¹ Pablo mãĩ'ihe haipe huvisha ñymbaty'õ retarã hei: Shyryvyre, ã'ẽipeve aiko shãka vapy kavi ryheve Tumpa hẽinonde. ² Haivi pai ruvisha Ananias he'iashua heishu Pablo hyvache'ia nũpashu verã juruipi. ³ Pablo heishu: Tumpa nunupapokui nde, ndyrova mokũereiva! Nde rãnga ryvapyrẽiĩ hokape shimbijiche verã Moise mbypara vekuape heiva rãĩmi, tẽivã mãrã'ĩrãra shunupãka Moise mbypara vekuape heimbatẽiã kyrã rijapo verã? ⁴ Hãrã haipe'õre heishu reta: Marã'ĩrãra kyrã ndyposhyshu pai ruvisha Tumpa ñonova? ⁵ Pablo hei: Shyryvyre, aikuãã rãngambaje hai pai ruvisharã, shara mbyparahavape hei: Avy poshyshu nyrentape miñaka'ia. ⁶ Haivi Pablo heshama haipe'ẽi jyve Saduseo hareka ẽariseo retarã hynãtu hei: Shyryvyre, she hai ẽariseo, pente ẽariseova tay, shyveruha kope shara arojashe mano vekuare kuerajy verã. ⁷ Pablo opama hei kovarã, Saduseo hareka ẽariseore õñepyrõ ijeta ñynoĩ ijupi, hãrã ñymbatyva opa ñymbijao. ⁸ Shara Saduseore hei manovare kuerajymbaa hareka mba'etyva Tumpa jokueva hareka espiritu, tẽivã ẽariseore roja hai hokava. ⁹ Opa sapuke reta, haipe ĩmẽi'ẽi jyve Moise mbypara vekua pyrymboi'iheare ẽariseova, pũã retarã hei: Ko kuimbai rãnga japoã porãmba. Ĩmẽirã Tumpa jokueva hareka espiritu ijetashu. ¹⁰ Kyrã ñimbitivishave oho ko ikova, hãrã syndarore juhuvisha kyje jukashu verã Pablo, hẽinoka syndarore nohẽi verãre Pablo haire mbyteivi, raha verãre syndarore ho'ipe. ¹¹ Hoka ĩrũ arajya pyharepe Ñandeja ijeshakashu Pablo hãrã heishu: Ñymykyrẽiy katu Pablo, ko Jerusalenpe shymbeuva rãĩmipo, shymbeujykui Romape. ¹² Hokava arape ĩmẽi'ẽi Judiovare ĩñiñonova pẽinte nẽiẽipe Pablo juka verãre, hei reta Tumpa jahehe verãre japoã reta heivarã. ¹³ Hasamimba 40 kuimbai ẽivã ĩñiñonova hokava nẽiẽipe. ¹⁴ Jyraha reta pai ruvisha hareka Judiore juhuvisha ẽivãpe heishu reta: Ore mẽi'ẽiã ĩrĩñẽiẽi mbaimba ho'uha hareka mbusururuha verã Pablo ndei jukaharã. ¹⁵ Hãrã pee mburuvisharã pẽiĩva, pirureshukui syndarore juhuvisha veru verã pynynõnde, mbai pikuaaveshi verã Pablo, hãrã ore õĩãmapokui jukaha verã ndei vãherã. ¹⁶ Tẽivã Pablo hiindy memby kuaa kovarã, oho kuartelpe mbeushu Pablo. ¹⁷ Pablo hẽino pẽinte 100'õ syndarore juhuvisharã heishu: Raha ko kunumi syndarore juhuvisha vasu ẽivãpe, ĩmẽire mbeushu verã. ¹⁸ Syndarore 100'õ juhuvisha oho syndarore huvisha vasu'õperã heishu: Pablo mbyperesoarea rãnga shyrẽino'irã jurureshe aru verã ko kunumi, shara ĩmẽindare mbeu nde verã. ¹⁹ Hãrã syndarore juhuvisha pysyshu ipoperã raha hã'ẽiĩ õpe pyrãndushu: Mbaivara rymbeuposhe? ²⁰ Kunumi heishu syndarore juhuvisha: Judio reta rãnga ĩñiñono pẽinte nẽiẽipe jurure nde verã hareka ryrahashu verãre pare Pablo Judio juhuvishare hẽinonde, mbai pyrãndu kaviveshu verã rãĩmi. ²¹ Tẽivã avy rojakui, ĩmẽi'ãmo hasave 40 kuimbai ñemiãpe hãrõ'õre pehupi, mẽiẽi reta ĩñẽiẽi Tumpape mbaimba hou verã hareka mbusururu verãre jukapeve Pablo. Ã'ẽi ĩmẽima ñynoĩ haipe, hãrõ mbaivarapo rere jyve. ²² Haivi syndarore juhuvisha mondojy kunumirã heishu mbavamba mbeushu verã kova. ²³ Haivi syndarore juhuvisha vasu hẽino mõkue syndarore 100 ẽiva juhuvisha heishu myhẽivã verãre 200 syndarore yvyipĩĩ'iare, 70 kavajure'iare hareka 200 mĩĩ ĩmẽireare pyntumarã oho verãre tenta Cesareape. ²⁴ Hareka heijy ñonokavishu verãre pẽinte kavaju Pablo jupihe verã hareka vãhẽi kavi oho verã mbaimba jehushuape Ẽelix Roma juhuvisha ẽivãpe. ²⁵ Hãrã mẽiẽishu reta kuatia raha verã, Ẽelix pevarã heiva: ²⁶ She Claudio Lisias, arymymarãndu huvisha vasu hekokaviva Ẽelix Romape'õ . ²⁷ Kova kuimbai Judiore pysyva hareka jukaserimareare, tẽivã shysyndarore handi ahekyjyshi reta shara hai heishe Romavarã. ²⁸ Pota aikuakavi marã'ĩrãra maĩ jyrehe. Haivi arahakajy Judiore juhuvisha vasure ñymbatyseape. ²⁹ Katy mbyparaha vekua rehemba maĩjyrehe, tẽivã vãhẽiashu reta mbai reherapo juka reta hareka ambyperesoka verã. ³⁰ Mbe'uhashe imenda'ẽi pota ñemiãpe pysyva ko kuimbai jukaha vẽira. Hãme rãnga amondo nyrẽindape hareka añonojyveshu porãmba pirĩñono'iare hei verãre nynonde mbaiva rehera ñymbyvaishohe. ³¹ Hãrã syndarore he'iashuva rãĩmi, pynturã raha reta Pablo Antipatrispe. ³² Parejyrã syndarore yvyipi'iare opajy jyeru kuartelpe, tẽivã kavajure'iare ohoĩ handi reta Pablo. ³³ Vãhẽima jyraha Cesareaperã, mẽiẽishu reta huvisha kuatia hareka Pablo. ³⁴ Huvisha opama mbijeta kuatiarã, pyrandushu Pablo mape'õra hai hareka kuama Ciliciape'õrã, ³⁵ heishu: Ajasakapo ndyrehekui ñy'ãpo'i ndyrehevare oumarã. Hãrã he'ika ñyngarekohe verãre Herodes hoo vasupe.