Capítulo 23
Apquellescama Jesus enenlhet'awoc
1
Lhta ptac Jesus apquellano apqueltamesaicamoc cacpota njan enenlhet'awoc ma'a:
2
— Jengetlhecmoscama jenganemacja cacpota njan fariseos apquellelto apquelletlhecmosecamoc jenganemacja Moises.
3
Ellasecjo ta actacja lhamacjo apquetlhecmosecamoc apanco'oc coca meluanamo nquec aptaianquelha nac ma'a. Apquetlhecmosquec mota mo'oc caselhaja, moc actema coca apqueltemenwacmoc ma'a.
4
Apquellanai'a mota jenganemacja aquientalhnema anieplauquesec, coca melellieplauquescamac quetsec anquec la m'a.
5
Apquellanesquescanque mota alhancoc waccajac atcoc jenganemacja lhennenga conne, cacpota enaqtetec aquieto nnelha napa'at cacpota njan apoctong. Apquelianwencaiacmo njan apqueleiwecama nepua'ac apquellentalhnema m'a. Aptanque mota m'a cacpota elelluetac enenlhet apqueltemacja apquelleliejecjo Engiapom Neten.
6
Ca apquelpasenwacmo la apcacnecjelha la'a cacpota njan actacmelancolha la lhma m'a, apcacjenwacme mota apqueluescaie nac apcacjaiancolha.
7
Wanlha mota apquelleltemo ncolhec alpaiwesanco malha apqueluescai'e la m'a, apquelleltemo njan ncolhec alleltancoc jengetlhecmoscama.
8
Coca quetlhencap apquellelto nac asqueltamesaicamoc mellelto nquec ncolhec aleltanco jengetlhecmoscama ncanec apnec lhema pjapac apanquec jengetlhecmoscama apanco'oc, ca njan apiesecsec anac quetlhencap apquelialheng'a apancawec ma'a.
9
Melleltamo nquec enenlhet la jengetlhecmoscama ngiapom
, wanlha coca lhema jengetlhecmoscama ngiapom apanco'oc quetlhencap apno m'a neten.
10
Mellelto nquec eleltancoc enenlhet apuesque apanco'oc quetlhencap, ncanec apnec walhna lhema apjapac apanquec apuesque apto Cristo.
11
Coca apquenmac'o la etnancoc neten apancawe apqueliaspommap apiesecsec anac quetlhencap, jata etnancoc ma'a aptaiancolha nema allennencasecama nac.
12
Enenlhet apquelleltammap apanquec neten apqueliaspommap, ncolhec jata altesmesquesacjo coneng apancawec ma'a. Coca enenlhet apquellelto nac coneng apancawec, ncolhec jata altemesquesacjo neten apancawec apqueliaspommap ma'a.
13
14
!Quetlhencap la ie' jengetlhecmoscama jenganemacja cacpota njan fariseos, janet apualho'oc quetlhencap! Apquellapacjec atong neten ma'a cacpota melentelhec enelhet'awoc apquenmajai'a la elentelhec ma'a, quetlhencap jata njan melentelhec ma'a.
15
!Quetlhencap la ie' jengetlhecmoscama jenganemacja cacpota njan fariseos, janet apualho'oc quetlhencap! Apquenmanque mota jalhma nquec jam aptengiaicamoc enenlhet apquelieplecama la'a, netamen apqueltemesquescanquec neten apancawec meliamolhma m'a, coneng quetlhencap, nquelietawec enmancoc ncospaneiacja talha.
16
¡Quetlhencap la ie', malha metca apaqto'oc apqueliantemaicama la po'oc! Apquetlhecmoseianque mota quetlhencap lhema enenlhet apenescamo apqueltennascama apaioma elanac caselha la'a, ca njan elanac juramento aquieplomo m'a Engiapom Neten apnemacja, coca apuanquec jata meieplauquesec actacja apaioma lhquec. Coca enenlhet apenescamo apqueltennascama apaioma elanac caselha la'a, ca njan elanac juramento oro aquieto Engiapom Neten apnemacja, netamen coca m'a mancapuanquec meieplauquesec actacja apaioma lhquec.
17
¡Metca atlheianma apualho'oc quetlhencap, malha metca apaqto'oc najan! Engiapom Neten apnemacja neten anquec aquiaspommalhca, jawe oro. Ca Engiapom Neten apnemacja nac ntemescasquec acmennawe oro napaqtec Engiapom Neten.
18
Apquetlhecmoseianquec na quetlhencap lhema enenlhet apenescamo apqueltennascama apaioma elanac caselha la'a, ca njan elanac juramento aquieplomo aluanlhemmalhquelha
nac caselha, coca apuanquec jata meieplauquesec actacja apaioma lhquec. Coca lhema enenlhet apenescamo apqueltennascama apaioma elanac caselha la'a, ca njan elanac juramento apquieplomo apmescama caselha Engiapom Neten aquieto neten aluanlhemmalhquelha, mancapuanquec meieplauquesec actacja apaioma lhquec.
19
¡Malha metca apaqtco'oc quetlhencap! Aluanlhemmalhquelha nac caselha nemmescamacja Engiapom Neten acto neten anquec aquiaspommalhca, mancolhnoc nemmescama nac Engiapom Neten. Aluanlhemmalhquelha nac caselha nemmescamacja Engiapom Neten ntemescasquec acmennawe nemmescama nac Engiapom Neten.
20
Apquelto la juramento aquieplomo aluanlhemmalhquelha nac caselha nemmescamacja Engiapom Neten, aptec na juramento acnaicamoc anac tacjalhet ma'a.
