¹ Tege kalakie banama Ananias urang nua binienya manyual salamar tanah. ² Inyae manawu saruaie rogae tanah iyah mula binienya, Beweh jam Ananias mangalap saruwaenya akan nyakanirie, sabagian kocima amdi antatnya kapaharap uras rasul diah. ³ Limah iyah, Petrus bapaner, "Ananias, ngapae Imun ponuh lalam hatiemu kolaie am marongka Roh Kudus manawu saruaie roga tanah iyah? ⁴ Sahompan die jual, tanah iyah tatap hak hemue? Limah, iyah diejual, rogaenya tatap kolaie marigapnya? Ngapa, kolaie bapikir mangaruh am honta baie lalam hatiemu? kolai honta marongka kan kalunen, tapi marongka Hatalla." ⁵ Manongar paner iyah, Ananias jatue tangkaling lalu mahapus kosahnya, limah iyah, urang banya uras gola manongarnya. ⁶ Sambagian babiya bujang, mungkus nya honie kain, manaing nya maluar, lalu manguburnya. ⁷ Limah iyah, sakitar tolu jam, binie Ananias datang, tapie honta ingat kesahnya am tajadie diah. ⁸ Lalu, Petrus bapaner kan inya, "Parah ka aku, tanah am die jual mu bera itie pamakah rogaenya?" Lalu Safira manimat bungienya, " Amat, bera iyah pamakah roganya." ⁹ Limah iyah bapaner mula Paulus kainya, " Ngapa kam nuae lakie mue baolo-olo akan Roh Tuhan? Ilae mue, bokas dampae kakie urang banya am harue pulang mangubur lakiemu tarie bebeh jam mula pintue itie manaing kolaie maluar. " ¹⁰ Sakametuh bapaner, Safira tangkaling mahapus kosahnya. Sakatika iyah kawan babiya bujang tama, mailae Safira diah jadie matie, urang banya manaingnya maluar manguburnya balikat lakienya diah. ¹¹ Mailae, berae iyah timul banya gola akan santero ungkup am manongor mailae kajadian iyah. (Tanae-Tanae Aneh Mula Hatalla) ¹² Banya tanae ajaib am aneh die ilae urang am die gawie kawan rasul uras pamanya pakat sahatie paharap Emer Solomo. ¹³ Mayan arae bukan am baranie nirienya bakumpul uma urang diah, tapie urang-urang bukan mahormat urang tege diah. ¹⁴ Limah iyah, jajuan batamah banya parcaya umae Tuhan, sabagian bakah, umae diah kalakie-labinie. ¹⁵ sabab iyah, pamanya mangopit manaing urang-urang am konae payakit kanyaman maomahnya ka jalan-jalan die guring tinggie tandu uamkan lalemek katikae Petrus datang diah, sahontae konae kamayangnya urang banya diah. ¹⁶ Diah, tege banya urang mulae banuae-banuae sakitar Yerusalem uras datang, manaing urang-urang payakit kanyaman tege kona rasuk imun-imun jahat. Urang diah uras barigas. (Kawanan Rasul Konae Tangkap) ¹⁷ Limah, kawanan imam bakah ngaruh gawie, barotae jalahannya, iyah urang Saduki,* uras pamanya diah dangki irie hatie. ¹⁸ Pamanya diah manangkap kawan rasul manamanya lalam panjara umum. ¹⁹ Sakatika, malam arie, tege siku urang malekat Tuhan maungkap pintu-pintu panjara, manaing maluar, lalue bapaner, ²⁰ "Badarie, ingkas keh lalue parah kan pamanya urang-urang amka Dangau Hatalla urasnya bungie ammorie pahirup itie. " ²¹ Lipas, pamanya manongarnya, sota naharie, pamanya tamae lalam Dangau Hatalla lalue nampara malajar. Kametuh Imam Bakah barotae urang-urang banya datang diah. pamanya mangumpul Pajabat Agama umkan majelis tuhae-tuhae Israel. salalu marentah urang kapanjara mangalap rasul-rasul kapaharap pamanya. ²² Lipas iyah, urang-urang am diesuruh datang