Capítulo 20
Apuesque aniep angiapom apiamolhma
1
Apqueltennaicama Jesus lhema apietquescama aptemacja apquellanei'o Engiapom Neten apquennemolhema la'a, lhta aptac Jesus: — Apto apancoc aniep aplhengamo lhnac sosecjec anque', aptengiai'o lhnac apquenmacmesaicama aniep amjamacja uva.
2
Ca apqueluetecjo lhnac ma'a, apqueleltennascamo njan aquianmoma lhema acnem cacpota ei'anmonquesec ma'a apquenmacmecama, apquellapascamo lhnac na aniep apancoc amjamacja uva.
3
Netamen, malha la nueve sosecjec nac ma'a, apmeiecjo lhnac mocjom, ca apqueluetanwecjo lhnac enenlhet metca la apquenmacmecama aquieto apcacjenwectanlha enenlhet,
4
lhna aptemac apquellanemo:
"Enmeiacja enmacmonwacja aniep ejencoc amjamacja uva, aianmonquesec jata aquietemo ncoie" lhna aptemac.
Apquenmeiecjec nac ma'a, apquenmacmonwecjo.
5
Ca cto catelho, apmeiecjo mocjom apqueluet'o enenlhet metca apquenmacmecama la'a, apquellapaso aniep apancoc enmacmonwacjac ma'a. Mocjom malha la tres ienacteso, apmeiecjo mocjom, apqueluetanwecjo enenlhet metca la apquenmacmecama, apquellapaso njan enmacmonwacjac ma'a.
6
Mocjom nac ienacteso nque, malha la cinco, apmeiecjo apcacjenwectanlha la enenlhet, ca apuetanwecjo mocjom enenlhet metca apquenmacmecama, ca apquelelmalhneianca, lhna aptemac:
"¿Se lha ntemac apcacjaianco na mota apanquec metca apquenmacmecama, je?" lhna aptemac.
7
"¡Mamma jengenmacmesama ennenco'o!" lhna aptaiancoc ma'a.
"Jai, enmeiacja aniep ejencoc amjamacja uva, enmacmonwacja ta m'a" lhna aptemac apuesque.
8
Ca apto lhnac pelhasep ma'a, apcawenca apquemjama apmanie apquenmacmesaicama, lhna aptemac:
"Ellawama moclhem'a apquetlhelhma'ac, ellamoc aquianmoma apquenmacmecama, jata ellancoc apmania ie' m'a alhaiec lhec apqueluai'a, cacpota apmania ie lhquec apqueluai'a, alhaiec jata ellancoc ma'a" lhna aptemac apuesque.
9
Ca apqueltetesquectamo lhnac apqueluai'a lhquec la 5 ienacteso, apquetlhewaianco njan aquianmoma lhema acnem ancoc.
10
Netamen ma'a, aluecjo lhnac apqueluai'a lhquec apmaniaie ncoie', ca atlheianmo lhnac apualho'oc etlhewancoc tep panquec jata aquianmoma, coca wanlha lhema acnem aquianmoma apquetlhewaiancoc ma'a.
11
Nquennatjescanquec nac ma'a, ca apquelleltennascamo lhnac aquiennactema apaioma apto apancoc aniep,
12
lhna aptaiancoc:
"Lhema hora ntac apquenmacmecama alhaie lhquec apquelluai'a, apnesawe coca aquianmoma lheiap acto ennenco'o sosecjec anquec lhec nellua'ia, awanjec nenmacmecama aisecsec majat, mancoietoc aptacja nac lheiap" lhna aptaiancoc ma'a.
13
Ca apcatemmoianca lhnac apto apancoc aniep lhema apjapac ma'a, lhna aptemac:
"Tocja la nietawec astacja nac asquellanei'o, asqueltennasquec lhec niecje sosecjec lhec lheiap ai'anmonquesec aquianmoma lhema acnem ancoc.
14
¡Ema patacom anac, etaqjecja njan! Asquellanquec lhec aquianmoma apquenmacmecama alhaie lhec apquelluai'a, alhnesota aquianmoma actacja nac ascaicamoc lhec lheiap.
15
Atnec co'o asmac'acja atnejec pataccom ejencoc ¿Selha ntac aplawo nac lheiap que, asiawe lhma co'o?" lhna aptema apto apancoc aniep.
16
Coca apquellelto la alhaiec anquec, etnancocjac jata apmania ie' pancawec ma'a, coca apmaniaie apancawec la'a, etnancocjac jata alhaiec ancoie'—lhta aptac Jesus.
Aplhenecjo mocjom Jesus ematong jata
17
Necsa apmeiecja lhta Jesus na temma Jerusalen apquetlhelhma'ac alhta 12 apqueltamesaicamoc, apcanquesacjo lhta njan ma'a, lhta ptac apquellano:
18
— Nenmeiacjec ennenco'o Jerusalen, ncolhec jata anconwacmo Enenlhet Apquetca nac apquelemjama apmania ie sacerdotes cacpota njan jengetlhecmoscama jenganemacja Moises, elleltoc jata ematong ma'a.
