Capítulo 7
Metca nengiennai'o anlhenec apuesai'a emmo'oc
1
—Necsa apqueluetai'a la apquelanai'a aptacja po'oc, meliennajo nquec apquetlheianma apuesai'a m'a, cacpota njan mancolhec alliennajo nema allanei'o apquetlhenammap quetlhencap ma'a.
2
Apqueliennajo la apquetlheianma po'oc, ncolhec jata njan aliennajo quetlhencap ma'a. Coca meliennai'o la apquetlheianma apuesai'a po'oc, mancolhec jata njan aliennai'o nema allanei'o apquetlhenammap quetlhencap ma'a.
3
Apquellanema mota po'oc quetlhencap apquellan'o la caselha ncolatsecama,
ncoietnac coca niecje njan aquiawai'a nquec caselha ncolatsecama apquellanecamoc quetlhencap.
4
Mancollapuanquec etlhenquesec po'oc apqueltemacja ncollatsecama ncanec nietnec na quetlhencap aquiawai'a nquec apquellanecamoc caselha ncolatsecama.
5
¡Janet napaqta'a quetlhencap! Amanie secjec ncaimelhquec eluatesancoc aquiawai'a nque nac meliamolhma quetlhencap, cacpota alhaiec etlhenquesquesec po'oc apqueltemacja meliamolhma.
6
Mellamo nquec semjeng
caselha acpocquenammalhca ncanec ncoltaclhec quelha quetlhencap ma'a. Mellamo nquec na ietapomap
caselha acmennawe
, ncanec elteianmecjac quelhaja—
Engiapom Neten jata ellancoc caselha altacmelo apquellelto la apquellelmalhnecama
7
—Elelmalhnama ta, ncolhe ta allanco'. Elquetam jata, eluetecjac jata m'a. Eluenama ta aquieto atong, ncolhec jata anmaiescaso atong ma'a.
8
Apquellelto la apquelelmalhnecama, ncolhec jata allanco m'a. Apquellelto la apquelquetansema, eluetecjac jata m'a. Apquellelto la apqueluenecama aquieto atong, ncolhec jata anmaiescaso m'a.
9
¿Apuanque i'e engiancoc metaimong necja tcoc apquetca enenlhet apmac'o la aptoma,
je?
10
¿Apuanque i'e engiancoc menasma apquetca enenlhet apmac'o la quelasma, je?
11
Niecje meliamolhma nac quetlhencap apuanca'ac coca ellancoc caselha actacmanma apquetca'ac, ca njan ma'a neten apanquec Engiapom Neten ellancoc jata caselha actacmanma aptengianco la'a.
12
Eltacmelques jata po'oc quetlhencap cacpota njan eliaqmoncasecjac ma'a aniem'o apqueltamelquescama, ca acto neten anquec ma'a aquiaspommalhca actemacja nac aclheianma jenganemacja Moises cacpota njan apquetsecama ania'a nnenga—
Nenieploma amai atquetse cacpota anwomoc aquiennactemacja ennengiec
13
—Elentelh atong atcoc, awanjec anquec coca atong ma'a cacpota njan amai acmaicamoc aquieto m'a nenlheneianlha, mantec enenlhet'awoc apquenmeiecja m'a.
14
Coca atong atcoc anac cacpota njan amai atcoc aquientalhnema anmancoc, acmaicamoc ma'a aquiennactemacja ennengiec, apcanete panquec coca apqueluetanweianma m'a—
Iamet actacmanma cacpota njan iamet ncolatsecama
15
—Ellajo ta apquelletsecama apquenmopuanca nac ania'a, apquetlhenacpe apancawe Engiapom Neten apquelapascama, coca apquenmopuana ania'a m'a. Apqueluacme mota na temma la'a apquellapiosecama, malha aptanco nac nepquesec, coca ellajo ta m'a, malha quemjawa'
apmapmose nac.
16
Eliecpelco ta quetlhencap enenlhet apqueluet'o ta caselha ncolatsecama apquellanai'a, malha acto nac aiwompenec la'a, ncollatsecama nac aquielhna, malha njan apto nac ato' mamma apielhna, wanlha apmo'oc.
17
Iamet actacmanma la'a, nietnec aquielhna actacmanma, coca iamet ncolatsecama la'a, nietnec na aquielhna ncollatsecama.
18
Iamet actacmanma la'a, mancawanquec ncoitec aquielhna ncollatsecama. Iamet ncolatsecama la'a, mancawanquec ncoitec aquielhna altacmanma.
19
Lhamacjo iamet la'a mancollatsecama aquielhna, ncoiaqtemenalhcac jata cacpota ncoclhalhca' natelh.
20
Eliecpelco ta quetlhencap enenlhet meliamolhma nlho ca la apqueliamolhma aniem'o apquellanecama aptancolha la'a—
Ellasecjo Engiapom Neten apquellelto la etnancoc apquennemolhema
21
—Apcacjanquec enenlhet jelleltema mota apuesque apancoc, coca moc apatno'oc, ncaimelhquec coca secjec amanie elleliejecjoc Engiapom Neten cacpota etnancoc apquennemolhema m'a.
22
Jata acuacmo ta acnem nema alpeiwesecja apquellanecamoc altacmelo caselha, nlhoca la njan ncolatsecama la'a, jata etnancoc jellana':
"Apuesque ejencoc, netlhenque mota ennenco'o apaioma lheiap, nellentepquescanquec na queliacjameio aniem'o apuesai'a lheiap, nengellan'ac na caselha jempelapquescama" jata etnancoc jellanac ma'a.
23
Coca jata atnec allana': ¡Eltaqjo m'a, enenlhet meliamolhma quetlhencap, moliecpelcac!—
Enenlhet nema apiamo ntasec apquellanai'a apnemacja
24
—Enenlhet apto apcailhemo cacpota njan apqueliejecjo asquetlhecmoscama nac, coca malha enenlhet acnema apiamo apquelanai'a la apiancanma nac metaimong aimenec aquiennactescama la aujoc, netamen elanac apnemacja m'a.
25
Ca acuo'o la alhcaiam iemmen acmamai'a, ncoiepecjac na iemmen aluata, mancoieujesama pa'at lhec ncanec nietnec aquiennactescama aujoc.
26
Coca enenlhet apto apcailhemo asquetlhecmoscama nac, meliejecjo njan, malha enenlhet metca apqatec apquelanai'a la apnemacja taicama ncoie tacjalhet lhepop la'a.
27
Ca acuo'o la'a alhcaiam iemmen acmamai'a, ncoiepecjac na iemmen aluata, ncocpelcalhcac na pa'at lhec—lhna aptemac Jesus ma'a
28
Nwaiacmec na nnelha apquetlhecmoscama Jesus ma'a, nqueliemascanquec nac apualho'oc enenlhet'awoc ma'a
29
aniem'o acmamose nquec apqueltennaicama Jesus ma'a, mancolhno lhnac ma'a apquetlhecmosecamoc anac jenganemacja Moises ma'a.