¹ Keken itie, daging-daging am dipakoni akan imun-imun. Dirie ingat amun dirie uras baulih kapintar. Kapintar yah jam mangaruh kasombong, tapie kasih yah marompuh urang banya. ² Amun tege urang am mangira baulih inya ingat sasuatu, inya hompan maingat am saharusnya inya ingat. ³ Tapi, amun urang mangasihi Hatalla, inya dikasene laie Hatalla. ⁴ Laie iyah, tuntang pamuseh daging-daging am dipakoni akan imun, dirie ingat amun mayan ara imun ka dunia tie, tuntang jam mayan arae Hatalla kacuali Inya, sutie-sutienya. ⁵ Tapi, amun pun tege am di jokue Hatalla-hatalla, baik ka surga ataupun ka bumi, (bera apa tege banya"Hatalla" tuntang tege banya "Tuhan"), ⁶ tapie akan dirie baya tege sutie Hatalla, iyah am Ompai dirie. Mulae Inya yah uras sasuatu lalu dirie tege akan Inya. Tuntang, baya tege sutie Tuhan, inya yah Kristus Yesus, am karena-Nya sagala sasuatu tege, tuntang dirie tege mahoni Inya. ⁷ Amun bera iyah, hontae baya uras kalunen am hompu kapintar tie. Tapie, akan sabagian urang, am jarie tabiasa akan imun sampai keken itie, mamuseh pamakan yah samah kan mamuseh pamakan am di borie akan imun. Laie iyah, hatie nurani urang yang hontae kuat timbul jarie isa. ⁸ Pamuseh yah hontae manaing dirie akan Hatalla. Dirie jam hontae lobih baik amun hontae museh, hontae jam lobih buruk amun dirie museh. ⁹ Tapie, ingatlah amun kabebasan kam yah hinang malah jarie batu sandungan akan urang am hontae kuat. ¹⁰ Laie, amun tege urang am kolai ilae, am tege kapintar, mamuseh ka lalam dangau imun, bukankah hatie nuraninya, amun inya lomah, inya dikuatkan akan mamuseh daging-daging am diborie akan imun? ¹¹ Jarie, malalu kapintarmu yah, urang am lomah yah, iyae yah manyarie kolai, am akan Kristus jarie matie, manjarie binasa. ¹² Jarie, akan badosa taharap kaban manyarie saimanmu tuntang malukai hatie nuraninya am lomah, maka kolai badosa taharap Kristus. ¹³ Laie iyah, amun pamuseh mangaruh manyarie saimanku tasungkur, aku hontae honae am mamuseh daging sampai sapalamatnya nyaman aku hontae mangaruh manyarieku tasungkur.