Capítulo 8
Jesus aptacmelcasecja lhema enenlhet actepelcammalhca apiempec (leproso)
1
Apteiapmec nac Jesus neten lhienep acjaiam, ca apquelieplecjo lhnac apentalhema enenlhet ma'a.
2
Ca aptetescai'o lhnac lhema enenlhet (leproso) nemmasquema actepelcammalhca apiempec ma'a, apqueltanentamo lhnac aptapno'oc nalhepop napaqtec ma'a, lhna aptemac:
—Apuesque ¿apqueltawe ie' etacmelcasecjac
eiempec anac, je?— lhna aptemac ma'a.
3
Ca apnenqueno lhnac Jesus apmeioc tacjaplhet, lhnac aptemac apcatemmoianca:
—¡Jai, asqueltawec atacmelcasecja lheiap, cotacmelecja no apiempec anac! — lhna aptemac ma'a. Colhuawec anquec nac aptacmelecjac ma'a,
4
coca apacmetquescamawec nac enenlhet Jesus ma'a, lhna aptemac apcanemo:
—Melhen anquec actacja apuetai'a, wanlha toca engiacja apcacjanquelha nac m'a sacerdotes cacpota eluetac aptacmalueiam lheiap ma'a, esacjo ta njan apcaicamoc Engiapom Neten, ca actemacja lhnac nanec aplheianma Moises — lhna aptemac apcanemo Jesus ma'a.
Jesus aptacmelquescaiam apquemjama apmanie soldado Romano apquennencasecama
5
Apmeiecjec nac Jesus apiau'acja temma Cafarnaum, ca aptetescai'o lhnac lhema apquemjama apmanie
soldados romanos,
6
lhna aptemac apcanemo:
—Apuesque, asquennencasecama lhquec acmasca apiempec asnemacja', awanjec aplengaianco acmasca, metca apcactemmap antemescasac ma'a —lhna aptemac.
7
Ca apcatemmoianca lhnac Jesus ma'a, lhna aptemac:
—Angiacja ta m'a, atacmelcasecja ta —
8
Coca lhnac ptemac mocjom apquemjama apmanie:
—Apuesque, nwannalhquec ewalhoc eclhec asnemacja lheiap, wanlha asqueltawec niecje etnec moc apaioma la'a cacpota etacmelecjac asquennencasecama.
9
Asiawec co'o apquemjama apmanie apacmetqueso la'a apquennencasecama, engiasecjoc aptacja la apaioma. Ascasecjawec co'o actacja njan apaioma apquemjama apmanie ejencoc. Co'o njan asquemjama emanie, ca ascapaso la asquennencasecama mo'oc necja, ca asquelto la elhiemoc, nlho ca la ellanac caselhaja, apqueliajacjawec na aspaioma m'a —lhna aptemac ma'a
10
Mpelapquescanquec nac aplengai'a Jesus ma'a, lhna aptemac apquellanemo enenlhet apquellelto apquelieplecama m'a:
— Ca enenlhet anac ja'e tep anquec coca manjei'asqueiam, manac co atai'ac aspaiomolhema co Israel aptonac ja'e.
11
Ellailho no, lhamacjo enenlhet'awoc apquelleniem'o tep acnem cacpota njan mancolha acnem elelhiemoc jata, elpasenwomoc jata nentoma actacmelaicama lhma apuesque apancoc Engiapom Neten, apquetlhelhma'ac jata njan Abraham, Isaac, cacpota njan Jacobo.
12
Coca apquellelto lhta apmaniaie apquelleltammap aniecje elpasenwomoc nentoma m'a, ncolhec jata alliengiawo iocjalhma, ienactesacja lhma m'a, jata eliapcalhec ma'a, ellengancoc jata njan acmasca, ncolpelhcama ta apiempeioc aquieplomo apquelienwactema aquieto ienactesacja lhma —
13
Netamen ma'a lhna aptemac Jesus apcanemo apquemjama apmanie soldados romanos:
—Etaqjo ta mocjom apnemacja, ncotnec jata nquec aptacmelecja apquennencasecama aniem'o meiasqueiam lheiap— lhna aptemac ma'a.
Colhuawec nac aptacmelecjac apquennencasecama m'a.
Jesus aptacmelquescaiam Pedro apepiamong cacpota njan apentalhnema enenlhet
14
Pedro apnemacja lhnac apmeiecja Jesus, apuetanwecjo lhnac Pedro apepiamong aquietnemo tacjalhet actanema m'a, awanjec nac acmelhanma aiempec ma'a.
15
Ca apmamo lhnac amec Jesus ma'a, actacmelecjo lhnac, colhuawec anquec nac nquenmecjac neten, ca alanesquescamo lhnac na aptoma Jesus ma'a.
16
Ca apquelienacteseianca lhna lhma m'a, aplaclentamo lhnac enenlhet'awoc queliacjameio anmaicama. Apquelentepquescanquec nac Jesus queliacjameio lhema apaioma lhna ptemac ma'a, cacpota njan apqueltacmelquescaiacmo lhnac lhamacjo actemacja anmasca apiempeioc ma'a.
