¹ Hokava arape ñymbyhetave oho Hesure jyrojava, opaite ijetava griego ĩñẽiẽipe õñepyrõ ijeta porããhe reta hebreo ĩñẽiẽipe ijetavare, hei reta ñyngarekoha kaviãhe opaite taupere hai ryheva retarã, ĩme manoshiare, hou verãre mẽi'ẽihavape. ² Hãrã opaite 12 Apostolre opa mbatyka Hesure jyrojavarã heishu reta: Porãã ore hejaha verã Tumpa ĩñẽiẽi mbe'uha ia karu verãpe ñyngarekoha'ihe verã. ³ Hãrã shyryvyre, pyheka pynymbyteivi 7 kuimbai pyrojava, tynyheva Espiritu Santo hareka ñy'arãnduva, ñañonopokui ipope hokava haire japo verã. ⁴ Kyrã ore jururehapo hareka pyrymbo'ehateripohe Tumpa ĩñẽiẽi. ⁵ Hãrã opaite haipe ñymbatyvare haikavishu reta he'iava rãĩmi, haivi ñono reta Esteban, kuimbai tynyheva jyrojakue hareka Espiritu Santo, Ẽelipe, Procopo, Nicanor, Timoteo, Parmenas, Nicolas Antiokiape'õ jyrojahe vekua Judiore ohoheva. ⁶ Haivi veru reta Apostolre ẽivãpe, hãmã haire ñymboishu Tumpa, hãrã ipore ñaka ĩãrẽi ñono. ⁷ Tumpa ĩñẽiẽi mbe'uha jyvyĩ rahaha hareka ñymbyhetave Jerusalenpe jyrojava Ñandeja Hesu rehe, hareka heta paire jyrojaheva jyve. ⁸ Esteban, Tumpa mynyheshu mbaikatu hareka ohovasashu, hai rupii japo opa mbai kavi heshaha verã hareka mbai heshaha verã opaite kuaretare mbytepe. ⁹ Hãrã puã reta kuimbaire sinagoga he'iashua Libertospe'õ hareka Cirene, Alejandria, Cilicia hareka Asiape'õre hãndi, haivi õñepyrõ ijeta pohyshu reta Esteban, ¹⁰ tẽivã jepyãhe reta, shara ãrãndu ryheve ijeta Espiritu Santo mẽiẽishuvapy. ¹¹ Haipe mẽiẽishu reta kyrypoti ã'ãmore heihe verã Esteban jahe'ihea Moise hareka Tumpa. ¹² Kyrãpypei opa mbi'ikorai kuaretare, kuakuavare hareka jyve Moise mbypara vekua pyrẽimboi'iheare; hãrã opa ou ĩãrẽirã, pysyshu retarã raha reta Judio mburuvisha vasu ñymbaty'õpe. ¹³ Haipe veru reta kuareta mba'etyva mbeu verã: Ko kuimbai poiã ijeta porããhe tupao hareka Moise mbypara vekua. ¹⁴ Ore hẽinduha heirã Hesu Nazareno opa mambai verã ko tupao hareka yngava ñonojy verã jaikova rãĩmi Moise heja ñande vekua. ¹⁵ Hãrã opaite mburuvisha ñymbaty'õpe vapy ovare mãĩhe Esteban, hareka hesha reta hova, pẽinte Tumpa jokueva hova rãĩmi.