¹ Wa baad talata ayam, kan fi Iris fi Kana medina fi Jelil, Umma ta Yesuah kan fi hinak. ² Yesuah wa talamiz Bito nadi fi Iris de. ³ Wokit merisa kalasu, umma ta Yesuah kelim le Huwo gali, "Humon ma indu merisa." ⁴ Yesuah kelim le Hia, " Ya mara, malu inta ja le Ana? zaman bitai lisa ma ja." ⁵ Umma Bito kelimu le kadamin de, "Ai haja Huwo bikelim le intakum, amulu takum. ⁶ Kan fi hinak sita aziar min hajer al bi istamilu le kasil ta shokol nedif fi nizam ta Yahud, ai wahid bi shilu godur itnin aw talata mitirat. ⁷ Yesuah kelim le kadamin del , "Malau takum aziar del be moyo." Humon malau lahadi fok. ⁸ Wa baad dak Huwo kelim le kadamin del, "Shilu tani wodi le reis ta hafla de." Humon amulu kaman. ⁹ Reis ta hafla de jeribu moyo de al gilibu biga merisa, lakin huwo ma aruf jibu min wen (Lakin kadamin del yau aruf). Huwo nadi Aris ¹⁰ wa kelim le huwo, "Nas kulu bi bada be wodi merisa al tamam awel le difan. yala biga tanin del bi ja wodi wara kan nas sekeranin. Lakin inta dusu merisa al tamam de lahadi hasa." ¹¹ De kan awel mojiza Yesuah amulu fi kana ta Jelil, Huwo beinu mejid bito, wa talamiz aminu be Huwo. ¹² Baad dak Yesuah, wa umma Bito, wa akuwana Bito ruwa tehet le Kafranahum wa humon geni hinak ayam besit. ¹³ Woki biga zaman Eid Faska gerib, Yesua ruwa fok le Orshelim. ¹⁴ Huwo ligo tujar ta bagarat wa ta ganamayat wa bita hamamat, wa nas ta bidalu gurush gaidin hinak. ¹⁵ Huwo salau sot min habil wa bada turudu nas del kulu min juwa haikal, ma del ta ganamayat wa ta bagarat. Huwo dofugu gurush kulu wa gilibu tarabizat tomon. ¹⁶ Huwo kelim le nas ta biu hamamat, "Shilu takum hajat del min hini, mata takum amulu bet Abuit suk." ¹⁷ Talamiz Bito zekiri gali katibu, "Waja gelba ta bet Bitaki bi akulu Ana." ¹⁸ Baad dak nas ta Yahudin al mosulin kelimu le Huwo , "De yatu alama Inta bi wori le nina wa Inta bi amulu hajat del?" ¹⁹ Yesuah juwabu, "Demiru takum haikal de kulu, wa fi talat ayam Ana bi rija gowumu fok." ²⁰ Nas Yahudin al mosulin del kelim, " Haikal de abinu fi sita-arbein sena, wa Inta bi abinu fi talata ayam? ²¹ Lakin kan, Huwo bi gasid kelim haikal ta jisim Bito. ²² Wa baad ma Huwo gum min amuwat, talamiz bito zekiru gali Huwo kan kelim kida, humon biga aminu be al kitab wa kalam al Yesuah kelim. ²³ Wokit biga Huwo fi Orshelim fi zaman ta Eid Faska, nas kutar aminu be isim bito wokit humon aynu mojizat al Huwo ²⁴ amulu. Lakin Yesuah ma sedeg humon ashan Huwo kan bi aruf humon kews. ²⁵ wa ashan kaman Huwo ma der zol bi shahidu le Huwo .an ai zol, ashan huwo kan aruf ai haja fi insan