¹ Wokit Yesuah aruf gali nas ferisin asuma gali Huwo shakal wa bi amidu nas kutar min Yuhana, ² Zatu Yesuah kan ma bi wodi mamudia, de talamiz Bito, ³ Huwo sibu Yahudia wa rija tani wara le Jelil. ⁴ Kan mohim le Huwo ashan bi mururu min Samira. ⁵ Huwo ja fi medina ta Samira, isim bito Sokar, gerib ma mahal al kan Yakub wodi le jena bito Yusif. ⁶ Biir ta Yakub kan fi hinak. Yesuah biga taban min safar Bito wa geni fi biir dak. De kan biga ze saa sita. ⁷ Fi mara Samiria ja ashan bi shilu moyo, Yesuah kelim le hia, "Wodini moyo kede ana ashrab." ⁸ Ashan kan talamiz Bito ruwa jibu akil fi medina. ⁹ Mara ta Samiria de kelim le Huwo, "De bi hasil kef, Inta Yahudi, bi asalu ana Samiria?" Ashan mafi tifagia fi nus ta Yahudin ma Samirin. ¹⁰ Yesuah juwabu wa kelim le hia, "Kan sei inta aruf hadia ta Allah, wa de munu al bi kelim le inta, wodini moyo kede ana ashrab, inta kan asalu ashan kede Huwo wodi le inta moyo al hai." ¹¹ Mara de kelim le Huwo, "Ya seid, Inta ma indak haja al bi gatau be moyo, wa kaman biir de juwa kalis. Inta ligo moyo al hai de min wen? ¹² Inta ma ahsen min abu ta nina Yakub, al wodi le nina biir de ashan nina bi ashrab min fogo, ze kan huwo ashrab min fogo huwo wa iyal bito wa bagarat bito." ¹³ Yesuah juwabu wa kelim le hia, "Ai wahid al bi ashrab min moyo de bi tala atshan tani mara, ¹⁴ Lakin al bi ashrab min moyo al ana bi wodi le huwo ma bi tala atshan tani mara. ashan moyo al ana bi wodi le huwo de bi tala mahal al bi dofugu moyo ta haya abadia fi juwa jisim bito." ¹⁵ Mara de bada kelim le Huwo , "Ya seid, wodini moyo de ashan tani kede ana ma tala atshan wa ja shilu moyo min hini." ¹⁶ Yesuah kelim le hia. "Amshi, nadi rajil bitak, wa taal hini." ¹⁷ Mara de juwabu wa kelim le Huwo, "Ana ma indi rajil." Yesuah tani juwabu hia, "Sah kalam al inta kelim, Ana ma indi rajil." ¹⁸ Ashan inta indak khamsa rujal, wa rajil al hasa fi ma inta de ma rajil bitak. Kalam al inta kelim de sah." ¹⁹ Mara de kelim le Huwo, "Ya seid, Ana bi aynu kaanu Inta nebi. ²⁰ Abuhat ta nina kan bi seli fi ras jebel de, lakin Inta kelim gali Orshelim yau mahal al nas bi seli fogo." ²¹ Yesuah kelim le hia, "Sedeg Ana ya mara, fi zaman bi ja al intakum ma bi seli Allah al Abu fi ras jebel de wele fi Orshelim. ²² Intakum bi seli le haja al intakum ma aruf, wa nina bi seli le al nina aruf, ashan kulasa bi ja min Yahudin. ²³ Ashan kida, fi zaman jai, zaman de wosulu kalas, nas al hagigin bi seli le Al abu fi roho wa fi hagiga, ashan al Abu deir ze nas del bikun nas al bi seli le Huwo. ²⁴ Allah Roho, wa nas al bi seli le Huwo lazim kede seli be roho wa be hagiga." ²⁵ Mara de kelim le Huwo, "Ana aruf Masiya bi ja (al bi nadi Mesih). kan Huwo ja, huwo bi wori kulu hajat le nina." ²⁶ Yesuah kelim le hia, "Ana yau Huwo, al bi wonusu le inta." ²⁷ Fi lahza dak talamiz Bito wosulu, Humon kan