¹ Limah jadie diputus kami ingkas balayar ka Italia, urang manyorah Paulus babarapa tahanan am bukan ka siku kapten pasukan Agustan, am banama Yulius. ² Kami nai kasuti kapal mula Adramituim am langsung hona balayar ka babarapa palabuhan ka sapanyang pantai Asia. Kami balayar ditamah lai Aristarkhus, urang Mekadonia mula Tesalonika. ³ Limah pagie, kamie datang ka Sidon. Yulius malayan Paulus ponuh kabaie lalue manyuruh Paulus bakoca kawal-kawal nya honie maurus kaparluan Paulus. ⁴ Mula koyah, kamie ingkas balayar malalu Siprus laie ribut batiup balawan arah. ⁵ Metuh kamie jadie balayar malalu pantai ka sapanyang pantai Kilikia lalue Pamfilia, ⁶ Koyah, kapten manapat suti kapal mula Aleksandria am metuh balayar ka Italia, inya maminah kamie ka kapal iyah. ⁷ Kami balayar lamat salama babarapa arie, laie kaoyohan kami datang ka Knidus. Laie riwut honta mamungkinkan kamie badari lobih jauh, kamie balayar malalu pantai Kreta ka arah tanjung Salmone. ⁸ Kamie oyoh balayar malalu tanjung iyah kami sampai homan palabuhan indah, am damping kakota Lasea. ⁹ Laie kamie sadar waktu kamie banya hila, saat itie, pajalan laut iyah bahaya laie masa puasa urang Yahudi jadie lalu. Paulus manyalu urang, ¹⁰ lalue bapaner ka urang, "Manyari-manyari, aku maila palayaran itie banya karusakan karugian am bakah, honta kali isi kapalnya gona, tapie kosah dirie jam." ¹¹ Tapie, kapten iyah lobih parcaya ka nakhoda hompu kapal dari pada paner Paulus. ¹² Laie hinta baie diam kapalabuhan iyah salama musim colap, sabagian bakah urang satuju ingkas balayar mula koyah urang tahu mancapai Feniks, suti palabuhan ka Kreta, am miar ka hulu ka hilir, lalue diam koyah salama musim colap. Riwut am manyangit manampuh kapal Paulus ¹³ Metuh riwut kius-kius batiup mula selatan, urang bapikir laie urang jadie datang homan tujuan urang. Laie iyah, urang manarik jangkar lalue balayar ka sapanyang towing Kreta. ¹⁴ Tapie, honta lamat, riwut basaluh, am di joku Euroklidon, batiup mula pulau iyah. ¹⁵ Metuh kapal kamie kona tampuh riwut lalue honta sangup mula malawan nya, kamie manyorah maubah kapal kamie bulang-bali. ¹⁶ Sahompan kamie bakanyah mula pulau koni am banama Kuada, kami oyoh tapie kamie bahasil ngamuri jukung kamie. ¹⁷ Limah iyah ana buah kapal manarik jukung katingi kapal, urang mahoni tali-tali mangowat honi manoguh kapal iyah. Lai gola tagalang ka Sirtis, urang manurun alat-alat kapal lalue maubah kapal rang bulang bali. ¹⁸ Pagie lusa, kamie bulang-bali laie riwut basaluh, urang-urang nampara malua isie kapal. ¹⁹ Metuh arie katolu, urang malua alat-alat kapal honi jari rang kaniri. ²⁰ Laie baie mataarie lalue bintang-bintang honta hamus salama babarapa arie galumang bakah mahompas kamie harapan kamie nyaman salamat hila.