Capítulo 22
Apietquescama Jesus actacmelaicama lhma aliemjapma
1
Mocjom alhta apqueltennaicama Jesus apietquescama actemacja acmac'acja ta ncotnec actacmelaicama lhma apancoc Engiapom Neten ma'a, lhta aptac Jesus:
2
—Lhema apiau'acja apuesque apquelanai'ac nac actacmelaicama lhma apancoc aliemjapma apquetca.
3
Ca apquelapascamo lhnac apquellennencasecama cacpota elleltennascacjac apquellelto apquellanemmap ma'a elpasenwomoc actacmelaicama lhma, mannoca ellasecjai'ac ma'a.
4
Ca apquellapascamo lhnac mocjom po'oc apquelennencasecama, lhna aptemac:
"Enmeiacja eleltennascacja' acto lhta apquellanemmap actacmelaicama lhma' elelhiemoc jata, aspenesquec lhec nentoma, acnacmelai'a wacca ejencoc" lhna aptemac.
5
Mang noca ellasecjai'ac apquellanemmap elpasenwomoc ma'a, moclhema lhnac aptenenwecjoc aniep apancoc, cacpota njan po'oc na apmeiecjac apmacmeianquelha,
6
po'oc nac na apquelpatjetmac apquennencasecama, apqueltecpoianca lhnac na m'a, apquellaqjemo njan.
7
Nnatjescanquec nac apuesque m'a, apquellapascamo lhnac quempocjacme apancoc cacpota ennapuacjac ma'a apquellelto alietnema apqueliemonque lhma, cacpota njan eluanlhecjac apcacjaiancolha m'a.
8
Coca apuesque lhnac ma'a apquelpaqmetquescamo lhnac mocjom apquellennencasecama, lhna aptemac:
"Mpenesalhquec nentoma aliemjapma, mancoietoc etlhemmac apquellanemmap alhta, meliamolhma sonque.
9
Enmeiacja apualhoc temma, eliantementa ta apqueluet'acja la enenlhet ma'a" lhna aptemac apuesque.
10
Ca apquenmeiecjo lhnac apquellennencasecama m'a, apqueliantementamo lhnac lhamacjo apqueltemacja enenlhet, meliamolhma cacpota njan apqueliamolhma, aplanei'awec nac conne au'alhoc pa'at.
11
Netamen apiau'acja apuesque aptalhnenwecjo lhnac na m'a conne pa'at aquietnacja aliemjapma cacpota ellanjoc enenlhet ma'a, ca apuetai'o lhnac lhema enenlhet mancoietemo apquelentalhnecja apquelentalhnema actacmelaicama lhma ncoc la'a, lhna ptemac apcanemo:
12
"¿Se lha acto aptalhnenwo'o nac ncoietemo apquelentalhnecja apquelentalhnema actacmelaicama lhma nac ancoc, je?" lhna aptemac.
Coca mang nac engiatemmoicama enenlhet ma'a.
13
Netamen apiau'acja apuesque apquellanco apaioma apquellennencasema:
"Enactet apmeioc cacpota njan apmancoc, eliengiau iocjalhma, ienactesacjalhma nac, ncopelhcama ta nquec apiempec ma'a, ewenec jata apanquec ma'a aniem'o apcai'a" lhna aptemac apuesque m'a.
14
Ca astacja lhquec alheianma asietquescama, aplhanie panque niecje apquellelto apquellanemmap ma'a, coca apcanete pancawe apquellelto apquenmammap tacja m'a actacmelaicama lhma—lhta ptac Jesus
Fariseos apquelleltemo etselhnanac Jesus
15
Netamen ma'a apenescama apqueltennaicama apietquescama Jesus, apqueltaqjacjo lhta fariseos apquellanenwecjo quelha m'a apqueltacja cacpota eliepconwatac Jesus, apquenmajai'a elleng'ac actacja aplheianma apcammelhma apuesque Roma cacpota elentepquesec apuesai'a m'a.
16
Ca apquellapascamo quelha moclhem'a apquelieplecama apanco'oc cacpota njan apquelieplecama apuesque Herodes apnacja Jesus, lhta aptancoc:
—Jengetlhecmoscama, nenniawec ennenco'o iocjalhme mota apaioma lheiap, apquetlhecmosque mota elleliejecjoc Engiapom Neten. Mancoielhnenwomec apaioma apquetlhecmoscama lheiap, jawe
apcanmacpoc lheiap apiesecsec enenlhet.
17
Colhuawe nac nemma'ac angellelmalhnama: ¿Ntase nlho angianmonquesec patacom impuesto ancoc apuesque Roma, je?—lhta aptancoc
18
Coca apiawe lhta Jesus apquenmajai'a etselhnanac ma'a, lhta ptac apquellano:
—¡Janet apualho'oc quetlhencap! ¡Apquenmac'awec nac jeliepconec niecje, jela'a!
19
¡Nwa! Etsanta no patacom aquiaquiema nac impuesto ancoc— lhta aptac
Ca apquelletsantencaso lhta patacom aquiaquiema
, apquelan'o lhta njan Jesus ma'a,
20
apquelelmalhnenca lhta njan, lhta aptac apquellano:
—¿Se lha enenlhet napa'at jengca ie patacom aquiaquiema nac, actalhesammalhca njan apuesai'a, je?
21
—Apuesque Roma jam —lhta aptancoc ma'a. Coca lhta aptac mocjom Jesus:
—Jai, ellamoc apuesque Roma apto apancoc, cacpota ellancoc na Engiapom Neten apto apanco'oc — lhta aptac
22
Nquelpelapcasque lhta apquellengai'a enenlhet'awoc ma'a aptacja apcatemmoicama Jesus, ca apqueltaqjacjo lhta njan ma'a.