21
Apquelto la juramento aquieplomo Engiapom Neten apnemacja, aptec na juramento m'a Engiapom Neten apno m'a.
22
Apquelto la juramento aquieplomo m'a neten, aptec na juramento m'a aptanema Engiapom Neten ca njan Engiapom Neten apno m'a.
23
!Quetlhencap la ie' jengetlhecmoscama jenganemacja cacpota njan fariseos, janet apualho'oc quetlhencap! Apquellaianquec Engiapom Neten diezmo menta, anis, comino alleniem'o aniep apanco'oc, coca melletsaujomoc apquelleliejecjo mo'oc jenganemacja nac allelto neten ancawec aliaspommalhca m'a, ca acto nac nellanai'a nac acpeiwomo, nengietnai'o napa'at emmo'oc, cacpota njan nengeliejecjo Engiapom Neten. Coca acto nac ma'a ntasec ellancoc diezmo, ntasec na elletsaujoc apquelleliejecjoc lhamacjo nquec jenganemacja nac.
24
¡Quetlhencap malha metca apaqto'oc la aplaclecama amai! Apquellactelhanma niecje seianeng iemmen apienaicamoc la'a, coca meluet'ac mpenec aquietnema conne iemmen, apienanque panque', metca apaqto'oc quetlhencap.
25
26
!Quetlhencap la ie' jengetlhecmoscama jenganemacja cacpota njan fariseos, janet apualho'oc quetlhencap! Malha apqueltacmelo aptaiancoc, coca ncolhnaianca njan ncollatsecama apualho'oc, nlanei'awec apquenmenielhaicamoc cacpota njan nquescama aptengiaicamoc caselha apanco'oc. Nnawec niecje najaicoc anac, apjac, nquenmop'awec aiempeioc anac, nquelpaisacmec coca au'alho'oc!Ellalhnes coca secje apualho'oc cacpota nconmopecjac na apqueliocjo nac!
27
¡Quetlhencap la ie' jengetlhecmoscama jenganemacja cacpota njan fariseos, janet apualho'oc quetlhencap! Nnawec apquelcatonnammacpelha nac tacjalhet malhec enenlhet apqueletsepma la'a, ntasec anquec tacjalhet ma'a, coca conne nlanei'awec nema alhcapcoc cacpota njan mpaisacme'.
28
Apquelnawec quetlhencap ma'a, malha niecje la enenlhet apquelpeiwomo, coca apualho'oc nquellaneianquec ncollatsecama cacpota njan janet apualho'oc.
29
¡Quetlhencap la ie' jengetlhecmoscama jenganemacja cacpota njan fariseos, janet
apualho'oc quetlhencap! Apquellanai'a mota apquelcatonnammacpelha apquetsecama ania'a, apqueltacmelquescamawec na apquellanecamoc metaimong apqueliocja apquelietquescamo enenlhet'awoc la apquelpeiwomo,
30
ca apquetlheno njan:
"Co lhtema nac nelloma ennenco'o secje lhta, mangelpasenwome lhta angennapoc apquetsecama ania'a nnenga m'a" Ca aptaiancoc quetlhencap apquetlheianma.
31
¡Apquenmopuanca'a ania'a coca aptaiancoc! Nnawec quetlhencap apquelieijenca meliamolhma apquennapmo lhnac nanec apquetsecama ania'a.
32
¡Etlhenques jata mocjom apquennapecamoc apquetsecama ania'a emmanie nac!
33
¡Menasma atcac quetlhencap! ¡Ncospaneiacja talha jata eclhacpoc, meluomec jata taiep ma'a!
34
Allapacsec jata apquetsecama ania'a, apqueliolhma, cacpota njan jengetlhecmoscama, coca ennapoc jata, eliepetquesec jata iamet actennescama, po'oc jata eltecpoma aquieto m'a apcacnecjelha nac judios, po'oc ellemjama ta lhamacjo apquellawacja.
35
Ncowac jata aquientalhnema tacjaplhet'oc quetlhencap aniem'o apquennapecamoc lhnac na nec enenlhet apquelpeiwomo, ampai'o Abel anennga, acuacmo Zacarias secama ania'a nennga, Berequias apquetca, aptequionquec lhnac nanec conne Engiapom Neten apnemacja, aisecsec aquieto acmeiommalhquelha
nac, cacpota njan iama asota aluanlhemmalhquelha nengaicamoc caselha.
36
Jawe ngiapac anquec ellengancoc jata aquientalhnema enenlhet'awoc apcactengaicamoc nenwanlha nac— lhta aptac Jesus
Apuenema Jesus aniem'o meliamolhma enenlhet'awoc aquieto Jerusalen
37
—Enenlhet co Jerusalen, quetlhencap apquennapma mota apquetsecama ania'a, apqueliaqnai'a mota metaimong Engiapom Neten apquellapascama. Asqueltemawe niecje allanquesecja cacpota altacmelquesec, ca acto nac tape'e ncoltacmelquesec atco'oc coneng alhempanco'oc, coca quetlhencap malhta elleltojo.
38
Ca ncanec apcacjaianquelha nac quetlhencap metca temma ta etneja'.
39
Jawe ngiapac anque', manjeluetecjec jata colhuawe nac acuacmo asquelhiacmo ta mocjom, jata acuacjo ta acnem ma'a jata etnancoc enenlhet'awoc:
"Ntasec anquec apuactamo apto Engiapom Neten apcapascama" jata etnancoc ma'a.