mustagrabin leh Huwo kan bi wonusu ma mara de, lakin mafi wahi agder kelim, "Inta deir shunu?" wole "Leh Inta bi wonusu ma hia?" ²⁸ Min hinak mara de sibu jerdel moyo bito, wa jere fi medina, ashan bi wori le nas, ²⁹ Taal takum, aynu takum fi zol wori le ana ai haja al ana amulu, De sei ma al Mesih?" ³⁰ Humon bada jere min medina hinak wa ja le huwo. ³¹ Fi zaman de talamiz kan bi asalu Huwo, gali, "Ya mualim, akulu." ³² Lakin Huwo kelim le humon, "Ana indi akil al ana bi akulu intakum ma bi aruf." ³³ Talamiz bada kelim le badu, "Bikun fi zol jibu akil le Huwo?" ³⁴ Yesuah kelim le humon, "Akil bitai amulu meshia ta Zol al rasulu Ana wa ana bi timu shokol Bito. ³⁵ Musu intakum bi kelim gali, baad arba shuhur bi ja zaman ta hasad? Ana bi kelim le intakum, arfa takum uyun bitakum fok wa aynu takum, mahal zara biga jahis deir nadafa, ³⁶ Zol al bi nedifu bi ligo ujura bito, wa bi limu simar le haya abadia, ashan biga zol al zarau wa zol al nedifu bi kun farhanin sawa. ³⁷ Ashan zede bi sedeku kalam al gali, "Wahid bi zara, wa tani bi nedifu." ³⁸ Ana rasulu intakum ashan bi nedifu haja al intakum ma taban fi shokol bito, Nas tanin yau ishtakal, wa intakum ja dakalu fi shokol tomon. ³⁹ Ketir min nas ta Samira fi medina dak aminu be Huwo, ashan kalm shuhuda al mara de kan bi wori. " Huwo wori le ana ai haja al ana amulu." ⁴⁰ Woki biga nas ta Samira ja le Huwo, humon kan der ashan kede Huwo geni ma humon, wa biga Huwo geni hinak yomen. ⁴¹ Nas tanin ketir aminu min kalm Bito. ⁴² Humon kelim le mara de, "Nina ma aminu ashan kalm al inta kelim, lakin ashan kaman nina asuma , wa nina arufu gali De yau Mukalis ta dunia hagiga." ⁴³ Bad yomen de, Huwo gum ruwa le Jelil. ⁴⁴ Ashan Yesuah zatu kelim gali nebi ma bi rudu fi beled bito. ⁴⁵ Wokit Huwo dakalu fi Jelil, nas ta Jelil rahibu Huwo. Ashan humon aynu mojizat kulu al Huwo amulu fi Orshelim zaman ta Eid, ashan humon kan ruwa fi Eid. ⁴⁶ Kaman tani Huwo riga fi Kana fi Jelil, mahal al Huwo gilibu moyo merisa. Hinak fi kadam melik jena bito ayan shedid fi Kafranahum. ⁴⁷ Wokit huwo asuma gali Yesuah ja min Yahudia te Jelil, huwo ruwa nadi Yesuah ashan kede ja aliju jena bito, al kan biga gerib bi mutu. ⁴⁸ Yesuah kelim le huwo , "ille kan intakum aynu mojizat wa ajaib, yau intakum bi aminu." ⁴⁹ Kadam ta melik kelim le Huwo, "Ya seid taal gubal jena tai ma mutu." ⁵⁰ Yesuah kelim huwo, "Amshi, Jena bitak hai." Zol de sedek kalam Yesuah kelim le huwo, wa huwo futu. ⁵¹ Wokit huwo mash, kadamin bito ligo huwo, wa kelim le huwo gali jena bitak hai. ⁵² Huwo asalu zaman al jena de bada tala kews fogo. Humon juwabu huwo, "Umbari saa saba humma fat min huwo." ⁵³ Abu de fahim de yau zaman al Yesuah kelim le huwo. "Jena bitak hai." Biga huwo wa nas bet bito kulu aminu. ⁵⁴ De kan mojiza nimira itnin Yesuah amulu wokit Huwo .tala min Yahudia le Jelil