¹ Zanga lunonyene, umwe mwe bakabi, lila nukukolomoka chifukwa cha nthamyo zyo zikwiza papinu. ² Ubukabi bwinu bubolite, sona imyenda yinu yalyeka ni vinkhwikwi. ³ U golide winu sona nu siliva winu vyachenja umwakuti ulusima lwabo lukwiza ukuba we kamboni wakususania numwe. Vikwiza ukulya umubili winu ngati moto. Mwasengula ivyuma vinu ku masiku gha kubumalilo. ⁴ Lingisya , amalipilo gho mukufumyako ku babomba mbombo bo bakapupa imighunda yinu bakulila umwakususania numwe. Ukulila kwa bo bakwinula kwafika mu makutu gha Mwene. ⁵ Mwikala ubumi bwa kusekelela pa chisu nukwihobosya mwebene. Imyoyo yinu yina chifukwa cha lisiku lyo likuchekiwa. ⁶ Mwasusya nukumukoma umunthu umusita chifukwa nachimo. Atakulimbana numwe awe. ⁷ Lindilila, tasi, bawamwitu, mpaka ukwiza kwa Mwene. Lingisya mo umulimi akulindilila ivyakwela iviza ukufuma pansi sona ukuba wakulindilila, mpaka po iza apokela imvula ya bwandilo sona iya bumalilo. Umwe, lelo, mulindilie. ⁸ Panga imyoyo yinu ukuba ya maka chifukwa chakuti u Mwene ali papipi ukwiza. ⁹ Mutakilumbusye, ba wamwitu, kwa weka nu munyantche, umwakuti mutakize mulongiwe. Lingisya, umulongi imilile pa mulyango. ¹⁰ Musendelepo ichimanyisyo, ba wamwitu, ukutamiwa sona nukulindilila kwa baghonela, babo bo bakunena mwi zina lya Mwene. ¹¹ Lingisya, tukubabika mu kabilo kabo bo bakufwililikila ukuba basayiwa. Mwivwile ivyakufwililikila kwa mbombo, sona muyimenye imbombo ya Mwene, mo abelile nkhani wa bwila sona nichisa. ¹² Pamwanya pa vyonsi, wamwitu wane, utakalape, pamo ivyakumwanya lumo ivya pansi pano, pamo nukulapila chilichonsi. Mubuyo bwache, muleke umwe, ''Ukwitika'' kube ''Kwitika'' sona ''Ukukana'' kube ''Kukana,'' ukuti mutakawile pa bulongelo. ¹³ Ka alipo yumo pakasi papinu yo akutamiwa? Mumuleke ipute. Ka alipo yumo yo akuhoboka? Mumuleke imbe inyimbo zyakumupala. ¹⁴ Ka alipo yumo mwa umwe yo mulwale? Mumuleke itizye abasongo ba chalichi, sona mubaleke ba mwiputile. Mubaleke bamupakazye na mafuta mwizina lya Mwene. ¹⁵ Ulwiputo lwa lwitiko lukupozya umunthu umulwale, sona u Mwene akwiza ukumunyamusya. Nanthi anangitepo, u Chala akwiza ukumuhobokela ¹⁶ Mulape ubunanzi bwinu weka nu munyantche sona mwiputilane ukuti mwize mupole. Ulwiputo lwa munthu umugholosu lwa maka nkhani mu mbombo zyache. ¹⁷ U Eliya akaba munthu ngati mo uswe tubelile. Akiputilanga ukuti imvula yitakatonye, sona yitakatonyanga, sona yitakatonya mu munda kwa myaka yitatu ni myezi sikisi. ¹⁸ Po u Eliya akiputa sona. Po kumwanya kukatupa imvula, sona ichisu chikaba nivikomwa. ¹⁹ Ba wamwitu, nanthi yumo afumapo pakasi papini mu bwanaloli, sona yumo iza nawe kukwinu, ²⁰ umunthu yula amanye ukuti wensi yo amunyosya umunanzi ku nzila ya kusobela akwiza ukumupoka kumfwa sona akwiza ukupokiwa ku mbibi izinji nkhani.