¹ Nkubabuzya umwe ivya Febi umuyemba witu yo mubombi wa Chalichi lyo lili mu Cenchrea, ² umwakuti mumupokelele mwa Mwene. Mubombe ichi mukabilo akiza ngati mwe baswepu aba Chala , sona mumutule ubutuli bonsi bo angalonda ku kwinu, chifukwa ali mutuli wamaka nkani kukwane na ku binji. ³ Mumulamuke u Pulisila nu Akila, ababombi abanyane mwa Kilisitu Yesu, ⁴ bo bakwibika mu bulwani chifukwa cha bumi bwane. Tenene nkubasalifya nemwene loli ni vipanga vyonsi ivya ba mitundu. ⁵ Mulamuke ichipanga cho chili mu nyumba zyabo. Mumulamuke u Epaenetus umughaniwa wane, yo chikomwa cha mu Asiya kwa Kilisitu. ⁶ Mumulamuke u Maliya, yo akababombela umwe nkani. ⁷ Mumulamuke u Andronicus sona nu Junias, bo baliko sona ba kayidi banyane. Bo bamanyikizwe nkani ku batumwa, sona bakaba mwa Kilisitu bo une nchili. ⁸ Mumulamuke u Ampliatus, umughaniwa wane mwa Mwene. ⁹ Mumulamuke u Urbanus, uwambombo munyane mwa Kilisitu, sona u Stachys, umughaniwa wane. ¹⁰ Mumulamuke u Apelles, yo wakusubalilika mwa Kilisitu. Mubalamuke bonsi aba mu nyumba ya Aristobulus. ¹¹ Mumulamuke u Herodion, uwa luko lwane. Mulamuke bonsi aba mu nyumba ya Narcissus bo bali mwa Mwene. ¹² Mulamuke u Tryphaena nu Tryphosa, bo bakabomba na maka mwa Mwene. Mumulamuke u Persis umughaniwa, yo abomba hee mwa Mwene. ¹³ Mumulamuke u Rufus, uwakusebiwa mwa Mwene, sona nu mama wache nune. ¹⁴ Mumulamuke u Asyncritus, Phlegon, Hermes, Patrobas, Hermas, sona na ba wa mwitu bo bali nabo. ¹⁵ Mumulamuke u Philologus nu Julia, Nereus sona nu muyemba wache, nu Olympas, na bonsi abanthu bo baswepu ba Chala bo bali nabo. ¹⁶ Mulamunkanenge uyunji nu mnyantche mu kufyompana ukuswepu. Ivipanga vyonsi ivya Kilisitu vukubalamuka. ¹⁷ Ulu nkubalambilizya, ba wa mwitu, mwining'onele nkani bo bakuleta impatuko sona ni nkalalizi. Bakubukilila nkani mu bumanyili bo mukamanyila.Fumako ku kwabo. ¹⁸ Pakuti abanthu ngati aba batakumubombela u Kilisitu u Mwene witu awe, loli intumbo zyabo. Na mazwi ghabo aghatonsu na gha kupepeka nukupusika imyoyo ya bafwase. ¹⁹ Chifukwa akabilo ka kwivwila kwinu kabafikile abinji. Ne wakuhoboka, po, numwe, loli nkulonda ukuti mube ba mahala ngati ku vila vyo viza, nukuba ba kufwasa ku vinthu ivibibi. ²⁰ U Chala uwa mutende inthi amutumbulanie u Satana kuntende ku malwayo ghinu. Ubwila bwa Mwene u Yesu Kilisitu ghubenge numwe. ²¹ U Timoti, uwambombo umunyane, akubalamuka, sona u Lucius, Jason, nu Sosipater, aba luko lwane. ²² Une, Tertius, ne nkusimba u kalata uyu, nkubalamuka mwa Mwene ²³ Gaius, yo akwikalako poka ni chipanga, akubalamuka. Erastus, umusungi chuma wa kaya, akubalamuka, poka nu Quartus uwa mwitu. ²⁴ Leka ubwila bwa Mwene u Yesu Kilisitu wubenge numwe. Ameni. ²⁵ Ulu yo angamanya pabapa amaka gha kuyana ni chipanga sona nu bulumbilili bwa Yesu Kilisitu, ukulingana nu busetuli wa vya kuvwama vyo vikafisiwa ukufuma kale, ²⁶ loli ulu vyasetuliwa nu kumanyikwa ukufumila mu vya kusimba ivya baghonela ku chisu chonsi, mu bulamuli bwa Chala uwa maka, ghonsi nu kwiza nu lwitiko lwa kwivwila ²⁷ Kwa Chala mwene uwa mahala, ukwendela mwa Yesu Kilisitu, kubenge ubuchindamu bwa bwile bwile. Ameni.