¹ Kan fi zol min nas ta Ferisin isim bito Nikodimos, huwo reis bita Yahudin. ² Zol de ja le Yesuah bilel wa kelim le Huwo, "Ya mualim, nina aruf gali Inta Mualim ja min Allah, ashan mafi zol bi agder amulu hajat al Inta amulu de ile kan Allah fi ma huwo." ³ Yesuah juabu huwo, "Hagiga, hagiga, zol kan ma weledu min jedid, huwo ma bi sufu molokut ta Allah." ⁴ Nikodimos kelim le Huwo, "Kef bi weledu zol kan biga huwo ajus? Bi agder dakalu huwo tani mara fi batna umma bito wa bi weledu huwo tani min jedid? ⁵ Yesuah juabu, "Hagiga, hagiga, ile kan weledu zol min moyo wa Roho, huwo bi agder dakalu fi molokut ta Allah. ⁶ Dak al kalas weledu fi jisim huwo biga jisim, wa al weledu fi Roho huwo roho. ⁷ Mata istagarab Ana kelim gali lazim kede weledu inta min jedid. ⁸ Habub bi dowru ze huwo der. inta bes bi asuma sot bito, lakin inta ma bi aruf huwo jai min wen wa bi ruwa wen. Kaman zede ai zol al weledu min Roho." ⁹ Nikodemos juwabu wa kelim le Huwo, "Hajat del bi hasil kef?" ¹⁰ Yesuah juwabu huwo gali, "Inta mualim bita Israiel , wa kaman lisa inta ma fahim hajat de? ¹¹ Hagiga, hagiga, Ana wori le inta, nina bi wonusu haja al nina arufu, wa nina bi shahidu le haja nina sufu. Lakin lisa intakum ma bi sedeg shihada bita nina. ¹² Kan Ana kelim hajat ta dunia wa intakum ma sedeg, intakum bi sedeg kef kan biga Ana wori hajat ta Sama le intakum? ¹³ Mafi wahid futu fok fi Sama ile De al nenzil min Sama - Jena Insan. ¹⁴ Ze Musa kan arfau debiba fi sahara, kaman Jena Insan bi arfau fok. ¹⁵ ashan ai zol al aminu fi Huwo bi ligo haya abadia, ¹⁶ Yau zede Allah hibu dunia, lahadi Huwo rasulu Jena Bito al wahid, ashan ai zol al kan aminu fi Huwo ma bi mutu lakin bi ligo haya abadia. ¹⁷ Ashan Allah ma rasulu Jena Bito fi dunia ashan bi ja hukumu dunia, lakin ashan bi kalisu dunia be wasat Huwo. ¹⁸ Al aminu be Huwo ma bi hukumu, lakin al ma aminu be Huwo bi hukimu ashan huwo ma aminu fi isim ta Jena ta Allah al wahid. ¹⁹ De yau sabab le al ekab; Nur ja fi dunia, wa nas hibu duluma ketir min Nur ashan amail tomon batal. ²⁰ Ashan ai wahid al bi amulu hajat batal bi akrah Nur wa ma bi ja fi Nur ashan kede ma beinu fadia ta hajat bito al batal. ²¹ Ashan kida, al bi amulu Hagiga bi ja fi Nur ashan amail bito bi beinu huwo amulu fi Allah. ²² Wa baad de, Yesuah ja ma talamiz Bito le beled ta Yahudia, wa geni ma humon hinak wa kan bi wodi mamudia. ²³ Kaman kan Yuhana bi wodi mamudia fi Ena nun gerib min Salim ashan ken moyo fi hinak ketir nas bi ja akudu mamudia. ²⁴ Ashan Yuhana kan lisa ma kutu fi sijin. ²⁵ Neng neng gum hasil fi nus talamiz ta Yuhana ma wahid min Yahudin be kalam kasil ta shokol nedif fi nizam ta Yahud. ²⁶ Humon gum ruwa le Yuhana wa kelim le huwo, "Ya mualim, zol al kan maak fi taraf ta nahar Ordun, al inta kan shhidu be kalam Bito de, Huwo fi bi wodi mamudia wa nas kutar bi ja le Huwo." ²⁷ Yuhana juwabu, "Zol ma bi ligo haja kan ma wodi le huwo min Sama, ²⁸ kaman intakum bi agder shahidu gali ana kelim ana ma yau al Mesih; lakin ana rassulu gidam Bito." ²⁹ Zol al indu arusa huwo yau aris. Wa sabi ta aris, al bi wogif wa bi asuma, huwo bi kun mokosut kan huwo bi asuma sot ta aris. Zede mokosut bita timu. ³⁰ Huwo kede zidu wa ana kede nagis. ³¹ Al ja min fok, Huwo fok min nas kulu, Wa al min dunia huwo ta dunia wa bi wonusu min dunia. Wa al ja min Sama Huwo fok min nas kulu. ³² Bi agder shahidu kulu hajat al Huwo aynu wa asuma, lakin mafi wahid bi sedeg shihada Bito. ³³ Al bi rudu shihada Bito bi sbitu gali Allah hagiga. ³⁴ Ashan zol al rasulu min Allah bi wonusu kalamat ta Allah. ashan Huwo ma bi wodi Roho Bito be wozin. ³⁵ Ashan Abu hibu Jena, Huwo wodi kulu hajat fi ida Bito. ³⁶ Zol al bi aminu be Jena de bi ligo haya abadia. wa al ma aminu be Jena de, ma bi aynu haya .lakin zalan Bita Allah bi fadulu fi huwo