Capítulo 9
Aptacmelquescaiam Jesus metca aptapno'oc
1
Apcanantec nac Jesus loma nemmen apiecai'o sanga, apuecjo lhnac apcawacja apanque'.
2
Apquetsoiacmo lhnac apnacja m'a lhema enenlhet metca aptapno'oc aquieplomo aptanema.
Apuetai'ac nac Jesus meliasqueiacmo enenlhet ma'a, lhna aptemac apcanemo:
—¡Eiennecjojo, nnec acmasqueso meijamolhma lheiap!—lhna aptemac Jesus apcanemo m'a.
3
Apcacjaianquec nac na moclhem'a jengetlhecmoscama jenganemacja Moises ma'a, nquelpacmetecama lhnac apualho'oc, lhna ntaiancoc:
— Aptewasque nac Engiapom Neten apuesai'a— lhna ntemac alpacmetecama apualho'oc ma'a.
4
Apiamawec noca Jesus actemacja alpacmetecama apualho'oc ma'a, lhna aptemac:
—¿Se lha ntac alpacmetenca nac apualho'oc ncolatsecama quetlhencap que?
5
Nwa', jeleltennes no
¿Se lha alhewai'a nquec antec anganac metca aptapno'oc anac que, nnec masqueso meijamolhma lheiap, nlho ca la njan etnemecja neten, eiepconquesama no elhong, se lha alhiewai'a nquec que, je?
6
Colhua ta aluetasquesec aquietnema apmopuana Enenlhet Apquetca nac cacpota enmasquesquesec meliamolhma enenlhet'awoc— lhna aptemac Jesus.
Ca aptemo lhnac na Jesus apcanemo enenlhet metca aptapno'oc:
—Etnemecja neten, ema' aptanema nac, etaqjecja apnemacja— lhna aptemac ma'a.
7
Ca apquenmecjo lhnac neten enenlhet ma'a, apmeiecjo lhnac apnemacja.
8
Apquenmenaianquec nac enenlhet'awoc apqueluetai'o m'a, apqueltacmelquescamawec nac apquetlhenaianca Engiapom Neten apuesai'a m'a ncanec apquellaianquec aquiawai'a apquenmopuanca'a enenlhet'awoc.(MEJOR A Jesus)
Jesus apquelmalhnecama Mateo cacpota etnec apieplecama
9
Apteiapmec nac Jesus ma'a na temma Cafarnaum, necsa aplhengama apuetanwacmo lhta lhema enenlhet apuesai'a Mateo, apne lhta aquieto apmacmeianquelha apquenmamacja patacom impuesto ancoc Roma, lhta aptac Jesus apcano:
—Jeieplomaja—
Apquenmacje lhta neten Mateo m'a, ca apieplacjo Jesus ma'a.
10
Aptawocje lhta Jesus cacpota njan apqueltamesaicamoc conne pa'at
, apqueluo'o lhta njan moclhem'a apquenmaicamoc pataccom impuesto Roma cacpota njan enenlhet apquetlhenammap meliamolhma m'a.
11
Apqueluet'a lhta njan moclhem'a fariseos ma'a, apquelelmalhnenca lhta apqueltamesaicamoc Jesus ma'a, lhta aptancoc:
— ¿Se lha ntac aptawacjo nac lhemec jengetlhecmoscama apanco'oc anac quetlhencap apquenmaicamo nac patacom impuesto, cacpota njan enenlhet meliamolhma nac?—
12
13
Apleng'awe lhta Jesus ma'a, lhta aptac apquellano:
— Asua'ac co'o asquelquetansema enenlhet meliamolhma, mou'ac co'o asquelquetansema enenlhet apquelleltammacpo na apancawec apqueliamolhma. Nnawec aptaiancolha nac ponja ngiapom, ewata mota cacpota epasmoc anmasca nac apiempeioc, enenlhet apqueltacmelo la'a, metca anmasca apiempeioc na m'a, mengiaimecpoc ponja ngiapom la'a.
