¹ Baad de kulu Yesuah beinu nefu tani mara le talamiz fi bahar Tabariya. Ze de Huwo beinu nefsu: ² Samaan Butrus kan sawa ma Tomas al bi nadi huwo gali Timaniya, Wa Nathaniel min Kana ta Jelil, wa iyal ta Zebedi, wa itnin talamiz tanin ta Yesuah. ³ Samaan Butrus kelim le humon, "Ana bi ruwa gobudu samagat." Humon kelim le huwo, "Nina kaman bi ja ma inta." Humon ruwa wa arkab fi murkab, lakin humon ma gobudu ai haja bilel kulu. ⁴ Wokit biga gerib sabah, Yesuah wogif fi taraf bahar, lakin talamiz ma aruf gali de kan Yesuah. ⁵ Yesuah bada kelim le humon, "Ya shabab, sei intakum indu haja al bi akulu?" Humon juwabu Huwo, "La." ⁶ Huwo kelim le humon, "Jada takum shabaka de fi safa yemin ta murkab, wa intakum bi ligo tanin." Hmon gum jada shabaka bitomon wa humon kan ma agder ashan bi juru ashan ada kebir ta samaga. ⁷ wokit biga telmiz al Yesuah bi hibu kelim le Butrus, "De Rabuna." wokit Samaan Butrus asuma gali de Rabuna, huwo bada libisu gumash bito (Ashan huwo kan ariyan), wa waga fi bahar. ⁸ Bagi talamiz del ja fi murkab hinak (Ashan humon kan ma beidin min mahal dak, bes ze masafa 200 katwa), wa humon kan bi juru shabaka maliyan be samaga. ⁹ Woki humon tala be taraf, humon ligo jomur nar hinak wa samaga kutu fogo, wa esh. ¹⁰ Yesuah kelim le humon, "Jibu takum samaga tani min al intakum gobudu hasa de." ¹¹ Samaan Butrus rija fok wa bada juru shabaka de bara, maliyan be samaga kubarin; 153. kan fi kutar lakin shabaka ma sheretu. ¹² Yesuah kelim le humon, "Taal takum akulu fotur." Mafi wahid min talamiz agder asalu Huwo, "Inta munu?" humon aruf de Yesuah. ¹³ Yesuah ja, wa shilu esh, wa wodi lehumon, wa kaman samaga. ¹⁴ De dur nimira talata al kan Yesuah beinu nefsu le talamiz wokit huwo gum min mutu. ¹⁵ Baad ma humon akulu fotur, Yesuah kelim le Samaan Butrus, "Samaan jena ta Yona, Sei inta bi hibu Ana ketir min del?" Butrus kelim le Huwo, "Naam Ya Rabuna, Inta aruf gali ana bi hibu Inta." Yesuah kelim le huwo "Akilu korufan Bitai." ¹⁶ Huwo kelim le huwo kaman tani mara, "Samaan jena ta Yona, Sei inta bi hibu Ana? Btrus kelim le Huwo, "Naam ya Rabuna, Inta aruf ana bi hibu Inta."Kutu bala le ganamayat Bitai." ¹⁷ Huwo kelim le huwo dur nimira talata, "Samaan jena ta Yona, sei inta bi hibu Ana? Butrus biga haznan ashan Yesuah kelim le huwo dur nimira talata, "Sei inta bi hibu Ana?" Huwo bada juwabu wa kelim, Ya Rabuna, Inta aruf kulu haja, Inta aruf gali ana bi hibu Inta." Yesuah kelim le huwo, "Akilu ganamayat Bitai. ¹⁸ hagiga, hagiga, Ana bi kelim le inta Zaman inta kan lisa suker, inta bi libisu barau, wa inta bi douru fi ai mahal al inta deir, wokit inta biga ajuz, inta bi midu idan bitaki, wa zol tani bi libisu inta wa bi shilu inta fi mahal al kan inta inta ma der ruwa fogo." ¹⁹ Yesuah kelim zede ashan bi wori be yatu no ta mutu Butrus bi mejidu Allah. Baad ma Huwo kelim zede, Huwo kelim le Butrus, "taal wara Bitai." ²⁰ Butrus lefit wara wa huwo aynu telmiz al kan Yesuah bi hibu bi tabi wara bitomon, al kan kaman meilu fi safa ta Yesuah zaman asha wa al kan kelim, "Ya Rabuna, de munu al bi amulu khayana le Ina?" ²¹ Butrus aynu huwo wa kelim le Yesuah, "Ya Rabuna, zol de bi ja amulu shunu? ²² Yesuah kelim le huwo, "Kan Ana deir kede huwo geni lahadi Ana bi ja, De biyani shunu le inta? Tabi wara Bitai," ²³ Min hinak kalam de shetetu fi nus bita akhuwana, gali telmiz dak ma bi mutu. Lisa Yesuah ma kelim le Butrus gali telmiz tani de bi mutu, lakin, "kan Ana deir kede huwo geni lahadi Ana bi rija, De biani shunu le nta?" ²⁴ De yau telmiz dak al bi ashad lehajat del kulu, wa al katibu hajat del, wa nina aruf shuhuda bito hagiga. ²⁵ Wa kaman fi hajat ketir Yesuah kan amulu. kan katibu tehet wahid wahid, Ana fekir zatu duniya .ma bi agder shilu kimiya ta kutub al bi katibu