Capítulo 21
Aptalhnenwecja Jesus na temma Jerusalen
1
Apqueluacje lhta na temma Betfage, apquenmeiacjo lhta m'a aquieto lhienep acjaiam Olivos, nengaqte lhta apiau'acja temma Jerusalen, lhta aptac Jesus apquellano apcanet
apqueltamesaicamoc:
2
—Enmeiacja no na temma nac ja'e, eluetanwacjac jata lhema malecca actetemmalhca cacpota njan atcoc. Eljatsosques jata tama, jeliantencasenta ta.
3
Nnec jata nquec alelmalhnenca quetlhencap ma'a, jata etnancoc ellanac ma'a apuesque lhquec aptema, colhuawec nac lhec neliantementamo, jata etnancoc ellanac otep ma'a—lhta aptac Jesus apquellano.
4
Lhta ntak akvetammalhka m'a aktemakha aplheianmo lhnak nanek apkeltennasemmap ania'a annenga ngkotnek hata m'a, lhna aptemak:
5
«Eltennes hata atka nak natemma Sion, apkanketkasakmek apveske nkok lheia', nalhepek apvalhok ma'a, malekka apkanantema, malekka atkok ka atka m'a akmovana nak nkolpatmok kaselhahao», lhnak nanek aptemak pkeltennasemmap
ania'a m'a.
6
Ka apkenmeiakho lhta m'a apkeltamesaikamok, apkelieplavkaske lhta aptakha apaivoma Jesus.
7
Apkeliantemante lhta malekka kakpota nhan atkok apnakha
Jesus. Apkeltankesakho lhta nhan apkelaqlammap aptek malekka atkok ma'a, ka apkananto lhta Jesus.
8
Ma lhta nha ntek enenlhet'avok ma'a apnengkenaikamok apkelaqlammap amai akieto apmeiakhelha Jesus apkanantema. Napokha lhta nhan
apkeliaqtemenangkok ietapa'ang apva' kakpota nhan enengkenangkok amai akieto apmeiakhelha Jesus.
9
Apkelꞏhalhiengkakme lhta Jesus aklhengakha apkanantema. Avanhek anke lhta alpaihekha apvalho'ok ma'a, ka apkelvenengka lhta nhan, lhta aptangkok:
—¡Hosana, ntasek anko ie', eletsevasoho David aptaven neptamen! ¡Nema aktakmelkeskeskama apkaniemhaikama hengke'e aplhekmo nak apkapaskama Apveske! ¡Hosana, ntasek anko ie', eletsevaso ta nhan ma'a neten! —lhta aptangkok enenlhet'avok ma'a.
10
Neksa aptalhnema lhta Jerusalen Jesus ma'a, nkeliemaske lhta apvalho'ok enenlhet'avok, apkelmaleniosekpe lhta mok apankavek ma'a, lhta aptangkok: —¿Sek la enenlhet aie, he? —lhta aptangkok.
11
—Jesus ha'e, apkeltennasemmap ania'a apkeniem'o Nazaret akieto Galilea —lhta aptangkok ma'a.
Jesus apquelentepquescama enenlhet aptengiaicamoc aquianmoma caselhaja conne Engiapom Neten apnemacja
12
Aptalhnenwacje lhta Jesus Engiapom Neten apnemacja m'a, apquelentepcasque lhta njan enenlhet'awoc apquenmaicamoc caselha cacpota njan apquelhaicamoc caselhaja. Apqueliaqnencasque lhta asota apanco'oc enenlhet apqueliaqmoncasecja mo'oc patacom po'oc enenlhet apanco'oc, apqueliaqnencasque lhta njan iamet aisecso'oc conemmactec aplhano'oc apquelhammap alhta.