Ca ncaimelhcac elianwomjoc quetlhencap jengetlhecmoscama lhnac na nec lhennenga, lhnac nane nnema actemo m'a:
«Coca acto neten anquec ma'a nelietnai'o nac napaqta'ac enenlhet'awoc, manco lhnoc ma'a caselha apnaqtoscama apqueluanlhecamoc nenmescama nac Engiapom Neten»
Apquetlhecmoscama Jesus nengaqjasquesammalhco mec
14
Juan apquellauquescama iemmen na ngiapom apqueltamesaicamoc apquenmeiacjo lhta apnacja Jesus, lhta aptancoc apquellano:
—Ennenco'o cacpota njan fariseos nentaiancolha mota nellaqjasquesammalhco meq nentengiai'a Engiapom Neten ¿Selha ntemac metnaianco nac apqueltamesaicamoc anac lheiap? — lhta aptancoc ma'a
15
Ca apcatemmonca lhta Jesus ma'a, lhta aptac:
—Apquellelto nac apquellanemmap elpasenwomoc aliemjapma, mancollapuanquec ncolliepuamancoc cacpota njan ellaqjasquesacpoc mec, apno la mocjom apiesecsec apocquenammap aliemjapma. Coca ncowomoc jata acnem ncolhec aquiantemacjo apocquenammap anac, jato ca ellaqjasquesacpoc mec ma'a.
16
Mancolatsema nentalhnema apjapac angellapama apjalhnancoc ietamopai'a, ncanec eiaqsec jata m'a aniem'o apjalhnancoc, ncoianwomoc jata apquelietepaicamoc ma'a nentalhnema apjapac lhec.
17
Mancolatsema njan angiatmoc vino alhnancoc iempejec lhennenga aquietnemacja la'a, ncopaqlhec jata aniem'o aliaclheiam ma'a, nentewasquec vino cacpota njan iempejec. Coca m'a ntasec angiatmoc vino alhnancoc, iempejec alhnancoc najan cacpota mancopaclhec, mancoianquennalhquec najan— lhta aptac Jesus ma'a.
Nqueluana tcoc atsepma cacpota njan nqueluana acmasca aiempec
18
Apne lhta mocjom Jesus conne pa'at ma'a apquetlhecmoscama, ca apuo'o lhta lhema apquemjama apmanie judios, apquelteclhecuo'o lhta aptapno'oc nalhepop apcammelhacja Jesus, lhta aptac apcano:
—Eietca lhquec nquetsepac colhuawe nac, ca apmeiacjo la lheiap cacpota enenquenec apmeioc tacjalhet, ncotnecjac jata mocjom alhnancoc— lhta aptac.
19
Ca apquenmacjo lhta neten Jesus ma'a, apieplacjo lhta cacpota njan apqueltamesaicamoc apquetlhelhma'ac.
20
21
Necsa aplhengama lhta Jesus ma'a, apieco'o acnacja lhema nqueluana aquiawai'a ema ancoc nac ma'a, 12 iantelhcapa lhna ntemac aclengaianco m'a. Ca acuet'o lhta Jesus ma'a, acpacmeteianca lhnac au'alhoc ma'a, lhna ntemac:
—Ca wanlha asmanwacmo ta apcaqlapmmap Jesus, atacmelecjac jata —lhna ntemac aclheianma au'alhoc
Ca actetesco'o lhta aquieto apcapoc, acmanwacmo lhta apcaqlammap Jesus ma'a.
22
Apencacpe lhta Jesus ma'a apuet'o nqueluana, lhta aptac apcano:
—Mancotnama au'alhoc lheia, ntacmelacjec aniem'o mancoi'asqueiam—lhta aptac. Colhuawe lhta ntacmelacjac ma'a.