diah, pamanya mayan mailae kadua rasul tege lalam panjara. Pamanya, baulang lalue baparah, ²³ ujae nya, " Kamie mailae panjara takuncie urasnya ambajagae tege badirie paharap pintue, sakatikae kamie maungkapnya, kamie mayan mailae urang tege lalamnya." ²⁴ Sakatikae, kapalae ambajagae ka Dangaue Hatalla umkan imam kapalae manongor paner iyah, pamanya uras bingung kan kawan rasul diah tege batanya-tanya apa puna amat berae iyah. ²⁵ Limah iyah, siku urang baparah ka pamanya, " Ilae keh! Urang-urang am die tamae mu ka panjara uras tege lalam Dangau Hatalla malajar urang banya." ²⁶ Maka, kapala panyaga Dangau Hatalla umakan pangawal am bukan badarie manaiang rasuk-rasul iyah, tapie hontae die paksa pamanya gola konae patu honie batue laie urang banya. ²⁷ Limah pamanya jadie manaing Petrus umakan Yohanes, pamanya ma antat maharap Sanhedrin. Makae Imam Bakah batanya ka pamanya, ²⁸ ujaenya, "Kamie jadie karas mangirah kolaie malajar honie nama iyah, tapie kolaie jadie mamonuh Yerusalem laie palajaranmu berae iyah apae kolaie bakahona uras mananggung darah urang tie kamie pamanya." ²⁹ Amun, Petrus lalue para rasul manimat, " Kami harus lobih taat ka Hatalla dari pada kalunen. ³⁰ Hatalla hiae umuh diri jadi ma huas Yesus, am jadi kona pati mu lalue mangantung-Nya ka kayu salib. ³¹ Hatalla hona inya tege kajari kanan Nya laie pamimpin lalue jurus salamat akan mamori partobatan akan Israel lalue pangampunan tingi dosa-dosa. ³² Lalue, kami jadi saksi-saksi mula uras itie, lalue bera iyah jam roh barasih, am jadi Hatalla bori ka urang-urang am taat ka Inya." ³³ Metuh urang manongar hal itie, hati urang ta cucu lalue ba maksud hona mamati para rasul iyah. ³⁴ Tapie siku urang ba nama Gamaliel, siku guru Taurat am di hormat uras urang, badiri ka paharap Sanhedrin lalue manyuruh para rasul iyah di suruh maluar nyulu. ³⁵ Lipas iyah, inya bapaner ka urang, "Uui urang-urang Israel, cuba ila bujur bai apa am akan kolai karuh paharap urang-urang itie. ³⁶ Laie, babarapa waktu am lalue,Teudas huas, mangaku arep nya jadi urang penting lalue kira-kira tege ompat ratus urang am ba uma kan inya. Tapie, inya di pati lalue urang am mairing nya tabur tabiar, sampai honta ara samah sakali. ³⁷ Limah Teudas, Yudas mula Galilea huas, metuh ari-ari sensus,lalue manarik urang banya mairing nya. Inya jam kona pati lalue urang am ma iring nya tabur tabiar. ³⁸ Laie iyah, lalam kasus iti, aku mansehat kolai: Jauh kan urang-urang itie lalue ubah kan urang. Laie, amun rancana lalue pangawi iti ba asal mula kalunen, hal iti honta bahasil. ³⁹ Laie, amun rencana itie ba asal mula Hatalla, kolai honta ulih mahonti nya. Bahkan kolai mungkin di dapat metuh malawan Hatalla." ⁴⁰ Urang mahoni nasehat Gamaliel. Limah iyah, limah manimai dua iku rasul iyah, urang manukuh kadua nya lalue mangirah para rasul hona bapaner lalam nama Yesus, lalue malopas nya. ⁴¹ Laie iyah, rasul-rasul iyah badari mila paharap Sanhedrin dengan basukacita lie urang di anggap layak mandarita panghinaan demi nama Nya. ⁴² Lalue, satiap ari, ka bait Hatala lalue mula dangau ka dangau, urang honta basa bahonti malajar lalue mangabar Injil amun Yesus yah Kristus.