¹ Po uwanthumi akandangizya ulusoko lwa minzi gha bumi, aghiza ngati mabwe ghakung'azimila. gha kisika ukufuma ku chitengo cha Chala sona ni cha nang'onzi ² pakasi pa nzila zya kaya. Imbali yoka iya lusoko kukaba ikomo lya bumi, likela ivikomwa twelovu ivya miyundu yonsi sona likwela ivikomwa vyache umwezi ghonsi. Amani gha likomo ghakupozya imitundu yonsi. ³ Tepakabepo sona ichighune. I chitengo cha Chala sona icha Mbelele inthi chibe mukaya akakulu, sona nabazya bache inthi baka mubombele yuyo. ⁴ Ithi bakachilinge icheni chache, sona izina lyache ithilikabe pa mphulilo zyabo. ⁵ Tekukabeko sona ubusiku; tepakalondiwe sona ubwelu bwa nyale pamo bwa lizuba chifukwa u Mwene Chala azukubala papabo ithi bakalaghile bwile na bwile. ⁶ Uwa nthumi akanena kukwane, ''Amazyu agha ghakusubaliliwa sona gha bwanaloli. U Mwene, u Chala wa mizimu ya baghonela, atumite uwanthumi wache ukubalangizya abazya bache cho chikuya pakubombiwa lunonyene.'' ⁷ ''Linga! Une inkhwiza lunonye! Musayiwa yo akwivwila amazyu agha bughonela gha mubuku ili.'' ⁸ Une, Yohani, ne yumo ne nkhivwa sona nu kulinga ivinthu ivi. Bo nivwa sona nabalinga, Nkhawa pansi muvinama vya wanthumi nukumwiputa yuyo yo akandangizya ivinthu ivi. ⁹ Akanena ku kwane, ''Utakabombe ivyo! Une ne muzya munyankho poka nuwe, poka naba wamwinu abaghonela, sona nabonsi bo bakwivwila amazyu gha buku ili. Mwipute u Chala!'' ¹⁰ Akanena kukwane, ''Utakighalile amazyu agha bughonela bwa buku ili, pakuti akabalilo kali papipi. ¹¹ Wensi yo temugholosu, muleke apululizye ukubomba ubusita kugholoka. Wensi yo akubomba ivibibi, leka apululizye ukubomba ivibibi. Wensi yo akubomba ubugholosu, leka apululizye ukuboma ubugholosu. Wensi yo muswepu, leka apululizye pakubomba ubuswepu.'' ¹² Linga! Une inkhwiza lonsi ulu. Amalipilo ghane indinagho, ukumulipila wensi ukuyana ni mbombo zyo abombite. ¹³ Une ne Alpha sona ne Omega, ne wabwandilo sona wa bumalilo, ne bwandilo sona bumalizyo. ¹⁴ Basayiwa babo bobakuchapa inkhanzu zyabo ukuti bakabe nu mwabi wakulya ukufuma kwikomo lya bumi sona nukwingila mukaya akakulu ukwendela pamilyango. ¹⁵ Kunzi kuli imbwa, abalozi, abamalaya, abakukoma, abakwiputa ivifwani, sona na wensi yo aghanite nukubomba ubumyansi. ¹⁶ Une, Yesu, natuma uwanthumi wane ukuti asimikizye ku kwinu ivinthu ivi ku vipanga. Une ne musisi sona ne lunyungu lwa Davide, lutondwa ulwakubala ku ndabindabi.'' ¹⁷ U muzimu sona nu nabwinga akuti, ''Zakuno!'' Leka yo akwivwa anene ukuti, ''Zakuno!'' Wensi yo ali ninyota, leka ize, sona Wensi yo akunyonywa ivi, Mleke mubusatuke abe na minzi agha bumi. ^{18 19} Une nkhusimikizya ku wensi yo akwivwa amazyu gha bughonela bwa buku ili: Nanthi yo ongelezya, U Chala azukongezya inthamyio zyo zisimbiwe mu buku ili. Nanthi yo afumyiamo amazyu gha bughonela mu buku, U Chala inthi akafumyemo amalipilo ghache mwi komo lya bumi sona na mukaya akaswepu ko kasimbiwemo mu buku ili. ²⁰ Yo akusimikizya ku vinthu ivi akuti, ''Naloli! Une nkwiza lonsi ulu.'' Ameni! Zakuno, Mwene Yesu! ²¹ Ichisa cha Mwene Yesu chibe na mwebonsi. Ameni.