¹ Satiap urang am parcaya bahwa Yesus yaham Kristus lahir mula Hatalla; lai satiap urang am masiha Ompai, lalu masiha ana am lahir mula Ompai. ² Dengan itie, diri tahu bahwa diri masiha ana-ana Hatalla, iyaham katika diri masiha Hatalla lalu manaat parintah-parintah-Nya. ³ Lai itie bori Hatalla, bahwa diri manaat parintah-parintah-Nya; lalu parintah-parintah-Nya hontaja borat. ⁴ Lai, apa pun am lahir mula Hatalla mangalahkan dunia; itie ja kamonangan am jadi mangalahkan dunia: iman diri. ⁵ Sapakah am mangalah dunia amun buka inya am parcaya bahwa Yesus yaham Ana Hatalla? Hirup Kekal Tege ka Lalam Yesus ⁶ Inya itie ja am datang dengan arai darah: Yesus Kristus; bukan am dengan arai, am bukan dengan arai rang nua darah. Rohja am basaksi lai Roh iyah kabujur. ⁷ Lai, tege tolu am basaksi ka surga: ⁸ Roh, arai, lalu darah; dengan katolunya iyah yaham suti. ⁹ Jakai diri manarima kasaksian kalunen, kasaksian Hatalla lobih onya. Lai, kasaksian am Hatalla jadi borikan yaham kasaksian tuntang Ana-Nya. ¹⁰ Urang am parcaya ka Ana Hatalla hompu kasaksian iyah ka lalam kanirinya. Urang am honta parcaya ka Hatalla jadi mangaruh-Nya manjadi urang parongka lai borikan tuntang Ana-Nya. ¹¹ Lalu, itie am kasaksian iyah: Hatalla jadi mamorikan ka diri hirup lalam kekal, lalu hirup iyah tege lalam Ana-Nya. ¹² Satiap urang am hompu Sang Ana hompu hirup; satiap urang am honta hompu Ana Hatalla honta hompu hirup. Urang am Lahir Mula Hatalla Honta Mangaruh Dosa ¹³ Aku jadi manulis hal-hal itie ka kolai am parcaya lalam nama Ana Hatalla nyaman kolai tahu am kolai hompu hirup am kekal. ¹⁴ itie ja kayakinan am diri hompu ka paharap Inya, iyaham jakai diri maminta apa pun am sasuai dengan kahona-Nya, Inya manongar diri. ¹⁵ jakai diri tahu Inya manongar diri, apa pun am diri minta, diri tahu bahwa diri jadi hompu parmohonan am jadi diri minta mula-Nya. ¹⁶ Jakai tege urang am maila manyarinya mangaruh dosa am honta maarah ka kamati, bai ja urang iyah maminta, Hatalla akan mamorikan hirup ka urang am mangaruh dosa am honta maarahkan ka mati iyah. Amun, tege suti dosa am maarahkan kamati; aku honta mamarahkan bahwa inya harus batanya akan dosa iyah. ¹⁷ Uras ka honta bujur yaham dosa, tapi tege dosa am honta maarahkan kamati. ¹⁸ Diri tahu bahwa satiap urang am lahir mula Hatalla honta mangaruh dosa, tapi inya am lahir mula Hatalla malindungnya mula si jahat nyaman honta manyoputnya. ¹⁹ Diri tahu bahwa diri baasal mula Hatalla, lalu saluruh dunia homan lalam kuasa si Jahat. ²⁰ Lai, diri tahu Ana Hatalla jadi datang mamorikan pangertian ka diri nyaman diri baulih mangasene Inya am bujur; diri tege ka lalam Inya am bujur, lalam Ana-Nya, Yesus Kristus. Inya ja Hatalla am bujur lalam hirup am kekal. ²¹ Ana-anaku, jauhkan kanirimu mula bahala-bahala.