¹ Baad dak kan fi Eid ta Yahud, Yesuah ruwa lahadi fi Orshelim. ² Hinak fi Orshelim fi bab ta jena koruf, fi biir bi nadi be rutan ta Ebranin Bet hasda, fi fogo kamsa rokubat. ³ Nas ayanin kutar, amiyanin, moshlulin kan bi num hinak. humon bi istena ashan miten moyo ta biir de bi hariku. ⁴ Ashan malika baad marat bi ja nenzil wa bi hariku moyo de. zol al bi nenzil nimira wahid wa bi lemesu moyo ta biir de bi ligo ilaj. ⁵ Fi zol hinak ayan tamaniya teletin sena. ⁶ Wokit Yesuah aynu huwonaim tehet hinak, Huwo baad ma lahiz gali zol de indu zaman ketir, Huwo bada kelim le zol de "Inta der ligo ilaj?" ⁷ Zol ayan de juwabu gali, "Ya seid, ana ma indi zol bi arfa ana fi juwa biir de kan hariku moyo de. Kan ana bi hawil ashan bi ja, zol tani bi jere guwam wa bi dakalu gidam tai." ⁸ Yesuah kelim le huwo, "Gum fok, shilu serir taki, wa amshi." ⁹ Tuwali zol de ligo ilaj, huwo arfa serir bito wa huwo furu. De kan yom sebit. ¹⁰ Nas Yahudin kelim le huwo al ligo ilaj de, "De yom sebit inta ma indak hak ashan bi arfa martaba taki" Huwo juwabu, ¹¹ "Al wodi le ana ilaj de Huwo kelim le ana, Shilu serir taki wa amshi." ¹² Humon asalu huwo, "Zol al kelim le inta , shilu serir taki wa amshi de Huwo munu?" ¹³ Almohim bes, zol al ligo ilaj de huwo ma arufu kan de munu ashan Yesuah futu min humon, kan fi zahma ta nas fi mahal de. ¹⁴ Baad zaman tani, Yesuah ligo huwo fi kenisa wa kelim le huwo, "Aynu, saha taki biga kuwes! mata amulu katiya tani mar, ashan kede haja batal kalis ma hasil le inta." ¹⁵ Zol de gum min hinak wa ruwa wori le nas Yahudin gali de kan Yesuah yau aliju huwo ¹⁶ Ashan kida Yahudin bi fetisu ashan bi katulu Yesuah, ashan Huwo amulu haja de fi yom sebit. ¹⁷ Yesuah juwabu humon, "Abu tai bi ishtakal lahadi hasa de, wa Ana kaman bi ishtakal." ¹⁸ Ashan kida, Yahud kan bi fekir shedid ashan bi katulu huwo ma ashan Huwo kasuru yom sebit, lakin kaman ashan Huwo kelim Allah Abu bito, wa Huwo kutu jisim bito sawa ma Allah ¹⁹ Yesuah juwabu humon, "Hagiga, hagiga, Jena ma bi agder amulu haja min nefsa bito, Ile bes al Huwo bi aynu Abu bi amulu, Ai haja al Abu bi amulu, Jena bi amulu hajad de kaman. ²⁰ lanu abu bi hibu jena hou bi wori le hou kulu hajat alhou bi amulu, wakamanbi wori le hou hajat al azim ashan itakum bi estagrab. ²¹ lanu ze ma abu bi gomu meatin wa bi wodi le homon haya, kaman jena bi gomu ze ma hou der. ²² Lanu abu ma bi hakimu ai zol, lakin hou wodi hokum kolu le jena. ²³ Ashan kulu nas bi akrimu jena ze ma homon bi akrimu abu. zol al ma bi akrimu jena hou ma bi akrimu abu al rasolu hou. ²⁴ hagiga, hagiga, ana bi kelim le itakum zol al bi asuma kalam tai wa bi amin be zol al rasolu ana hou bi kun endu haya abadia wa hou ma bi ruwa fi hukum, lakin hou bi kun intagal muto le haya. ²⁵ hagiga, hagiga, ana bi kelim le itakum fi zaman bi ja,wa yau de hasa, nas al mutu bi asuma sot ta jena ta Alla, wa del al bi asuma homon bi hai. ²⁶ ze ma abu endu haya fi nefsu, kaman hou wodi le jena bi kun indu haya fi nefsa, ²⁷ wa abu kaman wodi sulta le jena ashan bi hokumu ashan hou jena insan. ²⁸ matakum istagrab, ashan fi zaman bi ja kulu nas al fi gubur bi asuma sot Bito ²⁹ wa bi tala bar: del al amulu kuwes bi gum le haya, wa del al amulu batal bi gum le hukum. ³⁰ Ana ma bi agder amulu haja be nefsa tai, ze ma ana bi asuma, ana bi hukumu,wa hukum tai adil lanu ana ma bi amulu irada tai lakin irada ta abu al rasulu ana. ³¹ Iza kan ana bi shahid le nefsa tai shehada tai ma hagiga. ³² fi zol tani al bi shahid le ana, wa ana arufu gali shehada al hou bi shahidu le ana de hagiga. ³³ rasulu itakum le youhana, wa hou wodi shehada al hagiga. ³⁴ lakin ana ma bi gabilu shehada ta insan. lakin ana kelim kalam de ashan itakum bi ligo kulasa. ³⁵ youhana hou kan lamba al walau wa bi lama wa itakum rudu ashan bi kun frhanin be nur tou saa. ³⁶ lakin shehada al ana endu ahsen min ta yuhana, ashan shokol al abu wodi le ana ashan bi kemilu, shokl de be wori gali abu yau rasulu ana. ³⁷ Abu al rasulu ana kaman bi ashad le ana. intakum ma asuma sot bito wole aynu shikil bito. ³⁸ Wa kelima bito kulu kulu ma sabit fi inakum, ashan intakum ma amin fi zol al Huwo rsaulu. ³⁹ Fetisu takum al kutub ashan intakum bi fekir gali intakum bi ligo fogo haya abadia, wa kutub del bi ashad le ana. ⁴⁰ Wa intakum aba ja le ana ashan bi ligo haya. ⁴¹ Ana ma bi rudu mejid min nas. ⁴² Lakin, ana aruf gali intakum ma indu muhaba ta Allah fi nufus takum. ⁴³ Ana ja be isim ta Abu, wa intakum ma rudu ana. kan zol tani yau ja be isim bito braw intakum bi rudu. ⁴⁴ Kef intakum bi amin, intakum, al bi rudu mejid min baad bitakum wa intakum ma bi fetisu mejid al jai min Allah ⁴⁵ Matakum fekir gali Ana bi ishteki intakum gidam ta Abu. Wahid al bi ishteki intakum de yau Musa, ashan intakum kutu raja bitakum le huwo. ⁴⁶ kan intakum amin be Musa kaman intakum bi agder amin be Ana, ashan huwo katibu an Ana. ⁴⁷ kan intakum ma sedek kitaba bito ?"kef intakum bi sedek kalam tai