¹ Une, polero, ngati mupinyiwa wa Mwene, nkubalenga ukuti mwende munzila ya lwito lo mukitiziwa. ² Une nkubalenga ukuti mwikale mubukulu bwa kwiyisya sona abololo na bafisalyoyo, nukuba poka weka nu munyabo mu lughano. ³ Bomba akiza pakusunga ubupoka bwa buzimu bo bukubapinyania poka mu bufwase. ⁴ Ghuliko umubili ghoka sona nu muzimu ghoka, Ngati sona mo nuwe ukizitiziwa mu lusubilo loka ulwa lwito lwako. ⁵ Sona alipo u Mwene weka, ulwitiko loka, ulozyo loka, ⁶ sona nu Chala weka sona nu Baba wa vyonsi, yo wabumalilo mu vyonsi sona ukwendela vyonsi sona na muvyonsi. ⁷ Mu wensi wa uswe ichisa chipeghiwe ukuyana ni chipimo cha chabupi cha Kilisitu. ⁸ Vili ngati mo amazwi ghakunenela ukuti: ''Bo akukwela kumwanya, akabasenda abazya ukuya nabo ku buzya sona akabapa abanthu ivyabupi.'' ⁹ Iching'anamulo chakuti choni ukuti ''umwene akakwela,'' kokuti yuyo akanda tasi isika kubuyo bwa pansi nkani? ¹⁰ Umwene yuyo yo akisika we munthu yo ayanite bwaka na yuyo yo akakwela pa vyonsi ku mwanya, ukuti akwanisye ivinthu vyonsi. ¹¹ U Kilisitu akabapa bamo ukuba bapositoli, bamo ukuba bakunguluka, bamo ukuba balumbilili, sona bamo ukuba baputi sona na bamanyisi. ¹² Akabapa imbombo iyi umwa kubayania abanthu aba Chala abaswepu ku mbombo ya bubombeli, pakuzenga umubili wa Kilisitu. ¹³ Akabukilila pakuzenga umubili wache mpaka po uswe twafikapo mubupoka bwa lwitiko na mubumanyi ubwa Mwana wa Chala, sona nukuti tube swe bakuzi nukufika muchipimo chakwizula mwa Kilisitu. ¹⁴ U Kilisitu akutuzenga usweu kuti tutakabe swe bana abanandi bo bakuyingana yingana na mayigha nukupupuka ni mphepo, yonsi ya chimanyisyo cha banthu aba myansi bo bakubasobezya abanthu nu buchevu bwabo. ¹⁵ Mumalo mwache, pakunena nu bwanaloli mu lughano, tubaghile ukukulira mu vinthu vyonsi mu mwache yo we songo, yo we, Kilisitu. ¹⁶ U Kilisitu akuzenga umubili ghonsi, sona nukughumamatizya poka ni nkole zyonsi, sona nanthi ichigaba chonsi chikubomba poka, chikupanga ukuti umubili ghukule nukuzengiwa wene mu lughano. ¹⁷ Polelo, nkunena sona nu kusimikizya mu ivi mwa Mwene, ukuti mutakikale ngati ba panzi mo bakwikalila, mu nyinong'ono zyabo izya mwalwe. ¹⁸ Inyinong'ono zyabo zili mu chisi, sona bisabwileko ku bumi ubwa Chala chifukwa cha kusita kumanya ko kuli mu mwabo, chifukwa cha bukavu bwa myoyo yabo, ¹⁹ Bate ni nsoni sona bibikite bene mu vya mwalwe, sona babukilire ukubomba umutundu ghonsi uwa vinyonywa. ²⁰ Lori te momo mukamanyila ukuyana nu Kilisitu. ²¹ Une nkusimikizya ukuti mukivwa izyache, sona nukuti mukabuziwa mu mwache, ukuti u bwanalori buli mwa Yesu. ²² Mukabuziwa ukuti mufumye vyonsi ivya kabele ka bumi bwini ubwakale, nukuvula umunthu uwakale. we munthu uwakale yo mwivi chifukwa cha bumyansi bwache ubwa vinyonywa. ²³ Mukabuziwa ukuba bapya mu muzimu wa nyinong'ono zinu, ²⁴ sona nukuvwala umunthu umupya yo akapeliwa mu chifwani cha Chala_mu bwanalori bwa bugholosu sona nu buswepu. ²⁵ Polero, butaye ubumyansi, sona zanga wensi wa umwe anene ubwanalori nu mupalamani wache , chifukwa twebali boka weka nu munyabo. ²⁶ Mukalare sona mutakabombe imbibi. Mutakaleke izuba linjire mubukalare bwinu. ²⁷ Mutakamupe umwabi u satana. ²⁸ Yumo yo ibanga abaghile aleke pakwiba. Lori abaghile abombenge, imbombo zimo izya butuli ni nyobe yache, ukuti abe na chimo ichakugabana na babo bo bakulonda ukutuliwa. ²⁹ Mutakaleke mumilomo mwinu mufume ineno yimo imbibi. Mubonvwe amazyu ghagho ghabutuli nu buzengi ku banji, ukuyana ni vyakulondiwa vyabo, ukuti amazyu ghinu ghabe gha butuli ku bonsi bo bakubivwa umwe. ³⁰ sona mutakaghukalalizye umuzimu ughuswepu uwa Chala, pakuti mo mumwache mo tukighaliliwa pisiku lya bupokiwa. ³¹ fumyako ilyoyo lyonsi, nu kocha kwa moyo, nu bukalare, ni vyongo, na madinko, sona ni chibibi chonsi. ³² Mubenge ni chisa ku weka nu yunji, aba moyo ughutonsu, ukuhobokela weka nu yunji, ngati mumo u Chala akaba hobokela umwe mwa Kilisitu.