¹ Manyari-manyariku am kusiha, umet parcaya satiap roh, am bukan roh-roh iyah akan mangasene apakah urang barasal mula Hatalla lai banya nabi palsu jadi datang ka dunia. ² Bera itie kolai mangenal Roh Hatalla: satiap roh am mangaku bahwa Yesus Kristus jadi datang lalam wujud kalunen baasal mula Hatalla. ³ Satiap roh am honta mangaku Yesus, honta baasal mula Hatalla. Iyah yaham roh anti-Kristus, am kolai dongar akan datang botie tie jadi tege ka dunia itie. ⁴ Ana-anaku, kolai baasal mula Hatalla lai jadi mangalahkan nabi-nabi palsu iyah lai Inya am tege ka lalam kanirimu lobih bakah mula inya am tege ka dunia. ⁵ Nabi-nabi palsu iyah baasal mula dunia. Lai iyah, urang bapaner mula dunia lalu dunia manongarkan urang. ⁶ diri baasal mula Hatalla. Urang am mangasene Hatalla manongarkan diri, tapi urang am honta baasal mula Hatalla honta manongarkan diri. Dengan itie, diri manapat Roh kabujur lalu roh sosat. Ayo Diri Saling Masiha ⁷ Manyari-manyariku am kusiha, ayo diri saling masiha lai bori baasal mula Hatalla, lalu satiap urang am masiha lahir mula Hatalla lalu mangasene Hatalla. ⁸ Urang am honta masiha honta mangasene Hatalla lai Hatalla yaham bori. ⁹ Bera itie bori Hatalla dinyatakan ka antara diri: Hatalla mamutus Ana-Nya Am Tungal ka lalam dunia nyaman diri baulih hirup malalu Inya. ¹⁰ Ka lalam itie bori iyah: bukan diri am jadi masiha Hatalla, tapi Hatalla ja am masiha diri holu mangirimkan Ana-Nya sabagai korban pandamaian bagi dosa-dosa diri. ¹¹ Manyari am kusiha, jakai Hatalla bebeh ham masiha diri, jam harus saling masiha. ¹² Hompan tege urang am basa maila Hatalla. Jakai diri saling masiha, Hatalla tingal ka lalam diri bori-Nya iyah di sampurnakan ka lalam diri. ¹³ Dengan hal itie diri tahu bahwa diri tingal ka lalam Hatalla lalu Hatalla ka lalam diri lai Hatalla jadi mamorikan ka diri mula Roh-Nya. ¹⁴ Lai, kami jadi maila lalu basaksi bahwa Ompai jadi mamutus Ana-Nya manjadi Juru Salamat dunia. ¹⁵ Satiap urang am mangaku bahwa Yesus yaham Ana Hatalla, Hatalla tingal ka lalam inya lalu inya ka lalam Hatalla. ¹⁶ Jadi, diri manapat lalu jadi mamparcaya bori am Hatalla hompu bagi diri. Hatalla yaham bori, lalu urang am tingal ka lalam bori, tingal ka lalam Hatalla rang nua Hatalla ka lalam inya. ¹⁷ Dengan itie, bori disampurnakan dengan diri nyaman diri baulih hompu kayakinan diri mula Ari panghakiman lai samah bera Inya, bebeh jam diri ka dunia itie. ¹⁸ Honta tege kagola ka lalam bori, tapi bori am sampurna mausir kagola lai kagola bahubungan dengan hukuman. Urang am gola, hompan disampurnakan lalam bori. ¹⁹ Diri masiha lai Inya lobih holu masiha diri. ²⁰ Jakai tege urang am bapaner, ''Aku masiha Hatalla'', tapi pangili manyarinya, urang iyah yaham parongka. Lai, urang am honta baulih masiha manyarinya am ditampai, honta baulih masiha Hatalla am honta maila. ²¹ Lalu, parintah itie diri tarima mula Hatalla: Satiap urang am masiha Hatalla, harus masiha manyari nya jam.