¹ Polelo, u Kilisitu akayimba ku mubili, numwe mubaghile mwiyanie mwebene na minong'ono ngati aghanyene pakuti wensi yo akuyimba ku mubili alekite imbibi. ² Polelo, umunthu waluko ulu pakabalilo kache konsi aka ku mubili, atakuba ni vinyonywa vya banthu, loli mubwighane bwa Chala. ³ Pakuti akabalilo ko kendapo kali kakulu nkhani kukwinu pa kubomba ubwighane bwa kunzi ukwikala mu vinyonywa. ⁴ Pakwinong'ona ukuti vya chilendo pakuti mutakubakonkha mukufulukila kwa nkhalo izibibi, po bakunena ububibi bwa umwe. ⁵ Bakwiza ukumupa ichuma kwa yo iyanizye ukulonga ivya bumi sona ni vyabufwe. ⁶ Pa mbombo iyi amazwi ghalumbililiwe sona na ku bafwe, ukuti, napo balongiwe ku mubili ngati banthu, bangize bikhale mu muzimu ngati mo u Chala akubombela. ⁷ Ubumalilo bwa vinthu vyonsi buli papipi. Polelo mube bakwinong'ona akiza, sona mube bakwikola mu nyinong'ono panongwa ya kwikola mu nyiputo. ⁸ Pamwanya pa vinthu vyonsi, mube nu lughano ulwenecho kwa weka nu yunji, pakuti ulughano lukwighalila imbibi izyinji. ⁹ Mupokelelanenge weka nu munyantche ukusita ukunyinyilika. ¹⁰ Ngati mo wensi mwa umwe akupokela ichabupi, bomvyani ukuti mwavwane weka nu munyantche ngati babombi ba chisa cha Chala mu nzila izyakulekanalekana. ¹¹ Nanthi yumo akunena, abe na mazwi gha Chala. Nanthi yumo akwavwa, kube kwa maka gha Chala gho akupa. Bomba ivinthu ivi ukuti mu nzila zyonsi u Chala akweziwe ukwizila mwa Yesu Kilisitu. Kwa Yesu Kilisitu kube ubuchindamu na maka bwile na bwile. Ameni. ¹² Baghaniwa, mutakachisenye ngati cha chilendo pakuyezya mu moto po vimo vyababonekela umwe, ngati chimo icha chilendo chikabombiwanga kukwinu. ¹³ Mu buyo bwache, mo mukukomanila nako ukuyimba kwa Kilisitu muhobokenge nkhani, pakuti numwe mungize musekelele nanthi ubuchindamu bwache bwaba pa bwelu. ¹⁴ Pala mukutukiwa pizina lya Kilisitu, mwebasayiwa, chifukwa uMuzimu wa buchindamu nu Muzimu wa Chala ghukutuzya mumwinu. ¹⁵ Loli muleke nayumo mwa umwe ayimbe pakuba wakukoma,umwivi, uwakubomba imbibi,pamo uwakwinjilila pa nkhani zya banyabo. ¹⁶ Nanthi yumo akuyimba ngati we mu Kilisitu, muleke atakabe ni nsoni; mumalo mwache, muleke amupale u Chala mwizina lilanyene. ¹⁷ Pakuti ko kabalilo ka kulongiwa kwande mu nyumba ya Chala. Nanthi kukwanda nuswe, ka ichakukonkhapo chochoni ku bo batakwivwila amazwi gha Chala? ¹⁸ Sona ''pala chitamye nkhani ku bagholosu ukuti bapokiwe, ka po inthi chize chibe bulibuli ku yo atakwiputa pamo ku munanzi?'' ¹⁹ Po bo bakuyimba chifukwa cha bwighane bwa Chala babike ukusubila mu mizimu nu lwitiko mwa mupeli mukubomba akiza.