Capítulo 19
Apquetlhecmoscama Jesus metca nengiamasma entawa'
1
Netamen apenescama lhta apquetlhecmoscama Jesus ma'a aquieto iocjalhma Galilea, ca apmeiacjo lhta iocjalhma Judea, aquieto actep acnem aluata Jordan.
2
Ma lhta ntec na enenlhet apquelieplecama m'a, ca apqueltacmelquescaiacmo lhta njan lhamacjo actemacja anmasca apiempeioc.
3
Apqueltetesco'o lhta njan moc lhem'a fariseos apnacja m'a, apquenmajai'a eliepconec, lhta aptancoc:
— ¿Nqueltemawe nlho jenganemacja eiengioc aptawa enenlhet apmac'acja la etnec apquelanei'o aptawa' aniem'o mancolecquescamo apualhoc actacja aptawa', je? —lhta aptancoc ma'a.
4
Ca apcatemmonca lhta Jesus ma'a, lhta aptac:
—Apquelietsateianquec quetlhencap waccajac jenganemacja Moises annenga, ampai'acja secjec anquec apquelanai'a Engiapom Neten apquenno cacpota njan nqueluana,
5
lhnac nanec aptemac apquellanemo:
«Eiengiecjac jata aptema apnemolhema enenlhet ncana'ac, cacpota eloca lhemec aptawa, malha lhema ta ncotnocjac aiempeioc ma'a»
lhnac nanec aptemac.
6
Mmasquec janet, ntacjec malha lhema aiempeioc aniem'o Engiapom Neten apiepetquescama, ca ncanec mancolatsema eiengioc aptawa' enenlhet—lhta aptac Jesus ma'a.
7
Coca lhta aptancoc Fariseos apquellatemmonca m'a:
— Apcaiancawec nac nanec Moises enenlhet eiengio'oc aptawa, wanlha lhnac nanec apcaianco aptalhescama lhema waccajac actemacja ancoc nengiamasma entawa—lhta aptancoc ma'a.
8
Coca apcatemmonca lhta mocjom Jesus, lhta aptac:
—Apcaiancawec nac nanec ma'a aniem'o aliennactema lhnac nanec apualho'oc ma'a, tep nac nanec mancotnema ania'a m'a.
9
Co'o coca stac colhuawe nac asquellano, apiengiauquec jata nquec aptawa enenlhet emecjac mo'oc, apuaponcasquec ma'a aliemjapma lhta
. Wanlha apuanquec eiengioc aptawa enenlhet apuet'o la alanactescaiam po'oc apquenno'
—lhta aptac Jesus.
10
Coca lhta ptancoc apqueltamesaicamoc ma'a:
—Ncaimelhque nac quelha niecje ennenco'o nengellelto apquelennawa'ac manjengelliemjapanque', cacpota mancotnec aptacja nac — lhta aptancoc ma'a.
11
Coca lhta aptac Jesus apquellano mocjom ma'a:
—Wanlha coca moclhem'a enenlhet apuanca'ac mancoliemja panque' aniem'o coca Engiapom Neten ma'a.
12
Coca napocja enenlhet mancoliemjapencoc aniem'o apteianlha secja acmasca apiempec apcammelhacja, po'oc mancoliemjapencoc aniem'o nema actewasquescama apcammelhacja, po'oc na mancoliemjapencoc aniem'o apmajai'a etnec apcasennaicama Engiapom Neten. Ca apquellapuanco la etnancoc ma'a, ntase etnancoc ma'a—lhta aptac Jesus apquellano m'a.
Apqueltacmelquescama nematcac Jesus
13
Nne lhta aliantemacmo nematcac apnacja Jesus ma'a, nema alleltemo enenquenec apmeioc aietsecso'oc ma'a, apquelelmalhnescaso lhta njan Engiapom Neten cacpota ncoltacmelec allaniemjaicama m'a. Apquelliennawe lhtoca njan Jesus apqueltamesaicamoc apquellan'o apquelleto lhta apqueliantemaiam ma'a.
14
Coca lhta ptac Jesus apquellano apqueltamesaicamoc:
— Meliasamo lhma nematca'ac anac apquenmajai'a jeltetesca', ncanec enenlhet apmac'o la etnec Engiapom Neten apnemolhema, ncaimelhquec etnec malha acto nac nematcac anac—lhta aptac Jesus.
15
Ca apnenqueno lhta apmeioc aietsecso'oc nematcac ma'a, ca aplhengo lhta mocjom ma'a.
