¹ Terure hareka tyryvyre, pyhendu ko hai shijeheva. ² Hẽinduma reta Pablo ñẽiẽi hebreope ijetarã, jasaka kavive ñynoĩ, hãrã heishu reta: ³ She hai Judio. Tarso Siliciape aa vekua, tẽivã ko Jerusalenpe akuakua hareka Gemaliel shymboi kavihe ñanytynondevare iñẽiẽi mbyparaha vekuape heiva rãĩmi, aipotañoĩ ajaposhu Tumpa heiva shypyaivive, ã'ẽi pee pijapova rãĩmi. ⁴ Japoma heta ara amoña'ai ko tapehupi ohovare, ajuka verã hareka araha ambyperesoka kuimbaire hareka taupere. ⁵ Pai juhuvisha vasu hareka kuakuavare kuakavi ñynoĩ haire mẽiẽishe kuatia mbyparahava ñandyryvyre Judiore verua mbyperesoa verã Damascoivi. Aha aheka Hesure jyrojavare, aru verã ko Jerusalenpe nũpaha verã. ⁶ Tẽivã aha ai pehupirã, Damascope ãvãhẽiserima aharã, jehu, 12 serimarã mondii pẽinte sapeva hĩmbipekue vate araivi sapeshuri, ⁷ haivi aa yvype. Hãma ahendu pẽinte ñẽiẽi heisheva: ''Saulo, Saulo, marã'ĩrãra shymoñari?'' ⁸ Hãrã apyrãndushu: ''Mbavara nde, Sheja?'' Hai heishe: ''She hai Hesu Nasaretva, nde rymoña ryreshuva''. ⁹ Aha handiare hesha jyve sapeva hareka myngyje reta, tẽivã hẽinduã hai reta ñẽiẽi ijetasheva. ¹⁰ Hãrã apyrãndushu: ''Mbaivara katu ajapo, Sheja?''Hãrã Ñandeja heishe: ''Pũ'ã hareka ekuaĩ Damascope, haipepo mbe'uhandekui rijapo verã''. ¹¹ Katynga sapeva hĩmbipekueivi aheshaveã kũvãipi, hãrã shi'ĩrũre shyshambekyĩ shyraha Damascopeve. ¹² Haipe ẽiẽi pẽinte kuimbai Ananias he'iashua, kuimbai pyryparekova Tumpa haihuva hareka Moise mbypara vekua heiva japoñoĩ'ia, hareka opaite Judiore ijeta kavihea Damascope'õre. ¹³ Ananias ou mãĩ shyrehe hareka vãhẽi ourã heishe: ''Shyryvy Saulo, heshajyvy''. Hãrã haiperaveĩ aheshajy hareka haipe ahesha Ananias. ¹⁴ Hai heishe: ''Ñanytynondevare ñu Tumpa nypyhyrõ aryka'evãĩ rikuaa verã hai potava, hareka ryhesha verã hai heko kaviva, ryhendu verã haiteiva juruivi ĩñẽiẽi. ¹⁵ Hãrã nde rijetapohekui kuaretare hẽinonde hareka rymbeupokui mbai ryhesha vekuare hareka ryhẽinduva. ¹⁶ Hãmera ã'ẽi, mbaiva ryhãrõ? Pũ'ã hareka ñymyngarai hareka jurureshu Ñandeja hejareindyhevi verã mbai porãmba vekua''. ¹⁷ Aijyma Jerusalenvirã, aha tupaope airure verã hareka ahesha shyresape ouva. ¹⁸ Ahesha Ñandeja hareka heishe: ''Narẽi'ãite ẽihẽi Jerusalenvi, shara rojãpo retakui rere shyreheva''. ¹⁹ Hãrã she haishu: Sheja, haireta rãnga kuaa ahañoĩva opaite sinagogaipi hareka araha ambyperesokava hareka nũpa jyre ndyrehe jyrojavare. ²⁰ Esteban huvykue syryrã, ndyreepe ñimiñẽiẽi'ia, akuape ãĩ jyve hareka pẽinte ñẽiẽipe ãĩjyve jukaha verã shara ijeta ndyreherã. Aingarekohe jukavare monde vekua!'' ²¹ Tẽivã Ñandeja heishe: ''Ekua, shara arymondopo mbyry haimba Judiore ẽivãpe''. ²² Haipeveĩ hẽindushu reta; tẽivã õñepyrõ sapuke reta: Hokava kuareta katuã ĩmeĩ'i! Tymano! Potahaveãma hykuaĩ heshahajy ko yvy'ĩãrẽi! ²³ Hareka sapukeve jyrerã monde vekua mombo jyre hareka mbyveve jyre yvytimbokue yvyture, ²⁴ syndarore juhuvisha he'ika Pablo mĩjeha verã cuartelpe hareka mondo nũpakashu mbijetakashu verã, kuaa verã mãrã'ĩrãra kuaretare kyrãĩte sapukehe reta. ²⁵ Tẽivã opama popokua reta nũpa verãrã, Pablo heishu 100'õ syndarore juhuvisha haipe'ẽivã: Ñonoharape punupãka verã Romava pikuamba porãmbara japo? ²⁶ Hokava hẽindurã, 100'õ syndarore juhuvisha oho mbeushu hãrã hei: Mãĩkavirãni ko rijapo verãre, shara ko kuimbai hai Romava. ²⁷ Hãrã syndarore juhuvisha ñymbojahe pyrãndushu Pablo: Añetera nde hai kuimbai Romava? Pablo heishu: Añete rãnga. ²⁸ Hãrã syndarore juhuvisha heishu: She heta kyrypoti aikohe iko shyhevi verã Romava. Pablo heishu: Tẽivã she hainde aarãvãĩ. ²⁹ Haivi, Pablo nũpa ẽiẽi verã reta opa syryshi; hareka syndarore juhuvisha jyve, kuakavima Romanorã kyje pyta opa popokuarã. ³⁰ Pareejyape syndarore juhuvisha pota kuakavi mbaiva rehera Judiore poshyjyre handi Pablo, kadena hekyshi reta hareka mondo ñymbaty verã pai juhuvishare, opaite pyrymbarakua'iare. Hãrã nohẽishu reta Pablo hareka hẽinonde ñono reta.