` ²¹ Laie banya urang badiri sadang palamatnya laie mayan pamakan pamuseh, Paulus badiri katongah-tongah urang lalue bapaner, "Kawan manyari, saharusnya kolai manulat bungi ku honta balayar mula Kreta nyaman honta kona rugi bira itie. ²² Wayah itie, aku mori samangat nyaman totap sabar laie antara ikam mayan ara am hila kosahnya, tapie kapalnya meh am hila. ²³ Laie, malam tarie, tege malaikat Hatalla, am hompu aku am aku somah, badiri kapaharap ku, ²⁴ samil bapaner, 'Hinang gola, Paulus. Kolai harus badiri kapaharap Kaisar. Cuba, ila, Hatalla jadie bamurah hati ka kolai uras urang am balayar barota kolai.' ²⁵ Laie iyah, kawan manyari, sabar kan hatie mu laie aku parcaya kalalam Hatalla laie uras akan tajadi bira am jadie diparah ka aku. ²⁶ Tapie, dirie harus tagalang ka suti pulau." ²⁷ Tapie, metuh malam kaompat bolas, metuh kamie masih bulang-bali ka sapanyang Laut Adria, kira-kira tongah malam, ana buah kapal mangira rang damping daratan. ²⁸ Urang mamori pamorat batu lalue manapat honi maukur palalam arainya dua puluh dopa. Metuh, urang maju koci mula, urang baulang manibar pamorat batu lalue maingat palalam arainya lima bolas dopa. ²⁹ Laie kamie gola tagalang ka batu karang, urang manurun ompat jangkar malu balakang kapal lalue badoa nyaman arie laca siang. ³⁰ Tapie, sahompan babarapa ana buah kapal bausaha badari mula kapal am jadie manurun jukung ka laut lalue bapura-pura manurun jangkar-jangkar mula kamuri, ³¹ Paul bapaner ka kapten iyah lalue uras ana buah nya, "Amun urang-urang iyah honta diam kalalam kapal, kolai honta tahu disalamatkan." ³² Metuh iyah, uras ana buah manota tali jukung lalue maubahnya hanyut. ³³ Metuh suung datang, Paulus maminta uras urang mangalap babarapa puseh laie. Lalue bapaner, " Arie itie iyah am arie kaompat bolas kolai tarus kalalam kaporan laie mayan ara puseh laie. ³⁴ Laie iyah, aku manyuruh kolai mangalap saruai pamakan pamuseh nyaman kolai salamat. Laie, mayan ara salamar balau am hila mula antara kolai." ³⁵ Metuh mamarah hal iyah, Paulus mangalap roti lalue maucap syukur ka Hatalla ka paharap urang banya, mamocah roti iyah, lalue nampara makan ³⁶ Maka, urang uras dikuatkan hatinya laie urang kaniri uma makan jam. ³⁷ Jumlah kamie uras nya am tege kalalam kapal tege 276 urang. ³⁸ Metuh makan sampai konyang, nyaman kapal iyah lompung rang manibar gandum kalaut. Kapal Hancur Uras Panumpang Salamat. ³⁹ Metuh arie nampara siang, urang honta ingat tege natai, tapie urang manampai tolu am bapantai, homan urang mamutuskan manyingah kapal koyah amun mamungkinkan. ⁴⁰ Maka, metuh manyatu jangkar-jangkar, urang maningalnya kalalam laut, lalam waktu samah, malopas tali-tali kamuri lalue manai layar kabagian paharap kapal nyaman riwut manaing urang sampai kapantai. ⁴¹ Tapie, kapal tagepak kabatu karang kahoman badapat dua laut lalue kapal tagalang. Haluan kapal tasangkut laie honta tahu bakanyah, tapie tangkung kapal hancur dihantam galumang. ⁴² Uras ana buah tege rancana hona mampati kawan tahanan nyaman honta tege siku am nyunyug lalue badari. ⁴³ Tapie, kapten iyah, baharap tahu manyalamat Paulus, mahalang rancana rang. Inya mamarintah nyaman urang-urang am tahu nyunyung tahu maluncat holu mula kapal lalue manguang ka towing. ⁴⁴ Lalue, sisanya tege am katingi papan, tege jam am mahoni bana-bana am bukan mula kapal. Laie iyah, uras urang sampai katowing lalue salamat.