17
Nwai'ac nac acnem actemacja lhnac nanec aplheianma secama ania'a Isaias, lhnac nanec aptemac:
«Apmec mongelliennactema, apatmacjo njan anmasca engiempeioc»
lhna aptemac ma'a
Aquientalhnema anieploma Jesus
18
Apuetai'ac nac Jesus apentalhnema enenlhet apuacjei'awec nac ma'a, ca apquelpacmetquescamo lhnac apqueltamesaicamoc ma'a cacpota enmeiacjac mo'oc necja sanga.
19
Ca aptetescai'o lhnac lhema jengetlhecmoscama jenganemacja Moises, lhna aptemac apcanemo:
—Jengetlhecmoscama, co'o ta njan aieploma apmanquelha la lheiap — lhna aptemac
20
Ca apcatemmoianca lhnac Jesus, lhna aptemac:
—Malhec alhancoc maleng, alhano'oc na nnac anatatco'oc, coca Enenlhet Apquetca nac mamma apnemacja la'a cacpota eianposacpoc ma'a—lhna aptemac
21
Ca aptemo lhnac na apcanemo lhema apqueltamescama Jesus:
—Apuesque co'o niecje njan asmac'ac aieplomaja jatoca apquetsepo ta tata, cacpota anwatonnec secjec ma'a — lhna aptemac
22
Ca apcatemmoianca lhnac Jesus, lhna aptemac:
— Jeiploma colhuawe nac lheiap, apquellelto malha apqueletsepma
nac jatoca elcatonnec apqueletsepma apanco'oc—lhna aptemac Jesus ma'a
Apmasquescama Jesus alhcaiam iemmen aquiennactema
23
Apcanetuecjo lhnac Jesus loma nemmen cacpota njan apquetlhelhma'ac apqueltamesaicamoc ma'a,
24
ca apquetlhengamo lhnac nemmen ma'a, apteianmec noca Jesus ma'a. Mpelapquescanquec nac acuai'o alhcaiam iemmen aquiennactema m'a, ntalhnenquec nac iemmen alacjaiam au'alhoc loma nemmen,
25
ca apnaclhatecjasquecjo lhnac apqueltamesaicamoc Jesus ma'a, lhna aptaiancoc:
—¡Apuesque, jengeluonques no tep, nenmac'ac angelluaiwancoc —lhna aptaiancoc ma'a.
26
Ca apcatemmoianca lhnac Jesus ma'a, lhna aptemac:
—¿Se lha acto apquellac'o nac que? ¡Quetsec apqueliasqueiam quetlhencap!—
Ca apquenmecjo lhnac neten Jesus ma'a, apacmetquescamo lhnac alhcaiam cacpota njan aluata aquiawai'a, ca acuanmecjo lhna lhma m'a.
27
Nqueliemascanquec nac apualho'oc apqueltamesaicmoc ma'a, lhna aptaiancoc:
—¿Selha enenlhet jenca'ie, ncasecjawe nac alhcaiam cacpota njan aluata aquiawai'a? — lhna aptaiancoc ma'a
Apcanet enenlhet anmaicama queliacjameio aquieto Gadara
28
Apuecjec nac Jesus ma'a iocjalhma acuesai'a Gadara, aquieto mo'oc necja sanga. Apcanet enenlhet nac apquellomaca m'a queliacjameio anmaicama, aquieto aisecsec malhca'a, man nac alpeiwomo amai anac ma'a, lhnac apquellammacpoc ma'a. Necsa apqueltetescai'a lhnac Jesus ma'a,
29
nquelpaijecama lhnac atno'oc queliacjameio apualho'oc ma'a, lhna antaiancoc:
—¡Jesus Engiapom Neten apquetca! ¿Selha apquelto jengellanesquesec lheiap que', apqueltawe i'e jennactewasecja amanie' acuai'a acnem nentewasemmalhquelha ta, je?
30
31
Jengelentepcasquec jata nquec enenlhet anac, engianco ta angellentalhnenwomoc ietapomap anac, ca apquellawa nac ja'e nengaqte nac — lhna ntaiancoc.
Nengaqtec nac na apquellomaca ietapomap ma'a, aptoianco aptecamoc.
32
Ca apcatemmoianca lhnac Jesus ma'a:
—Jai', colentalhnenwom ma'a—
Ca allenteiapmo lhnac queliacjameioc enenlhet, allentalhnenwaiacmo lhnac ietapomap ma'a, apquengiaianco lhna apquelluaiwentamo acuacmo apallacmo conne sanga, apquelluaiweianquec nac ma'a.
33
Apquengiaianco lhnac na apquellelto apquellanecama ietapomap, apquenmeiecjo lhnac aquieto apiau'acja temma, ca apqueleltennanwecjo lhnac actacja apqueluetai'a ietapomap cacpota njan anmaicama queliacjameio' m'a.
34
Ca apsaujommacpo lhnac enenlhet apquenmeioiam apnacja Jesus ma'a, apquellapascai'o lhnac emjancoc po'oc temma.