¹ Polero mweghelere kwa Chala, pakuba mwe bana bache abaghaniwa bwila. ² sona mwende mu lughano, ngati mo u Kilisitu atughanile uswe sona nukwiyipa mwene ku kwitu, nukwiyipa ukuba chabupi chakununkila sona nu kwipeleka kwa Chala. ³ Lori kula kutakabe nakumo ukusakiziwa pakasi pinu ivya bwamalaya pamo ubunyazu buli bonsi pamo ubupafu, pakuti ivi tevyakubaghila ku banthu abaswepu aba Chala. ⁴ Za sona mutakanenenge ivya masiku, nineno iyabupunganu, sona ni vyansunga- vyonsi vyo vitabaghile. Mumalo mwache munenenge izya kupalizya ukupa. ⁵ Mube nu bwanalori bwa ichi, ukuti kutakabeko ubwamalaya, umunyazu, pamo umunthu umupafu-kokuti, munthu yo akwiputa ivifwani-atazukupyana ubu mwene ubwa kumwanya ubwa Kilisitu sona nu Chala. ⁶ Patakabepo nayumo uwakuti abapusike na mazyu gha bwaka, pa chifukwa cha vinthu ivi ubukali bwa Chala bukwiza pa banaabasita kwivwila. ⁷ Polero, mutakamanyane nabo abanthu abo. ⁸ Pakuti numwe mukaba muchisi, Lori ilero muli mubwelu mwa mwene. Enda ngati bana ba ⁹ (Pakuti inseke zya bwelu zyozyo zikwaghiwa mu vinthu vyonsi iviza, ubugholosu, sona nu bwanalori), ¹⁰ sona mulonde vyo vikumuhobosya u Mwene, ¹¹ Mutakabungane nabo inseke zyabo zya mu chisi, lori mumalo mwache mubavunbule. ¹² Pakuti cha nsoni nako kuvumbula ivinthu vyo bakubomba umwa kuvwama. ¹³ Lori nanthi chonsi chavumbuliwa nu bwelu, chikuba chakubonekela. ¹⁴ Pakuti chonsi cho chabonekela bo bwelu. Polero zikunenwa ukuti, ''nyamuka, wakughona uwe, sona zyuka kubakufwa, sona u Kilisitu azukubala papako.'' ¹⁵ Mulingisye akiza momukwendela - mutakende ngati basita mahala lori mwende ngati ba mahala. ¹⁶ Bombezya akabalilo chifukwa amasiku gha bibi. ¹⁷ Polero, mutakabe bapunganu, lori mwivwisye ubwighane bwa Mwene mo bubelire. ¹⁸ Sona mutakakolwe nu bwalwa, pakuti ukukolwa kukunanga inkalo. Mumalo mwache, mwizule nu muzimu ughuswepu, ¹⁹ nena kwa weka nu yunji ni nyimbo zya masalimo nukumukwezya sona ni nyimbo zya buzimu, imbanga nukumupala u Mwene ni myoyo yinu yonsi, ²⁰ akabalilo konsi mupe nukusalifya pa chilichonsi, mwizina ilya Mwene witu Yesu Kilisitu kwa Chala u Baba, ²¹ Mwivyanenge mwebene weka nu yunji pakumoghopa u Kilisitu. ²² Mwebakazi, mwivwile abalume binu, ngati movibelire nu Mwene. ²³ Pakuti umulume mutu wa mukazi ngati u Kilisitu wepe we mutu wa chalichi, sona u Kilisitu umwenentcho mupoki witu. ²⁴ Lori ngati mo i chalichi likwivwila u kilisitu, mo nabakazi babaghile ukwivwila ku balume mu vyonsi. ²⁵ Balume, ghana abakazi binu, ngati mo u Kilisitu akachighanila ichalichi sona nu kwiyipa mwene chifukwa chache. ²⁶ u Kilisitu akiyipa mwene ku chalichi ukuti achipange mwene ukuba chiswepu, ukuba chakusukiwa na minzi nizyu, ²⁷ ukuti ibonesyele mwene ngati chiswepu, ichisita akatonyelwe, ni chisita amankwinya, pamo akanthu kamo akabibi, lori chiswepu sona nachochite ni chilema nachimochimo. ²⁸ Munzila ngati iyi balume baghane abakazi binu na mulwinu ngati mibili yinu. Yuyo yo amughanite umukzi wache ighanite mwene. ²⁹ Pakuti patalipo nayumo yo aghubengite umubili wache, lori akulipwelelera nukulisunga akiza, ngati mo u Kilisitu akulisungila nukulipwelelera akiza ichalichi, ³⁰ chifukwa twe vigaba vya mubili wache. ³¹ Pachifukwa ichi u mwanalume azukumuleka uwise sona nu nyina nukuba poka nu mukazi wache, po babili bazuka mubili ghoka.'' ³² ichakufisiwa ichi chikulu- lori nkunena izya Kilisitu sona ni zya chalichi. ³³ lori, wensi wa umwe abaghile aghane umukazi wache ngati mo ighanile mwene, sona umwanakazi abaghile achindike umulume wache.