13
Lhta ptac Jesus apquellano:
— Lhnac nane ntemac ania'a lhennenga Engiapom Neten apaioma:
«Co'o asnemacja ncotnec jata apcaqnecjelha enenlhet'awoc lhamacjo apquellawacja cacpota jelpaqmetquesec mota
» «Quetlhencap coca apqueltemescasac apquelielhanmomacja enenlhet apquenmenielhma'
» lhnac nane ntemac—
14
Apqueluacje lhta njan ma'a moclhem'a metca apaqto'oc cacpota njan apqueliaqteicama apnacja Jesus, coca apqueltacmelcasacje lhta njan ma'a.
15
Ca apqueluenquesanca lhta njan memactcac ma'a, lhta aptancoc:
— ¡Ntase apuo'o David aptawen neptamen!— lhta aptancoc.
Ca apquellau'o lhta apquellengo apquelemjama apmania ie sacerdotes cacpota njan jengetlhecmoscama jenganemacja Moises ma'a,
16
lhta aptancoc:
—¿Apleng'a i'e lheiap atlheno nac nematca'ac anac? — lhta aptancoc.
—Jai' aslenga'ie, nietnenquec actalhesammalhca Engiapom Neten apaioma acmac'acja ta ncotnec, lhnac nanec ntemac ania'a:
«Engiapom Neten, lheiap aptema nematca'ac cacpota njan secja acpalleiam ncoltacnescasancoc lheiap apuesai'a »
lhnac nane ntemac ania'a—
17
Ca aptepo lhta Jesus Jerusalen ma'a, apmeiacjo lhta na temma Betania, apteianwacje lhta njan pelhasep ma'a.
Apiamenaicama Jesus iamet higuera metca aquielhna
18
Sosecjec anque lhta ntac ma'a, aptaqjo mocjom neptamen Jesus natemma Jerusalen, mec alhta ncaqjac ma'a.
19
Ca apuet'o lhta iamet higuera m'a amjama necja amai, aptetescacme lhta apmajai'a niecje etuoc aquielhna, mamma lhtoca aquielhna m'a, moc awa lhta m'a, ca apto lhta apcano iamet:
—¡Mancoielhnecjec jata mocjom lheia! —lhta ptac Jesus apcano iamet.
Colhuawec anquec lhta niemac'ac ma'a iamet .
20
Nqueliemasque lhta apualho'oc apqueltamesaicamoc apqueluet'o m'a, lhta aptancoc apquellano Jesus ma'a:
— ¿Se lha cto aquiemac'o nac colhuawe anquec iamet higuera nac, je?—lhta ptancoc ma'a.
21
22
Coca lhta aptac Jesus apquelatemmonca:
—Jawe ngiapac anque' acnanco la meliasqueiam Engiapom Neten quetlhencap, ncotnec jata apmopuanca'ac astacja lhquec asquellanei'o iamet lhec, ncolhamonwomoc jata tep anquec ma'a, ca acto nac lhienep acjaiam anac, etnancoc ellana':
— ¡Congie, nconiacja aquiau'acja iemmen anac! Ncotnec jata m'a. Lhamacjo caselha apquelelmalhnenca la Engiapom Neten aptengiancolha la'a meliascacmo la njan, etlhewancoc jata m'a—lhta aptac Jesus
23
Aptalhnengvakhe lhta Jesus Eniapom Neten apnemakha, ka apketlhekmoso lhta m'a. Apkeltetesko'o lhta nhan apkelemhama apmaniaie' sacerdotes kakpota nhan
metno apketkok apkellavakha m'a, lhta aptangkok apkellano:
—¿Se lha aikamok apientalhnemo lheiap ke kakpota elanak lhamakho kaselha nak, he? —lhta aptangkok ma'a.
24
Koka lhta aptak Jesus apkellatemmongka m'a:
—Ko'o nhan askeltavek alelmalhnama ketlhengkap, ¿se lha aikamok apientalhnemo Juan kakpota ellavkesangkok iemmen enenlhet'avok ke, he? ¿Eniapom Neten ai'e, nlho ka la enenlhet? ¡Ngva, helatemmoma noho! —lhta
aptak Jesus.
