¹ Bedri fi awel yom ta usbu, zaman lisa duluma, Mariyam Mejdiliya ja fi turuba wa huwo aynu hajer lizu bara min turuba. ² Huwo jere wa ja le Samaan Butrus wa le telmiz al tani al kan Yesuah bi hibu, wa huwo kelim le humon. "Humon shilu Rabuna bara min turuba, wa nina ma aruf humon kutu wen." ³ Biga Butrus wa telmiz al tani ruwa bara, wa humon ja fi turuba. ⁴ Humon jere kulu sawa, wa lakin telmiz al tani de jere guwam gidam min Butrus wa wosulu fi turuba hinak awel. ⁵ Wa dengiri tehet, huwo aynu kofuna jadau hinak, lakin huwo ma dakalu juwa. ⁶ Wa biga Samaan Butrus ja wosulu baad huwo wa dakalu juwa fi turuba. Huwo aynu kofuna jadau hinak ⁷ wa gumash al kan lifu fi ras Bito. ma fi mahal sawa ma kofuna de lakin lifu fi mahal barau ⁸ Biga telmiz al tani de, al kan wosulu awel fi turuba de, kaman ja dakalu juwa, wa huwo aynu wa sedeg. ⁹ wa lahadi zaman dak humon lisa ma fahim al kitab al gali Huwo bi gum min al mot. ¹⁰ Min hinak talamiz del rija tani wara fi bet. ¹¹ Lakin Mariyam kan lisa bi wogif bara fi turuba bi kore. ze huwo lisa kan bi kore, huwo dengir tehet fi turuba. ¹² Huwo aynu itnin malaikat bi geni wa libisu abiad. wahid fi safa ras, wa wahid tani fi safa kurah fi mahal al kan kutu fogo jisim ta Yesuah. ¹³ Humon kelim le huwo, "Ya mara, le inta bi kore?" Huwo juwabu humon, "ashan humon shilu Rabuna bitai bara, wa ana ma aruf humon kutu wen." ¹⁴ Wokit huwo kelim kida, huwo lifu wa aynu Yesuah wagif hinak, lakin huwo ma aruf gali de kan Yesua. ¹⁵ Yesuah kelim le huwo, "Ya mara, le inta bi kore? inta bi fetisu munu? huwo kan bi fekir gali de zol al bi ishtakal fi jinana de, huwo kelim le Huwo, "Ya seid, kan de inta yau shilu Huwo bara, wori le ana Inta kutu Huwo wen, wa ana bi shilu Huwo bara." ¹⁶ Yesuah kelim le huwo, "Mariyam, huwo lifu, wa kelim le Huwo be Ibriya, "Rabuni" (mana bito "Mualim"). ¹⁷ Yesuah kelim le huwo, "Mata lemesu Ana, ashan Ana lisa ma ruwa fok le Abu, lakin ruwa le akuwana Bitai wa wori le humon gali Ana bi ruwa fok le Abui wa Abu bitakum, le Allah Bitai wa Allah bitakum." ¹⁸ Mariyam Mejdilya ja wa wori le talamiz, "Ana aynu Rabuna," wa de kan hajat al Huwo kelim le huwo. ¹⁹ Wokit biga misa fi yom dak, awel yom ta usbu, wa abuwab ta mahal al kan talamiz fogo, mogful ashan kan talamiz bi kafu min Yahud, Yesuah ja wa wogif fi nus wa kelim le humon, "Salam le inakum." ²⁰ Baad Huwo kelim kida, Huwo wori idnat Bito wa kureinat Bito. Talamiz biga kan mokosutin wokit humon aynu Rabuna. ²¹ Yesuah biga kelim le humon tani mara, "Salam le intakum. ze Abu rasulu Ana, Ana kaman bi rasulu intakum," ²² Wokit Yesuah kelim kida, huwo afuku humon wa kelim le humon, "Rudu takum Roho al kudus. ²³ Ai wahid al intakum bi afi katiya tomon, bi afi le humon, wa ai wahid al intakum bi robutu katia tomon bi robutu le humon." ²⁴ Tomas, wahid min itnashar, al bi nadi gali Timaniya, huwo kan mafi ma humon wokit Yesuah ja. ²⁵ Al telmiz al tani de ja wori le huwo gali, "Nina aynu Rabuna," huwo kelim le humon, "Ille kan ana aynu fi idan Bito alamat ta masamir, wa kutu idan bitai fi mahal alama ta musmar, wa kutu idan bitai fi janba Bito, ana bi sedeg." ²⁶ Wa baad tamaniya ayam kan talamiz Bito fi juwan tani mara, wa Tomas kan fi ma humon. Yesuah ja wa kan abuwab kulu mogful, wa wogif fi nus bitomon, wa kelim, "Salam le intakum." ²⁷ wa min hinak Huwo kelim le Tomas, "Taal jibu idan bitak hini wa aynu idanat Bitai. wa taal lemesu janba bitai. mata kun zol al ma bi sedeg, lakin kede inta sedek." ²⁸ Tomas juwabu wa kelim le Huwo, "Rabuna bitai, wa Allah bitai." ²⁹ Yesuah kelim le huwo, "Ashan inta aynu Ana, inta sedeg. Baraka le del al ma aynu, wa sedeg." ³⁰ Wa kaman Yesuah amulu mojizat tanin ketir fi gidam talamiz, mojizat al ma katibu fi kitab de, ³¹ lakin del al katibu ashan kede intakum sedeg gali Yesuah yau Al mesih, Jena ta Allah, wa ashan kan intakum sedeg, .intakum bi indu haya fi isim Bito