Saduceos apquelelmalhnecama Jesus actemacja nentaiecja mocjom enjalhnancoc apiesecsec apquenmasquenwaiacmo
23
Ca apqueluacjo lhta moclhem'a saduceos apnacja Jesus, apqueliasqueiacme lhta nentaiecja enjalhnancoc mocjom apiesecsec apquenmasquenwaiacmo, ca apquelleltennasenca lhta lhema ania'a acuetammalhca m'a, lhta aptancoc:
24
—Jengetlhecmoscama, aplheianmec nac nanec Moises annenga ca apquetsepo la lhema enenlhet metai'a apquetca, apialheng jata emecjac aptawa neptamen cacpota ncotac atca, jata ncotnecjac apuesai'a apieijenca m'a, cacpota ncotnecjac malha apquetca apanque', lhnac nanec aptemac Moises annenga m'a
.
25
Colhua engiailho no mocjom mo'oc ania'a nac. Apnenquec nac siete apquelialheng'a, nqueliemjapmec nac metno apquetcoc, ca apquetsepmo lhnac metca apuetai'a apquetca m'a. Netamen apialheng neptamen apmecjo lhnac aptawa neptamen ma'a,
26
ca apquetsepmo njan ma'a metai'a apquetca. Lhna ntemac na po'oc ma'a, apsaujommacpec nac apqueletsepma acuacmo siete apquelialheng'a m'a metca apqueluetai'a apquetcac,
27
ca atsepmo lhnac na nqueluana m'a.
28
Ca nenmac'o lhquec angeliojoc ennenco'o m'a, acuo'o ta acnem apqueltemescasacjo ta apjalhnanco'oc apqueletsepma Engiapom Neten: ¿Sec jata etnecjac aptawa nqueluana lhquec, siete apuaiacmoc anacteianca'a apqueletsepma m'a?—lhta aptancoc.
29
Ca apquellatemmonca lhta Jesus, lhta aptac:
—Melietemoc quetlhencap meliojoc actemacja actalhesammalhca ania'a lhennenga, meliecpelcac na Engiapom Neten apmopuana.
30
Jata aptancocjo ta mocjom apjalhnancoc apquelletsepma nac, apquellennawa'ac, nquelwana'ac najan mancoliemjapocjec jata m'a, ncanec etnancocjac jata aptaiancolha nac Enenlhet Neten.
31
Enwanca'ac angeliojoc jawe ngiapac anquec antancocjac jata enjalhnanco'oc neletsepo ta, ncanec aptemenquec na nec apcanemo Engiapom Neten Moises ma'a:
32
«Co'o asto nac apuesque apanco'oc apquelieijenca Abraham, Isaac, cacpota njan Jacob
» lhnac nanec aptemac.
Coca metco la apnaqlhatecjanweiam apiesecsec ma'a apquenmasquenwaiacmo Abraham, Isaac cacpota njan Jacob annenga, malha aqjemo ta ncotnec aplhenammacpo panquec apuesque Engiapom Neten tacjaplhet'oc ma'a, coca apnaqlhatecjanweiacmec ma'a
—lhta aptac Jesus apquellano m'a.
33
Nquelpelapcasque lhta apquellengai'a enenlhet'awoc ma'a actacja apquetlhecmoscama Jesus.
34
Apquellengai'ac nac na ania'a Fariseos ma'a apqueltemescasecjo coneng Jesus saduceos ma'a, ca apqueluo'o lhta apnacja Jesus.
35
Lhema alhta apto jengetlhecmoscama jenganemacja Moises apqueltemo eselhnanac Jesus ma'a, ca apquenmalhnenca lhta:
36
—Jengetlhecmoscama ¿Selha jenganemacja neten anque aquiaspommalhca ie, je?—
37
Ca apcatemmonca lhta Jesus ma'a, lhta aptac:
«Ellamelemma mota Engiapom Neten acuacjo conne canquec apualho'oc, alietnaicama apaqtec, cacpota njan apqueliennactema apanque'
»
38
Ca jenganemacja nac acto amanie nque, neten anquec aquiaspommalhca m'a.
39
Coca nietnec na mo'oc amjaicamoc ma'a jenganemacja actacmanma nque:
«Ellamelemma mota po'oc, ca acto nac apquellamelammacpo apancawe nac apquelliocja quetlhencap
»
40
Lhamacjo jenganemacja Moises cacpota njan apquetsecama ania'a nnenga nquelleniemai'ac ma'a janet anac jenganemacja—lhta aptac Jesus ma'a.
Jesus apto David aptawen neptamen
41
Ca apquelelmalhnenca lhta Jesus fariseos ma'a, lhta aptac:
42
—¿Se lha atawen netamen Cristo ie, je?—lhta aptac Jesus
—Apuesque David apquetca neptamen ma'a—lhta aptancoc ma'a
43
Lhta aptac mocjom Jesus apquellano:
—Coca David lhnac nanec aptemac apqueliateianca aniem'o acmaicama Engiapom Neten Apualhoc, lhnac nanec aptemac David:
44
«Lhta aptac Engiapom Neten aplheno apuesque ejencoc
ma'a: "elhnata nejecja aquiennacja
, acuacmo asaujo asnaqtewasecja apquellelto apquellammelhmacja lheiap
"» lhnac nanec aptemac.
45
Apuesque David aplheianmec nac Cristo apto apuesque apancoc ¿Etnecja nalhmoc la apuesque apancoc aptawen neptamen, je? —lhta aptac Jesus.
46
Ma lhta ncollapuanca'ac ellatemmoma m'a, nqueluannalhque lhta apualho'oc elelmalhnama mocjom ma'a.