Lhema apquetcoc nquescama apquetsecama apacmetquescai'a Jesus
16
Apuo'o lhta apquetcoc apnacja Jesus ma'a, lhta aptac: —Jengetlhecmoscama ¿Se lha caselha altaqmelo alanac co'o ie cacpota ncoitec aquiennactema enengiec ncotnenwaianlha nnelha, je?—lhta aptac
17
Ca apcatemmonca lhta Jesus ma'a, lhta aptac:
—Selha acto jenmalhnenca actemacja caselha actacmelo ie, wanlha lhema apjapac apto apiamolhma. Apqueltawec jata nquec lheiap ncoitec aquiennactema apnengiec ncotnenwaianlha nnelha, ncaimelhquec secjec engiasecjoc jenganemacja apancoc Engiapom Neten —lhta aptac Jesus
18
Ca apcatemmonca lhta apquetcoc ma'a:
—¿Se lha jenganemacja ie?—
Ca apcatemmonca lhta mocjom Jesus ma'a, lhta aptac:
—Meniaqja po'oc, metues aptawa', memenielh, metnama apmopuana ania'a elhenec po'oc cacpota eselhnana'.
19
Ellajo ncana'ac, eniamelama ta njan po'oc enenlhet ca acto nac apcamelammacpo panque nac lheiap—lhta aptac Jesus.
20
—Jai', lhamacjo jenganemacja nac asqueliejecjawec co'o m'a¿Selha mo'oc caselha njan alanac que, je?—lhta aptac apquetcoc ma'a
21
Coca lhta aptac mocjom Jesus apcatemmonca m'a:
—Apmac'ac jata nquec etne apqueliejecjo Engiapom Neten, eclhac jata lhamacjo caselha apanco'oc etengiata aquianmoma, cacpota ellancoc patacom metca apquelletsecama nac, cacpota jeieploma. Netamen etac jata lhamacjo caselha apanco'oc aquieto m'a neten—lhta aptac Jesus ma'a.
22
Aiose lhta ntac apualhoc apquetcoc aplengo m'a ncanec ma lhta ntec apquetsecama m'a, ca aptaqjacjo lhta njan ma'a.
23
Netamen ma'a, lhta aptac Jesus apquellano apqueltamesaicamoc:
— Jawe ngiapac anquec, nientelhec anquec enenlhet nquescama nac apquetsecama eiecac ewomoc etnec Engiapom Neten apnemolhema.
24
Stacjec mocjom alheianma colhawe nac, nientelhec eiecac etanlheng noseianeng queitsec la malanwa'ac
, coca nientelhec tep anquec enenlhet nquescama nac apquetsecama eiecac ewomoc etnec Engiapom Neten apnemolhema—lhta aptac Jesus.
25
Nquelpelapcasque lhta apquellengai'a apqueltamesaicamoc ma'a, ca apquelmalengiosecpo lhta moc apancawec ma'a, lhta aptancoc:
—Mancapuanque nac quelha ewoncasacpo tep enenlhet la'a —lhta aptancoc.
26
Apquellan'awe lhta Jesus apqueltamesaicamoc ma'a, lhta ptac apquellanemo:
—Mancollapuanquec enenlhet etnancoc apancawec ma'a, Engiapom Neten coca apuanque ellanac lhamacjo caselha—lhta aptac.
27
Coca lhta ptac Pedro:
—Nelhacje lhta ennenco'o lhamacjo caselha enganco'oc, ca nelieplawenca lheiap ¿Secja ta aquiaqmecja angetlhewancoc ennenco'o m'a ie, je?—lhta aptac
28
Ca apcatemmonca lhta mocjom Jesus ma'a, lhta aptac:
—Jawe ngiapac anque', jata acuacmo ta acnem Engiapom Neten eliaqmoncasecjac alhnanco'oc lhamacjo caselha acnaicamoc anac jenque'e nalhepop, aptacjo ta apuesque m'a Enenlhet Apquetca nac aquieplomo apmopuana, quetlhencap jata njan apquellelto nac jelieplecama etnancoc jata apquelemjama apmania ie' tacjaplhet'oc 12 nac acnema apquennemolhema co Israel, elpeiwesecjac jata njan apqueltemacja moclhem'a m'a.
29
Lhamacjo njan apquellelto nac apqueliengiecja apcacjaiancolha, apquelialheng'a, nqueluana'ac najan, ncana'ac, apquetcac cacpota njan lhepop apanco'oc aniem'o jelieplecama co'o, 100 actaiecjo ta ncotnec apquetlhewai'a mocjom tep, cacpota njan ncoitec mancotnenwaianlha nnelha aquiennactema apnengio'oc.
30
Coca enenlhet'awoc apquellelto apmaniaie, alhaiec anquec jata etnocjac ma'a. Coca apquellelto nac alhaiec anquec, jatoca etnocjac apmaniaie' m'a—lhta ptac Jesus apquellano apqueltamesaicamoc.