona bakabapa abene. Pakuti aba kunzi bakagabananga nabo ivya buzimu, po bakabapa aba Yuda imbombo ni vya kubombela. ²⁸ Polelo, nanthi naya namalizya imbombo iyi sona naba nubwanaloli ukuti bapokela vyonsi, nkuzu kuya ku Sipeni nu kubendela umwe pa bulendo bwane. ²⁹ Nkumanya ukuti po nkuya pakwiza ku kwinu nkuya pakuba wakwizula nu lusayo lwa Kilisitu. ³⁰ Po une nkubalambilizya umwe, ba wamwitu, mwa Mwene witu u Yesu Kilisitu, sona na mu lughano lwa Muzimu, ukuti tulwisizye poka nune pakuniputila kwa Chala. ³¹ Mwipute ukuti mpokiwe kubasita kwivwila aba mu Yudeya, nukuti ububombi bwane ku Yelusalemu buye bupokeleleke na banthu abaswepu aba Chala. ³² Mwipute ukuti nize kukwinu nukuhoboka ukwendela mu bwighane bwa Chala, sona nukuti, mubupoka numwe, tubwaghe ubutuzyo. ³³ Leka u Chala wa mutende abe numwe mwebonsi. Ameni.