¹ Apolos'ẽiẽi teri Corintoperã, Pablo hasa tentami retaipirã vãhẽi oho Eẽesope. Haipe hesha mbovy Hesu jyrojaheare, ² hãrã pyrandushu reta: Mẽi'ẽiãra jyvepe Espiritu Santo pirojamarãme? Haire heishu: Hẽinduhãã rãnga'ore ẽiẽivã Espiritu Santo. ³ Hãrã Pablo pyrandushu reta: Mãrãva ñymyngaraira pijapo? Haire heishu: Juan pyrymyngaraivape. ⁴ Pablo heishu reta: Añete rãnga Juan myngarai opaite heko porãmba vekuaivi ñymbeujy vekuare, tẽivã heishu kuaretare jyrojahe verãkui hai haykue ou verã, hokava jaishu Hesu. ⁵ Kova mbai hẽindu retarã ñymyngarai reta Ñandeja Hesu heepe. ⁶ Haivi Pablo ipo ñono'ĩãre retarã, Espiritu Santo ou ĩãrẽi reta hareka ñẽiẽi yngaivapy ijeta retarã mbeu reta Tumpa he'ikava ñẽiẽi. ⁷ Opaite ñymyngaraivare ẽimba haipe 12 kuimbai. ⁸ Pablo mbahapy jasy kavimba oho Judiore ñymbatyseape, haipe kyjembape mbeu Ñẽiẽi hareka õñehãã mbyrojaka jyve kuaretare Tumpa huvisharã'õpe'õ ryheva. ⁹ Tẽivã ã'ãmore pya mytãta hãrã ñatẽiy roja reta, hareka ijeta porãhe reta Tape Py'ahuva kuaretare hẽinonde. Hãrã Pablo syryshi reta hareka raha jyrojavare eskuela pẽinte kuareta Tirano he'iashua pyrymboi'õpe. Haipe opa ara ijetashu reta. ¹⁰ Mokue ãño kavi kyrã japo, hãrã opaite ikovare yvy Asiape, hẽindu Ñandeja ĩñẽiẽi. ¹¹ Tumpa hetamba japo mbai heshaha verã Pablo rupii, ¹² tarapo hareka mondeava Pablo hetere oja vekua rahaha ñonohahe ñymbairasy vekuare, hãrã haire opa kuerahe ñymbairasykue, hareka mbaiposhyre opa õheshi reta. ¹³ Tẽivã ĩmẽi'ẽi Judiore vatarei'iare mbaiposhyre kuareta retaivi mohe jyreare pota poryjyre Ñandeja Hesu hee, hãrã hei reta mbaiposhype: Hesu, Pablo mbeu'ia heepe hai pee, pẽihẽishivi! ¹⁴ Hokava japo Judio Esceva he'iashuva tay 7 õre, hai jyve paire juhuvisha pẽinteva. ¹⁵ Tẽivã mbaiposhy ĩjetarã mbyhovairã hei: Aikuaa rãnga Hesu, hareka aikuaa mbavara hai Pablo, tẽivã, peera mbava? ¹⁶ Haipe ko kuimbai mbaiposhy ĩmerevekua opohe reta, pyrãtãkuepe jepyhe reta, hãrã nanitei ñyvãhẽi reta haivi, hareka opa mbypepere reta. ¹⁷ Opaite Eẽesope'iare, Judiova hareka haimba Judiovare, kuaama reta kovarã opa kyje reta hareka õmomba'ea vasu Ñandeja Hesu hee. ¹⁸ Heta haipe hãirã jyrojavare ñymbeujyrã mbeu reta mbai porãmba arykai japo vekuare, ¹⁹ hareka opaite paje'iare veru jykuatiare opa hapyka kuaretare hẽinonde. Haipe pya mbijeta ñynoihe reta kuatia hepykuerã, hipity 50 mil kyrypoti nikere! ²⁰ Kyrã Ñandeja ĩñẽiẽi ñymbyhetave oho hareka heshaka ñymbaikatukue. ²¹ Kova mbai opama hasarã, Pablo hei oho verã tenta Jerusalenpe, hasa verã Macedoniaipi hareka Acayaipi. Haivi heijy haipema'ẽirã oho verãjy Romape. ²² Hãrã mondo mõkue mborysereare Macedoniape, Timoteo hareka Erasto, hai pytave teri ẽiẽi