¹ Pachifukwa ichi Une, Paulo, ne mupinyiwa wa Kilisitu Yesu pa umwe mwe ba panzi. ² nkhusubila ukuti mwivwile ukuti amphile imbombo mu chisa cha Chala yiyo mpheghiwe ku kwinu. ³ Indi pakusimba ukuyana nu buvumbuzi bo bumanyikwizwe kukwane. izi zyakufisiwa zya nalori zivyo panandi bwaka nkabasimbila umwe. ⁴ Bo mukubelenga ukuyana nizi, muzukuzyaghania ukuti une nkuzimanya izya kuvwama izya bwanalori ukuyana nu Kilisitu. ⁵ Mu mphapwa iyinji ubwanalori ubu butakamanyikwa mu bana ba munthu. Lori ulu buvumbuliwe ukwendela mu muzimu mu ba positoli sona na muba kunguluka bo bakabikiwa mu mbombo iyi. ⁶ Izya kufisiwa zya nalori zyakuti aba panzi ba mphyana banyitu, sona banyitu ba mubili, sona bakugabana nuswe amalaghano mwa Kilisitu Yesu ukwendela mu bulumbilili. ⁷ Pakuti Une nkaba ne muzya wa bulumbilili mu chabupi cha Chala muchisa cho chikapewa kukwane ukwendela mukabombele ka maka ghache. ⁸ Ku kwane- napo Ne munandi nkani ku banthu bonsi aba Chala abaswepu- ichisa ichi chipeghiwe, uku lumbilila ku ba panzi ni zya bukabi bobute ni mphaka mwa Kilisitu, ⁹ nukuti nkuzukuleta ubwelu ku munthu wensi mu lubatiko -na muvyakuvwama mutubalilo twa Chala, yo akapera ivinthu vyonsi. ¹⁰ Imbatiko izi zikiza zyamanyikwa ukwendela mu chalichi po abalamulili na ba mazaza ku malo gha kumwanya bize bamanye amahala gha Chala kosi-kosi. ¹¹ Izi zikabombiwa ukuyana na mukasi mwa mbatiko zyo akayanizyana nkanila mwa Kilisitu Yesu u Mwene witu. ¹² Pakuti mwa Kilisitu tuli ni chikanga sona nakabele ka kusubila chifukwa cha lusubilo lwito lo tulinalo mu mwache. ¹³ Polero Nkubabuzya umwe ukuti mutakabe bakugongowesiwa chifukwa cha vyo nkutamiwa ku mwinu, bubo buchindamu bwinu. ¹⁴ Pa chifukwa Nkhufugamila ivimphemvu kwa Baba, ¹⁵ ukufuma mu nyumba yonsi kumwanya sona napachisu cho chineniwe . ¹⁶ Nkwiputa ukuti abape umwe, ukuyana nu bukabi bwa buchindamu bwache, nukubakazya na maka ukwendela mu muzimu wache, gho ghuli mu mwinu. ¹⁷ Nkwiputa ukuti u Kilisitu ikale mukasi mu myoyo yinu ukwendela mu lwitiko, ¹⁸ nukuti mwisimike ni migululuzi sona nukuti mwikale mu lughano lwache ni fundo yakuti mube mwe bakwivwisya, poka na bonsi abanthu ba Chala abaswepu, mu bufupi, na mu butali, mu bukulu na mukudwiba, ¹⁹ sona nukumanya ulughano lwa Kilisitu, lo lupululire amahala, ukuti mwizuziwe nkani mwa Chala. ²⁰ Po ulu mwa yuyo yo abaghile ukubomba ukupululizya bonsi bo tukulalusya olo tukwinong'ona, ukuyana na maka gho ghakubomba mu mwitu, ²¹ ku kwache kube ubuchindamu mu chalichi sona na mwa Kilisitu na ku mphapwa yonsi bwila na bwila. Amen.