¹ Munzila iyi, umwe mwe mwebasendwe mwivwile abalume binu. Bomba ichi napo abanalume bamo batakwivwila izwi, napo te lizwi, banagapokiwa ni nkhalo ya banakazi babo. ² Pakuba bakamboni bakwilingilila abankhalo zinu, inkhalo iyiza. ³ Vitakabombwe na kabonekele ka kumubili ngati ukuluka isisi, amabwambo agha golide, pamo imyenda iyiza hee. ⁴ Mubuyo bwache, vibombiwe nu bunthu ubwenecho bwa bwiza ubwabumalilo ubwa wamahala nu muzimu uwakufwasa mukasi bo bwiza hee pa maso gha Chala. ⁵ Pakuti umu momo abanakazi abaswepu abakale bo bakusubila mwa Chala bakabombelanga, pa kubivwila abalume babo. ⁶ Munzila iyi, u Salayi akamwivwila u Abulahamu nukumwitizya ukuti we mwene wache. Po mwebana bache, pala mukubomba cho chiza sona napala mutakupasya nizya nthamyo. ⁷ Munzila yinonyene, mwebanalume umwe mwikale na banakazi binu ukuyana nukwivwisya, ngati mbale iyibovu, umwanakazi. Mupange intchindi ngati ba pamwanya abanyinu aba chisa cha moyo. Bomba ichi uuti iviputo vinu vitakapinjiwe. ⁸ Pabumalilo, mwebonsi, muyane mu nyinong'ono, abachisa, bakughanana ngati ba wamwabo, ba moyo uwa kufwasa nu wa kwiyisya. ⁹ Mutakanyosye imbibi ku mbibi pamo inthusi ku nthusi. Umwakwiyania, mupululizye pakusaya , chifukwa pa ichi mukitikiziwa, ukuti mupyane ulusayo. ¹⁰ Bonsi bo bakulonda ukughana ubumi sona nukulinga amasiku aghiza alesye ululimi lwache ku bibibi sona nululimi lwache pakunena ubumyansi. ¹¹ Afumeko ku chibibi po abombe cho chiza alondelonde umutende nukughukonkha. ¹² Aminso gha Mwene ghakulinga aghaagholosu, sona na makutu ghache ghakwivwa inyiputo zyabo . Loli icheni cha Mwene yikulimbana nabo pa kubomba imbibi.'' ¹³ Ka angaba wewenu yo angabanangania umwe pala mukulonda hee ukubomba iviza? ¹⁴ Loli pala mukuyimba chifukwa cha bugholosu, mwebwsayiwa. Mutakoghope vyo bakoghopa. Mutakatamiwe mu myoyo yinu. ¹⁵ Mumalo mwache, bikani ubu Mwene u Kilisitu mu myoyo yinu ngati baswepu. Akabalilo konsi mube bakwisengania pakusimikizya kwa wensi yo akulalusya izya lusubilo lwinu lo mulinalo. ¹⁶ Nanga buli umwakwiyisya sona intchindi. Mumanye ivyakubomba ukuti abanthu bo bakutuka ubumi bwinu ubwiza mwa Kilisitu bakoziwe insoni chifukwa bakunena ivibibi izya umwe ukuti ngati mwe babomba mbibi. ¹⁷ Chingaba akiza nanthi bungaba bwighane bwa Chala, ukuti muyimbe chifukwa cha kubomba ichiza nukulusya ukubomba ichibibi. ¹⁸ Nu Kilisitu wepe akanyala lumo ni mbibi. Yo mugholosu akatuyimbila, swe te swe bagholosu, ukuti atubike kwa Chala. Akakomiwa ku mubili, loli akabikiwa mumi nu Muzimu. ¹⁹ Ukwizila mwa Muzimu , akabuka nukulumbilila ku mizimu yo pano yili mu jele. ²⁰ Batakaba bakwivwila po ukufwasa kwa Chala kukabalindilila mu masiku gha Nowa. Mu masiku gha kuzenga ingalaba, po u Chala akabapoka abanandi bwaka--imizimu eyiti----mu nzila iya minzi. ²¹ Ichi chocho chimanyisyo cha lozyo lo lukubapoka umwe pano --- te pakuti mozye ubufite mumibili yinu haa, loli ngati kulongiwa ukwa mbombo iziza kwa Chala--ukwizila mu kuzyuka kwa Yesu Kilisitu. ²² U Kilisitu ali ku nyobe ya ndyelo iya Chala. Akabuka kumwanya . Abangelo, amazaza na maka vibaghile vimulambile umwene.