19
Netamen elhquenwomoc jata njan ma'a apqueluescai'e co Roma
, eluannama ta m'a, eltecpoma ta njan, ncolhec jata njan aliaqlho apmeioc apmancoc neten iamet actennescama acuacmo aquetsepo, coca janet'o lhema acnem jata ncotnec apquetsepma ma'a, ncolhec jata actemesquesacjo mocjom apjalhnancoc —lhta aptac Jesus ma'a.
Apquetlhecmoscama Jesus nentemacja antec nemjama emmanie'
20
Ca acuo'o lhta Zebedeo aptawa cacpota njan atcac apnacja Jesus, alteclhecuo'o lhta atapno'oc napaqtec ma'a cacpota ncolmalhnama lhema caselha.
21
Coca lhta aptac Jesus apquenmalhnenca:
— ¿Se lha actengio ie? —lhta aptac ma'a.
— Jata acuacmo ta aptema apuesque' lheiap, asqueltawec co'o elhnecsec eietca'ac anac napocjau'ac lhema aquiennacja, po'oc na sancaluelha, cacpota eltemesquesec apquelemjama apmania ie — lhta ntac.
22
Ca apcatemmonca lhta Jesus ma'a, lhta aptac:
— Meliojoc actacja nac aptengiaicamoc quetlhencap ¿Apuanca'a nlho ellengancoc aquientalhnema lhamajo actemacja acmasca acmac'acja ncotnec aslengaianco ta, je?
—lhta aptac
— Jai', enwanca ie— lhta aptancoc ma'a
23
Lhta aptac mocjom Jesus:
— Jai, jawe ngiapac anque' ellengancoc jata njan quetlhencap aquiawai'a aquientalhnema acmasca, acmac'acja ta ncotnec co'o ascaniemjaicama. Coca Tata epenesoc jata selha enenlhet engiacjancoc nejecja aquieto aquiennacja, sancaluelha njan—lhta aptac Jesus.
24
Nquennatjesque lhta apquelleng'o napocja 10 apqueltamesaicamoc Jesus ma'a apqueltacnewo lhta Santiago cacpota njan Juan.
25
Coca apquellawenca lhta Jesus aplhamacjo, lhta ptac apquellano:
— Apquelliawe quetlhencap aptaianquelha nac apqueluesca ie po'oc enenlhet melleliejecjo nac Engiapom Neten, melleltacmelquescama nac, apnenquenque mota aquientalhnema tacjaplhet'oc enenlhet'awoc ma'a aniem'o aptaicamoc apqueluescai'e apquelientalhnesammacpo.
26
Coca apiesecsec anac quetlhencap metnamo nquec ma'a. Apquenmac'ac jata nquec etnancoc quetlhencap apqueliaspommap, etnamo ta nema allennencasecamaja.
27
Apquenmac'ac jata nquec na etnancoc apmaniaie, etnamoc jato ca alhaiec anquec.
28
Ca aptemacja nac ma'a Enenlhet Apquetca nac, apua'ac jenque'e cacpota etnec nema asennaicama ncolhec manca m'a, jawe apmajai'a etnec apquellasennenwecjelha la mota enenlhet, apua'ac na m'a cacpota engianconwomoc apcaniemjaicama apcaianco ematong cacpota eluonquesec tep aplhamacjo —lhta aptac Jesus.
Apqueltacmelcasecja Jesus apcanet metca apaqto'oc
29
Aptepque lhta Jesus na temma Jerico, apquetlhelhma'ac alhta apqueltamesaicamoc ma'a, ma lhta ntec na enenlhet'awoc apquelieplecama m'a.
30
Apcacjanque lhta njan apcanet metca apaqto'oc necja amai ma'a, apquelleng'a lhta Jesus apiecai'a m'a, lhta aptancoc apqueluenenca:
— ¡Apuesque, David aptawen neptamen, eietno nengaqta'a ennenco'o, jengelpasem nojo!—lhta aptancoc.
31
Apqueliasenque lhta lhma enenlhet'awoc ma'a apquelleltemo eluanmac, coca apquelianwescacme lhtoca m'a apqueluenecama:
— ¡Apuesque, David aptawen neptamen, eietno nengaqta'a ennenco'o, jengelpasem! —lhta aptancoc mocjom
32
Apquenenwacme lhta Jesus ma'a, ca apquellawenca lhta metca apaqto'oc, lhta aptac:
— ¿Selha apquellelto alanac que'? —lhta aptac
33
— Apuesque, nengeltawec angeluetecja lhma' mocjom ennenco'o—lhta aptancoc ma'a.
34
Apquelietnawe lhta napaqta'a Jesus ma'a, apquenmanwacmo lhta njan apaqta'awoc ma'a. Colhuawec anquec lhta njan apqueluetacja lhma' m'a, ca apquelieplacjo Jesus na m'a.