¹ Po nkhalinga uwanthumi akwisika ukufuma kumwanya. akaba ni chighulilo chachindobozi, ni mphingwi izikulu mu nyobe zyache. ² Akakola ichinjoka, ichinjoka ichakale, yo we satana, sona akachipinya kwa myaka amasauzande, ³ Akamutayila muchibwina ichitali nkhani, Akachighalila nukuchimatilila pa mwanya pache. Ivi vikaba ulu ukuti atakapusike sona ichisu mpaka amasauzande gha myaka yimale. Ukufuma apo abaghile asatulwe pa kabalilo akakuchepa. ⁴ Po nkhalinga ivitengo. bikalitepo babo bo bapeghiwe amaka gha kulonga. Po nkhalinga sona imizimu ya babo bakabadumula imitu chifukwa cha bukaboni pa vya yesu sona na mazyu gha Chala. Batakachiputapo ichinyamana pamo ichifwani chache, sona bakakana ukupokela ichimanyikwilo pa cheni na pa nyobe zyabo. bakaba nu bumi, sona bakaba poka nu yesu kwa myaka sauzande. ⁵ Mu bamo abakufwa bobakasyala batakaba nu bumi awe mpaka imyaka amasauzande yimale. Uku kokuzyuka kwa bwandilo. ⁶ Musayiwa sona mu swepu wensi yo asenditepo imbali mukuzyuka kwa bwandilo! Pa mwanya pa ichi infwa ya bubili yitenamaka. Inthi kukabe abaputi ba Chala sona na ba Kilisitu bazukuba poka nawe ku myaka amasauzande. ⁷ Nanthi imyaka amasauzande yafika kubumalilo, u Satana azukusatuliwa mu jele. ⁸ Azukuya kunzi pakupusika imitundu ku makona ghonsi folo agha chisu_Gog sona nu Magog_ukubabunganika poka pa bwite. Bazukuba bo binji ngati musesenga wa ku nyanja. ⁹ Bakakwela ku mwanya pakupululila ichisu nukuzyungulila amalo gho abanthu ba Chala abaswepu_akaya akaghaniwa. Loli umoto ghukiza pansi ukufuma ku mwanya nu kubocha bonsi. ¹⁰ Po usatana, yo akabapusika, akasumbiwa mu lusoko ulwa kwaka u sulefule, ko ichinyamana sona na baghonela abamyansi basumbiweko. Inthi ku kabe ukubabwa kwa busiku nu musanya bwile na bwile. ¹¹ Po nkhalinga ubukulu bwa chitengo ichiswepu sona nayo akikalapo. Ichisu sona na kumwanya vikasamalapo pa nthanzi pache, loli kutakabako amalo naghamo aghakuti bangaya. ¹² Nkhalinga abakufwa_aba maka na basita kulondiwa- bimilile panthanzi pa chitengo, sona ama buku ghakaba ghakupukule. Po ibuku ilinji likaba likupukule_i buku lya Bumi. Abakufwa bakalongiwa navyo vikasungika mu mabuku, umwakuyana ni mbombo zyabo. ¹³ Inyanja yikaleta abafwe bo bakaba mumo. infwa ni Hades vikaleta abakufwa bo bakaba mumwabo, po abakufwa bakalongiwa ukuyana na vivyo bakabomba. ¹⁴ Infwa sona Hades vikasumbiwa mu nyanja ya moto. Iyi yonfwa ya chibili_inyanja ya moto. ¹⁵ Nanthi yo izina lyache litasimbiwe mu Buku lya bumi, atayiwe mu nyanja ya moto.