¹ Haivi Pablo õhẽi tenta Atenasvirã, oho Korintope. ² Haipe ijesha hãndi pẽinte Judio Akila he'iashua yvy Pontope'õ, hãĩrãã oujy hyreko Priscila hãndi Italiaivi, shara huvisha Claudio ñonombashu reta opaite Judiovare mohẽihajy verãre Romaivi. Pablo oho mãĩhe reta, ³ hãrã haire japojyre oo mondehaivi japoava, pyta haipe mba'apo hãndi verãre. ⁴ Vãhẽima putu'uava jy'ararã Pablo ohoñoĩ Judiore ñymbatyseape, ijeta hãndi verãre Judiore hareka griegore, potatẽi rojave reta Hesu haiva Mesía. ⁵ Silas hareka Timoteo vãhẽi jyveru Macedoniaivirã, Pablo ñimiñeeretei'i hareka heishu Judiore Hesu haiva Mesia. ⁶ Tẽivã haire õñepyrõ ñymbyvaishohe hareka jahehe reta. Hãrã Pablo mẽitẽimo mondeva heshaha verãrã heishu reta: Ã'ẽi jaheapo pyndyrehe, tẽivã aikuaveamapo shekui. Hãrã ã'ẽi ahamapo haimba Judiovare mbytepe. ⁷ Haivi õhẽi sinagogaivirã, oho pẽinte kuimbai Tisio Justo he'iashua hẽintape, haijyve pẽinte kuimbai õmombaiva Tumpa, sinagoga hyvache. ⁸ Hãrã Crispo sinagogape mĩñakã'õ hareka opaite hẽintape'õre jyroja jyvehe Ñandeja, hareka heta Corintovare hẽindu hokava nẽiẽirã, rojarã, ñymyngarai jyve reta. ⁹ Pẽinte pyhare Ñandeja ijetashu Pablo hesape'ouva rupive heishu: Ijeta katu jyvyĩño, avy ñimĩchirĩrĩ, avy kyje! ¹⁰ Shara she ãĩme'ãĩ nendie, mba'ety poko ndyrehe verã mãĩnunga porãmba japo ndyreverã, shara heta'ẽi kuaretare jyroja shyreheva ko tentape. ¹¹ Hãrã pẽinte ãño 6 jasy kavi Pablo pyta Korintope mboihe reta Tumpa ĩñẽiẽi. ¹² Tẽivã Galion huvisharãteri'ẽi Acayaperã, Judiore ĩñiñono pẽinte ñẽiẽipe pũãhe reta Pablo, haivi raha huvishare hẽinonde, ¹³ heishu reta: Kova kuimbai rãnga pota opaite kuaretare jyrojaheshu Tumpa, yrykuatiape kyrãmbatẽi heiva. ¹⁴ Hãrã Pablo oñepyrõma ĩjeta verã Galion heishu Judiore: Pee Judiovare ã'ẽi haipo pee, ko kuimbai purukavarã mãĩrã kuatia mbyparava ñymbyvaishohearã, ãpyryrẽindutẽi verã rãnga. ¹⁵ Tẽivã ñẽiẽi rupii hareka tyree rupii mãĩrã pyndykuatia reherã, pee teivapo pymãĩhe, shateẽi huvisharã ãĩ hokavape. ¹⁶ Hãrã opa mohẽi reta haivi. ¹⁷ Hãma opaitea ou ĩãre reta Sostenes Judiore ñymbatyseape huvisharã'õ, hãrã haipe nũpa jyre huvishare hẽinonde, tẽivã Galion mba'eãshu. ¹⁸ Tẽivã Pablo heta arave pytajy Corintope, koñe marãndushu Hesu jyrojaheare, hãma jupi reta varkope Priscila hareka Aquila hãndi oho verã Siriape. Haivi tenta Cencreape Pablo ñakã mysãka japo verã ĩñẽiẽi mẽiẽishu vekua Tumpa. ¹⁹ Vãhẽima jyraha Eẽesoperã, Pablo heja Priscila hareka Aquila, haivi oho Judiore ñymbatyseape, haipe ijetashu reta Judiore haipe ñymbaty'õre. ²⁰ Haire jurureshu reta mbovy aramive pyta verã haipe, tẽivã Pablo ñatẽiy pyta. ²¹ Koñeĩ hei: Aipota rãnga Jerusalenpe ahasakui ko arete ouva.ẽ Tẽivã Tumpa heirã aipo apyryreshajykui. Haivi Pablo jupi varkoperã oho Eẽesoivi. ²² Vãhẽima jyraha Cesareaperã oho Jerusalenpe marãndu verã tupaope'õre, haivi ohojy Antioquiape. ²³ Haivi heta arama pyta haiperã, õhe vatajyhupi, pepẽinteĩ vãhẽi Galacia hareka Ẽrigiaipi, mykyrẽiyjy Hesu jyrojaheare. ²⁴ Hoka arape vãhẽi Eẽesope pẽinte kuimbai Judiova Apolos he'iashua, tenta Alejandriape'õ. Ĩñee katui'ia ijetarã myrẽikey kuaretare hareka kuaa kavi Mbyparahava Tumpa ĩñẽiẽi. ²⁵ Hai mbo'eha kavihe Ñandeja hape, kyrẽi'ype pyrẽimboi hareka mbeu kavi Hesu ryheva, ajemãĩ koñeĩ kuaa Juan ñymyngaraiva ryheva. ²⁶ Apolos õñepyrõ kyjembape ñimiñẽiẽi Judiore ñymbatyseape, tẽivã Priscila hareka Akila hẽindurã rahashu reta hã'ẽiĩ'õpe, mbeu kavivejyshu reta Tumpa hape. ²⁷ Hãrã Apolos ohomapo'i tenta Acayaperã, Hesu jyrojaheare heta mykyrẽiyshu reta. Hãrã mbyparashu reta kuatia Hesu jyrojahea haipe'õre myvãhẽi kavi verãre haipe. Vãhẽima oho Acayaperã heta mbory jyve Tumpa pyakavi rupii jyrojavare, ²⁸ shara heshaka opaite Judiore hynonde haire javyvape, mbyheshaka kavi reta kuatia rupii Hesu haiva Mesía.