25
Ca apquelmalengiosecpo lhta moc apancawec ma'a, lhta ptancoc: —Ca anlhenec Engiapom Neten apqueltemo eientalhnesacpoc Juan, netamen jata etnec jengellanac Jesus. ¿Se lha ntemac apqueliasqueiacmo nac quetlhencap m'a ie?
26
Ca anlhenec enenlhet apcaicamoc apientalhnemo Juan, angellajoc na m'a enenlhet'awoc anac jengellammelhecjac jata, ncanec meliasqueiacmoc apto Engiapom Neten apcapascama Juan—lhta aptancoc apquelmalengiosecpo m'a.
27
Lhta aptancoc apquellatemmonca mocjom ma'a: —Mangeliojoc ennenco'o aicamoc apmopuana m'a Juan— Coca lhta aptac mocjom Jesus:
—Co'o njan momac'ac aleltennacsec quetlhencap selha altemo aientalhnesalhcoc cacpota alanac lhamacjo caselha nac —lhta aptac.
Apietquescama Jesus apcanet apquetco'oc
28
Netamen Jesus ma'a apqueltennanca lhta apietquescama napaqtawec apqueluescai'e m'a, lhta aptac:
—Co la ta ncotnec aclheianma apualho'oc quetlhencap asmac'o nac altennama. Lhema enenlhet apcanet nac apquetcac ma'a, lhna aptemac apcanemo lhema apjapac apquetca:
"Emacmonwacja ta uva au'jac asquelcacjama nac" lhna aptemac ma'a.
29
"¡Ma', momac'ac aniacja'!" lhna ptemac apcatemmoianca apquetca.
Ca apiacmoncasecjo lhnac mo'oc aquietnaicama apaqtec apquetca, apmeiecjo lhnac ma'a apmacmonwecjo.
30
Netamen ma'a apiapom apacmetquesecjo lhnac mocjom po'oc apquetca, lhna aptemac:
"Emacmonwacja ta uva au'jac asquelcacjama nac " lhna aptemac. "¡Jai', aniacjac jata!" Lhna ptemac apcatemmoianca po'oc apquetca m'a, coca mang nac engiecjac ma'a.
31
Ca apeneso lhta apqueltennaicama apietquescama Jesus ma'a, ca apquelelmalhnenca lhta enenlhet'awoc ma'a, lhta aptac:
—¿Se lha apquetca apqueliejecjo enenlhet anac que, je?—lhta aptac
— Apmanie lhquec —lhta ptancoc ma'a. Lhta ptac mocjom Jesus:
—Jai', jawe ngiapac anque', apquellelto apquenmaicamoc patacom impuesto ancoc cacpota njan nqueluana allanactema actengiaicamoc patacom, jatoca ncotnocjac ma'a amania ie Engiapom Neten apquennemolhema, alhaiec jato ca quetlhencap.
32
Ncanec ma lhta eliasqueiacmoc Juan ma'a, apquetlhecmoscamo lhta nengeliejecjo Engiapom Neten, nellanai'a acpeiwomo. Coca quetlhencap apqueluet'a niecje lhamacjo caselha apquelanai'a Juan, apqueliasqueiacme lhtoca m'a, melliengiecjac na caselha ncollatsecama apquellanai'a—lhta aptac Jesus.
Apietquescama Jesus aniep angiapma'ac meliamolhma
33
Aplhencasque lhta mocjom Jesus apqueltennaicama m'a napaqtawec apqueluescai'e m'a, lhta ptac:
—Eltacmelcaso no apquellailhemo mo'oc anac asietquescama. Apcanmec nac alhcapoc uva lhema enenlhet aniep apancoc, apjalhtenquescanquec nac na m'a, apquelanei'o lhnac na apquelanei'acja vino, cacpota njan apquelanei'o lhnac na neten apquelammelhaiancolha la lhma necjau'ac apquelcacjama. Netamen aptengiaianca lhnac nema aquianmoma aniep apancoc nema acmaicama, ca aplhengamo lhnac na m'a apto apancoc aniep.
