¹ Biga Bilatus wodi awamir ashan kede jeledu Yesuah. ² Asakir del amulu tegiya ta shok, wa kutu fi ras ta Yesuah, wa libisu le Huwo gumash banafseji. ³ Humon ja le Huwo wa kelim, "Salam, ya melik ta Yahud!" wa bi nouru Huwo. ⁴ min hinak bilatus tala bara tani mara wa kelim le humon, "aynu takum, ana bi jibu Huwo bara le intakum ashan intakum bi aruf gali ana ma ligo galat fi Uwo." ⁵ Biga Yesuah ja bara, libisu tegiya ta shok wa gumash banfseji. bilatus kelim le humon, "Aynu takum, yau zol de!" ⁶ wokit biga ruasa bita kahana wa huras aynu Yesuah, humon kore shedid gali, "kede selibu Huwo, kede selibu huwo!" Bilatus kelim le humon, "Shilu takum Huwo be wa selibu takum huwo be teriga bitakum, ashan ana ma ligo galat fi huwo ⁷ Yahudin juwabu huwo, "Nina indu ganun, wa be ganun dak bi katulu Huwo ashan Huwo kutu jisim Bito bikun Jena ta Allah." ⁸ Wokit Bilatus asuma kalam de, huwo kan biga khaif ziada. ⁹ Huwo dakalu fi riasa bita hukuma tani mara wa kelim le Yesuah, "Inta ja min wen?" lakin Yesuah ma juwabu huwo. ¹⁰ Bilatus kelim le Huwo, "Inta ma der wonusu le ana? Inta ma aruf gali ana indu guwa ashan bi fiku Inta, wa guwa ashan bi selibu Inta?" ¹¹ Yesuah juwabu huwo, "Inta ma indu ai guwa fok Ana ile le haja al wodi le inta min fok. Ashan kida, al selimu Ana le inta de indu katiya kebir." ¹² Fi juwab de, Bilatus hawil fiku Huwo, lakin Yahudin kore, gali, "Kan inta fiku zol de, inta ma sabi ta Keisar. Ai zol al bi amulu jisim bito melik bi wonusu did Keisar." ¹³ Wokit Bilatus asuma kalam de, huwo jibu Yesuah bara wa huwo geni tehet fi kursi ta hukum fi mahal isim bito "Bulat," wa be Ibriya, "Jabasa." ¹⁴ De biga kan yom ta istidad le Eid faska, ze saa sita, Bilatus kelim le Yahudin, "Aynu takum, melik takum yau de!" ¹⁵ Humon kore shedid, "ede shilu, kede shilu, Selibu Huwo!" Reis bita kahna juwabu, "Nina ma indu melik ile Keisar." ¹⁶ Biga Bilatus wodi le humon Yesuah ashan bi selibu. ¹⁷ Humon biga shilu Yesuah, wa Huwo tala bara, wa kan bi arfa selib fi jisim Bito, le mahal isim bito "Mahal ta jumjuma," al bi nadi be Ibriya "Gologota." ¹⁸ Humon selibu Yesuah hinak, wa ma Huwo fi itnin rujal, wahid fi kulu taraf, ma Yesuah fi nus. ¹⁹ Bilatus kaman katibu alama wa kutu fi selib . Hinak katibu: YESUAH TA NAZARETA, MELIK TA YAHUD. ²⁰ Kutar min Yahudin agara alama de ashan mahal al kan selibu Yesuah fogo de gerib min medina. Alama de kan katibu be Ibrania, be Latin wa be Yonania. ²¹ Reis bita kahana kelim le Bilatus, "Mata katibu, 'Melik ta Yahud,' katibu gali, 'De bi kelim gali "Ana melik ta Yahud." ²² Bilatus juwabu, "Al ana katibu, ana katibu kalas." ²³ Wokit kalas junud del selibu Yesuah, humon shilu gumash Bito, gesimu le arba gita, ai zol shilu wahid; wa kaman gemis Bito, gemis de ma kheitu, mishitu kulu min fok be gita wahid bidun khiyata. ²⁴ wa humon kelim le kulu wahid, "kede nina ma sheretu huwo, lakin kede nina amulu gura fogo ashan bi wori de bikun ta munu." De hasil ashan kitab bi timu al gali, "Humon gesimu gumash Tai le badunwa amulu gura fi gemis Tai." De al junud del amulu. ²⁵ kan bi wogif janbu selib ta Yesuah, uma Bito wa ukhut uma Bito, Mariam mara ta Kilobas, wa Mariam al Mejdiliya. ²⁶ Wokit Yesuah aynu uma Bito wa telmiz al kan Huwo bi hibu bi wogif gerib, ²⁷ Huwo kelim le uma Bito "Ya mara aynu, jena bitak!" kaman Huwo kelim le telmiz de, "Aynu, uma bitak!min zaman dak telmiz de shilu huwo fi bet bito. ²⁸ Baad de, arufu gali kulu haja kan timu wa kaman al kitab bi timu, Yesuah kelim, "Ana atshan," ²⁹ Kan fi Ilba malian merisa hamud kutu hinak, humon dakalu fogo ispong maliyan be merisa al hamud de fi dulukan wa arfau fok fi khasma Bito. ³⁰ Wokit Yesuah jeribu merisa mur de. Huwo kelim, "Timu kalas." Huwo dengiri ras Bito tehet wa selimu roho Bito. ³¹ Biga Yahudin del, ashan kan de yom ta istedad wa ashan kaman kede jusas del ma fadulu fi selib lahadi yom sebit(ashan yom sebit de kan mohim), humon asalu Bilatus ashan bi kasuru kureinat bitomon wa kede nezilu humon min selib. ³² Biga junud del ja wa kasuru kureinat ta zol al awelwa kaman ta zol al nimira itnin al selibu humon sawa ma Yesuah. ³³ Wokit humon ja le Yesuah, humon ligo Huwo kalas mutu, ashan kida humon ma kasuru kureinat Bito. ³⁴ Kaman wahid min al junud del gum atanu Huwo be harba fi janba, wa tuwli tala dom wa moyo. ³⁵ Al aynu haja de Huwo shahid, wa shuhuda Bito hagiga. Huwo aruf gali haja al Huwo kelim de hagiga ashan kaman intakum bi amin ³⁶ Hajat del bi hasil ashan bi timu kulu al katibu fi al kitab. Mafi wahid min udam Bito bi kasuru. ³⁷ Kaman, kitab kelim gali, "Humon bi aynu dak al humon atanu." ³⁸ Baad hajat del, Yusif al min Rama, huwo kan telmiz Bita Yesuah lakin fi sir ashan huwo bi kafu min Yahud. huwo asalu min Bialtus kan bi agder wodi iozin ashan huwo bi shilu jisim ta Yesuah. Bilatus wodi le huwo izin. Biga Yusif ja shilu jisim Bito bara. ³⁹ Nikodemos kaman ja, De huwo al kan ja le Yesuah bilel. Huwo jibu riha ze 100 liter, lakabatu mur be oud. ⁴⁰ Biga humon shilu jisim ta Yesuah wa lifu be kofuna wa be riha, hasab teriga ta dofunu ta Yahud. ⁴¹ Wa fi mahal al selibu Huwo fogo fi jinana; wa fi jinana de fi turuba jedid lisa ma dofunu zol fogo. ⁴² Ashan kan de yom .ta istidad le Yahud wa kaman turuba de gerib hinak, humon dofunu Yesuah fogo