23
Apquempacja lhta mocjom aplhengama Jesus ma'a apuacjo apnemacja apquemjama apmanie judios, necsa apuecja lhta ma'a, apqueluo'o lhta enenlhet apquennecmasecamoc, aptaianquelha lhnac ma'a amanie nema atonnema la apquetsepma, apentelhe lhta enenlhet apqueliapqalhema m'a,
24
lhta aptac Jesus apquellano:
—Elentep jenque'e, mancotsepac nqueluana atcoc anac, ntenque' —lhta aptac
Apquellasmesque lhta enenlhet Jesus aniem'o apqueluannama,
25
ca apquelentepcaso lhta Jesus aplhamacjo enenlhet ma'a, aptalhno lhta njan au'alhoc pa'at ma'a, ca apmamo lhnac amec nqueluana atcoc, anmecjo lhnac na neten ma'a.
26
Nquetcama lhta ania'a lhmanquec jam actemacja acuetammalhca m'a.
Apqueltaqmelcasecja Jesus apcanet metca apaqto'oc
27
Aptepque lhta Jesus au'alhoc pa'at ma'a, aplheng'o lhta mocjom, ca apquelieplocmo lhta njan apcanet metca apaqto'oc ma'a, apqueluenenca lhta neptamen, lhta aptancoc ma'a:
—¡David aptawen neptamen
, elietnajo no nengaqta'a ennenco'o!— lhta aptancoc ma'a.
28
Ca aptalhno lhta Jesus conne pa'at, apquelemjacme lhta njan metca apaqto'oc anac ma'a, lhta aptac Jesus apquellano:
—¿Ma nlho eliascacmoc asmopuana altacmelcasecjac quetlhencap, je?—
—Jai' apuesque — lhta aptancoc ma'a.
29
Ca apquenmanwacmo lhta apaqto'oc Jesus ma'a, lhta aptac:
—Jai', altacmelcasec jata aniem'o meliasqueiam quetlhencap—
30
Apqueltacmelacje lhta m'a, apqueluetacjo lhta nja lhma m'a, ca apquellanco lhta njan apaioma Jesus ma'a, lhta aptac:
—Metlhenama nquec actacja nac apqueluetai'a—lhta aptac apquellano m'a.
31
Coca apquetlhenama lhta ania'a m'a lhmanquec jam actacja apqueluetai'a.
32
Netamen ma'a apquellentepo lhta enenlhet apqueltacmalueiam, cno lhta njan aquiantemacmo apnacja Jesus enenlhet metca apaioma queliacjameioc actewascama.
33
Ca aptepcaso lhta Jesus queliacjameio' apualhoc enenlhet, ntepacje lhta njan apaioma enenlhet ma'a. Mpelapcasque lhta apqueluetai'a enenlhet'awoc ma'a, lhta aptancoc apquelpacmetquesacpo:
—¡Mancotemmalhcac secjec anque lhta apiesecsec Israel aptacja nac ja'e!— lhta aptancoc enenlhet'awoc ma'a.
34
Lhtoca aptancoc na fariseos ma'a:
—Amjama amanie queliacjameio' aicamoc apmopuana Jesus cacpota engiapuanac elentepquesec altemo lhemec queliacjameio nac ma'a —lhta aptancoc ma'a
Apquelietnai'o napaqta'a enenlhet Jesus
35
Apsaujawe lhta Jesus apcaniemjaicama lhamacjo apiau'acja la temma cacpota njan temma apquetcoc. Apquetlhecmosque lhta mota nema acnecjelha la'a, apqueleltennascanquec lhta njan ania'a actacmanma aniem'o Engiapom Neten, cacpota njan apqueltacmelquescaiam enenlhet lhamacjo actemacja la anmasca apiempeioc cacpota njan alasquelha la'a.
36
Apqueluetanwacme lhta apentalhnema enenlhet, apquelietnawe lhta njan napaqta'a m'a ncanec anmaiosac'a lhta apualho'oc ma'a, metca njan apquelliennactema, apquelnawe lhta malha nepquesec anac metca nema alanecama.
37
Netamen ma'a lhta aptac Jesus apquellano apqueltamesaicamoc:
—Jawe ngiapac, awanjec anque' nennaclhema aquielhna, coca apcanet apanque apquellelto apquenmacmecamaja.
38
Elelmalhnama ta apto apancoc aquielhna nac cacpota ellapacsec apquenmacmesaicama mocjom cacpota ellanquesocjac ma'a
—lhta aptac Jesus.