¹ Ka ubulwe nu kudalinkhana pakasi papinu kukufuma kwiyi?Ka vitakufuma mu vinyonywa vinu vyo mukulwana na banyinu? ² Mukunyonywa kwinu, loli mute navyo. Mukukoma sona mukunyonywa, sona mutakuvyagha. Mukulwa nukudalinkhana. Mute navyo chifukwa mutakulalusya. ³ Mukulalusya loli mutakupokela chifukwa mukulenga akabibi, pati vyo mukulenga mukulonda pakwihobosya bwaka. ⁴ Umwe mwe bamalaya! Koti mutamenye ukuti pakupanga ubukamu ni chisu kukubabengania nu Chala? Po wensi yo akulonda kuba pa bukamu ni chisu akuba mulwani wa Chala. ⁵ Pamo mukwinong'ona pakuti amasimbo ghakunena vya bwaka, ''U Muzimu gho ghuli mwa uswe wa kabini?'' ⁶ Loli u Chala akutupelela ichisa ichikulu, po amasimbo ghakuti, '' U Chala akususya bo bakwitumvya, loli akubapelela ichisa abanthu bo bakwyisya.'' ⁷ Po mubike kwa Chala. Mususye u satana, po akwiza ukufuma ku kwinu. ⁸ Palamila kwa Chala, po wepe akwiza ukupalamila ku kwinu. Swefya inyobe zinu, mwebananzi umwe, nukusuka imyoyo yinu, umwe banthu bakwinong'ona pabwinji. ⁹ Mwiliumbusye,mudandawule nu kulila! Leka ukuseka kwinu kubabike mubukalale sona ubughobosu bwinu kulila. ¹⁰ Mwiyisye mwebene pamaso gha Mwene, po akwiza ukubakwezya. ¹¹ Muleke ukunena abanyinu, ba wamwitu. U munthu yo akunena umunyabo pamo ukulonga uwamwabo nukunena akabibi indaghilo po akulonga indaghilo. Nanthi ukulonga indaghilo, tewe mubomvi wa ndaghilo,loli mulongi. ¹² Alipo weka yo akupa indaghilo nu kulonga. Weyo mwene abaghile ukukupoka sona nu kunanga. Ka wewenu, uwe weukulonga umupalamani wako? ¹³ Po ivwa, uwe we ukunena, ''Ilelo pamo indabi tukwiza ukuya ku kaya akakulu, nukumala umwaka kulanyene, nukughuzya nukwandula.'' ¹⁴ Ka wewenu yo akumanya vyo inthi vibombiwe indabi, sona poubumibwako buli kwi? Pakuti we chibuvi cho chikuboneka bwaka pakabalilo akanandi po nukuzimatila. ¹⁵ Mumalo mwache, muti, ''Nanthi u Chala ighanite, ukuti inthi twikale nukubomba ichi pamo chila.'' ¹⁶ Loli ilelo umwe mukwitumvya ni vya mwalwe mwalwe.Vyonsi ivyakwitumvya zyo mbibi. ¹⁷ Po wensi yo amenye pakubomba ubwiza loli atakubomba, kukwache yo mbibi.