34
Netamen ma'a, acuaiacmo lhnac pelten acnalhemmalhquelha uva aquielhna, apto lhquec apancoc aniep apquellapascamo lhnac apquellennencasecama, eluacjesec necja acnaclhemmalhca aquielhna apancoc.
35
Coca mang nac ncollatsecama apquellanei'o m'a nema annencasecama, apqueltecpoianca lhnac, apquellaqjenquec nac na po'oc ma'a, ca apqueliaqneianco lhnac na m'a metaimong aliaquiema.
36
Netamen nac apto apancoc aniep ma'a aplhameianquec nac apquellapascama mocjom apquellennencasecama, mang nac na ncolatsecama apquellanei'o m'a.
37
Netamen apto aniep apancoc lhna ntemac aquietnaicama apaqtec:
"Ca anwapacsec eietca ejenco ie, jate lha ellasecjoc ma'a" lhna ntemac aquietnaicama apaqtec ma'a.
38
Necsa apqueluetai'a lhnac apquetca apto apancoc aniep, lhna aptaiancoc moc apancawec:
"Ca apquetcoc anac ja'e, jata etnecjac apancoc aniep anac apquetsepo ta apiapom. Angellaqje ta cacpota ncotnecjac enganco'oc aniep anac" lhna aptaiancoc ma'a.
39
Ca apquelpatjetmo lhnac ma'a, apqueliantemecjo njan niawa' aniep, apquennapo njan ma'a—
40
Apenesque lhta apqueltennaicama Jesus ma'a, ca apquelelmalhnenca lhta, lhta aptac:
—¿Co la ta etnec apquellanei'o enenlhet anac meliamolhma apto apancoc aniep anac apuactamo ta mocjom, je?—lhta aptac Jesus
41
Ca apquellatemmonca lhta m'a, lhta aptancoc:
—Melietnec jata napaqta'ac enenlhet anac meliamolhma, ennapoc jata njan, netamen etengiama ta po'oc enenlhet apqueliojo la lhma cacpota enmama secjec ma'a aniep apancoc anac, engiancocjac jata njan necja aquielhna acnalhemmalhca aniep apancoc—lhta aptancoc ma'a
42
Coca lhta aptac mocjom Jesus apquellano:
—Jata ncotnec na quetlhencap ma'a, eluatescasancoc jata aptaicamoc apquennemolhema Engiapom Neten ma'a cacpota ellancocjac ma'a enenlhet apquellasecjai'o la'a. Apquelliawe quetlhencap actalhesammalhca ania'a lhennenga Engiapom Neten apaioma, lhnac nane ntemac:
43
«Metaimong alhta apquelhacjama apquellanecamoc pa'at, coca Engiapom Neten aptemesquesacjec neten anquec aquiaspommalhca m'a, awanjec anquec ennenco'o jengelpelapquescama neluetai'o m'a»
44
Enenlhet apteiacmo la tacjalhet metaimong anac, etuasacpoc jata, coca metaimong anac acteiacmo la tacjaplhet enenlhet, apnec apanquec jata etnecjac ma'a—lhta aptac Jesus ma'a.
45
Necsa apquellengai'a lhta apietquescama Jesus apquelemjama apmania ie sacerdote cacpota njan fariseos, apquelianwacjawe lhta apquetlhenammap ma'a,
46
ca apquellelto lhta niecje ellaclhenquesec Jesus nengaclhencasemmalhquelha m'a, ma lhtoca ncollapuanca'ac ma'a, enenlhet alhta apquellac'ac ncanec apquelliawe lhta Jesus apto secama ania'a apanque'.