Asiaperã. ²³ Hokava arape tape py'ahuva rehe, iko porãmbava tivishava, ²⁴ hokava japo pẽinte kuimbai Demetrio he'iashua, kyrypoti verava tyrã'anga japo'ishia. Kova kuimbai japo ta'ãnga mishĩvamire tumpa Artemisa ryheva, hareka heheta kyrypoti pysy'ĩãrẽi reta mba'apo'i hãndiare. ²⁵ Mbatyka mba'apo'i hãndia retarã heishu: Karaire, pee rãnga pikuaa kova jajapova rupii jaiko katurã. ²⁶ Tẽivã pyhesha hareka pyhenduva rãĩmi, Pablo hei kuareta japova tumpa rã'anga haimbava tumpa; kyrã hetavape heirã roja, ha'ẽiã ko Eẽesopeĩ ajete rãnga opaĩ tenta Asiaipi. ²⁷ Kova rãnga porã'ãĩte, shara ñavendeñaĩva katu oparei ñandyhevikui, hareka kyrãĩpo jehujyshukui tupao opa rupi kuaahava tumpa Artemisa, hareka opareiiposhi tumpa taupe hã'ãnga omomba'eava, hai hokava õmombaiva opa Asia jy'yvyipi hareka yvy jerekue. ²⁸ Hẽindu reta kovarã, poshyite jyre hareka sapuke reta: Tiko puku Diana Eẽesiovare ñu tumpa! ²⁹ Ikoma kuavẽiãpy reta, opa ikorai reta hoka tentape'õre, pysy reta Gayo hareka Aristarco, mokue kuimbai Macedoniava mĩ'ĩrũ jyreva Pablo, hareka mbytyryry raha reta oo vasu ñymbatyhase'õpe. ³⁰ Haipe Pablo pota iche'i kuaretare ijetashu verã, tẽivã Hesure jyrojavare ma'ẽiĩãhe iche. ³¹ Haaipe'ẽiẽi jyve mburuvishare Asiape'õ, Pablo ñi'ĩrũre haihushuva, mondokashu ñẽiẽi potamba iche verã haipe oo vasu ñymbatyhaseape. ³² Ã'ãmo haipe ñymbaty'õre sapukerã yngai hei'i, ĩrũre kyrãĩjy yngai hei'i, shara kuaretare kuãã japo verã opa ikorai reta hareka ã'ãmore kuãã reta mbai verãra ñymbaty reta. ³³ Hãma kuaretare mbyteivi nohẽi reta pẽinte kuimbai Alejandro he'iashuva, Judiore maña mondo reta kuaretare hẽinonde. Hãrã Alejandro ipope myha'ãnga jasaka verãre, ijeta verã Judiore rehe hẽinta'õre hẽinonde. ³⁴ Tẽivã kuaama reta hai Judiovarã, opa sapuke reta mokue ora pukukue: Tiko puku Diana Eẽesiovare ñu tumpa! ³⁵ Hãrã mbapara'õva hoka tentape, kuaretare opama mbijasakarã hei: Opaite Eẽesovare, opaite ko yvy jerekue kuaa ko tenta Eẽeso ẽiẽi ipope ñyngarekohe verã ko tupao tumpa Artemisa hareka ha'ãnga, vate araivi vejyva. ³⁶ Mba'ety rãnga teri ko heiva ãñembaje'i, hãrã piñimbypya vapyĩ hareka avy pijapo maĩnunga pypya pimbijeta kavimbaterihevape. ³⁷ Shara kova kuimbaire pee peruva, mba'ẽiã japo reta, jaheãvãĩjyhe reta ko tumpa Artemisare. ³⁸ Hãrã Demetrio, mãĩrã mba'apo hãndivare ĩmẽire hei verã hapisharerã ha'ẽirã ẽiẽi mburuvisha pirimbivache'ia; toho ẽivãpe tijeta hãndi. ³⁹ Pee jyve ĩmẽipyre pirure verãrã, katupo jaijetahe ñymbatyha'õpe mburuvishare hãndi. ⁴⁰ Shara katupo he'ia ñandyrehekui opa ñapũãva mburuvishare. Hareka pyrãndu ñande mãrã'irãra opa pikorai, jaikuãpokui jaishu verã. ⁴¹ Hãrã kova opama heirã, ñymbatyvare opajy oho.