¹ Po nkhalinga kumwanya ukupya sona ni chisu ichipya, pakuti ku mwanya ukupya ni chisu ichipya vimalite sona ni nyanja yitakabapo. ² Nkhalinga akaya akaswepu, uyelusalemu umupya, vyo vikafuma ku mwanya kwa Chala, ukwitendekezya ngati we nabwinga yo akwitendekezya ukuya ku mulume wache. ³ Nkhivwa amazyu aghakulu ukufuma ku chitengo ghakuti, ''Linga! Ubuyo ubwakwikalapo ubwa Chala buli mu banthu, sona akwiza ukwikala nabo. Bazukuba banthu bache, sona u Chala umwenecho akwiza ukuba nabo sona akwiza ukuba we Chala wabo. ⁴ Akwiza ukupuputa amasozi mu maso ghabo, kutazukuba sona infwa, pamo ukwilumbusya, pamo ukulila, pamo ububavu. Ivinthu ivyakale vimalite. ⁵ Yumo yo ikalite pa chitengo akanena, ''Linga! Nkhupanga ivinthu vyonsi vipya,''Akati, ''Simba ichi chifukwa amazyu agha ghabwanaloli sona ghakusubalilika.'' ⁶ Akanena ku kwane, ''Ivinthu ivi vibombiwe! Une ne Alpha nu Omega, ku bwandilo na kubumalilo. Ku yumo yo ali ni nyota nkuzukumupa ichakungwa ichakusita u kughula ukufuma ku mbwibwi ya minzi aghabumi. ⁷ Yuyo yo apota akwiza ukupyana ivinthu ivi, sona nkwiza ukuba ne Chala wache, sona akwiza ukuba mwana wane. ⁸ Loli ku bogha, abasita lwitiko, abapopo, abakukoma, abamalaya, abalozi, abakwiputa ivifwani, na bamyansi bonsi amalo ghabo koku nyanja ya moto wa sulefule Ubo bobobufwe bwa chibili.'' ⁹ Weka mu banthumi seveni akiza kukwane, yumo yo akaba nu tubigha seveni to twizwile ni viswigho ivyabumalilo seveni sona akanena , ''Zakuno. Inthi mbabonesye unabwinga, umwanakazi wa mwana wa Nang'onzi.'' ¹⁰ Po akanyamula une mu muzimu ukuya kuchipili ichikulu nkhani nukundangizya akaya akaswepu Yelusalemu akwisika pansi ukufuma ku mwanya kwa Chala. ¹¹ UYelusalemu akaba nu buchindamu bwa Chala, sona ubwiza bwache bukaba ngati mabwe ghakung'anima , ngati libwe ilya ku nyazimila ¹² Chikaba chikulu nkhani, ichibumba ichitali ni milyango twelovu, na banthumi twelovu pa milyango. Pa milyango pakasimbiwa amazina gha ma luko twelovu agha bana ba Isilayeli. ¹³ Kubufumilo bwi zuba kukaba imilyango yitatu, ku lulu kukaba imilyango yitatu, kuntende kukaba imilyango yitatu, na kubwingililo bwi zuba kukaba imilyango yitatu. ¹⁴ Ulubumba lwa kaya lukaba na malufula twelovu, sona mu mwabo mukaba amazina twelovu aghaba tumiwa twelovu abana ba nang'onzi. ¹⁵ Yumo yo akunena nune ali ni nkhomo yo akupimila iyakupangiwa nu golide ukuti apime akaya, imilyango yache ni chibumba chache. ¹⁶ Akaya kakabikiwa umwa kuyana; ubutali bwache bukayana bwaka nu bupapate. Akapima akaya ni nkhomo iya kupimila, twelovu sauzande sitediya mu butali (ubutali bwache, ubupapate, ukukwezya vikayana bwaka). ¹⁷ Akapima sona ulubumba lwache, 144 cubitisi ubukulu nukupimika kwa munthu ( ko sona kupima kwa banthumi). ¹⁸ Ulubumba lukazengiwa na mabwe amaswepu sona nichikaya cha golodi umwiza, ngati li galasi iliza, ¹⁹ Ulufula lwa chibumba lukazengiwa nu mutundu ghonsi uwa mabwe amiza. Ilya bwandilo likaba liswepu, ilya bubili likaba sapphile, ilya butatu likaba agate, ilya folo likaba emerald, ²⁰ ilya fayivi likaba onyx, ilya sikisi likaba carnelian, ilya seveni likaba chrysolite, ilya eyiti likaba beryl, ilya nayini likaba topaz, ilya teni likaba chrysoprase, ilya leveni likaba jacinth, ilya twelovu likaba amethyst. ²¹ Imilyango twelovu yikaba ni vyakwimililapo twelovu; umulyango ghoka ghukapangiwa ukufuma pa chakwimilila choka. Imisebo ya chikaya yikaba ya golide umuswepu, ngati galasi ilya kulangala. ²² Nkhalinga ukuti mute itempheli nalimo mu chikaya, pakuti u Mwene u Chala U wamaka sona nu Mwana wa nang'onzi bobo tempheli lyache. ²³ Ichikaya chitakalondangapo izuba pamo umwezi ukuti vi chibalile chifukwa ubuchindamu bwa Chala bukabalila papache, sona inyale yache mwana wa nang'onzi. ²⁴ Umutundu ghukwiza ukwenda mu bwelu bwa chikaya, Aba mwene ba chisu inthi bakabike ubuchindamu bwabo kukwache. ²⁵ Imilyango yache te yize yighaliliwe pakabalilo ka musanya, sona te kwize kube ubusiku. ²⁶ Bakwiza pakuleta ubuchindamu sona umuchinzi ku mitundu yache, ²⁷ Loli nachimo nachimo cho techiswepu ukuti chikinjile mula, pamo yumo yo akubomba ubupopo pamo ubumyansi, loli bene bo amazina ghabo ghasimbiwe mu Buku lya bumi ubwa mwana wa namg'onzi.