Capítulo 18
Enenlhet apto la neten apanquec anquec apiaspommap
1
Ca apquelelmalhnenca lhta apqueltamesaicamoc Jesus ma'a, lhta aptancoc:
—¿Se lha enenlhet apto neten apanquec apiaspommap apiesecsec Engiapom Neten apquennemolhema, je ?— lhta aptancoc
2
Ca apcawenca lhta lhema nematca Jesus ma'a, apneso lhta njan apiesecsec ma'a,
3
lhta aptac apquellano:
—Jawe ngiapac anque', apquenmac'o la etnancoc Engiapom Neten apquennemolhema quetlhencap, ncaimelhquec etnancocjac malha aptonac jenque'e nematca nac.
4
Ncaimelhquec na etnancoc coneng apancawe mota ca aptonac jenque'e nematca nac cacpota etnancoc neten apancawec apqueliaspommap ma'a apiesecsec Engiapom Neten apquennemolhema.
5
Apquenmec jata nquec tacja quetlhencap lhema nematca la'a ca aptonac jenque'e, jenmec na tacja co'o,
6
coca enenlhet apto la apiatecamoc ncolanac caselha ncolatsecama nematca la'a manjeiasqueiam, ncaimelhquec antetec apiaspoc metaimong aquiawai'a aquiaquiema cacpota angiengiecjac aisecsec iemmen aluata conne canque.
7
¡Aaaa, mantec anquec caselha ncollatsecama anmama enenlhet cacpota ellanancoc ncollatsecama! Ncowac jatoca mota m'a. ¡Coca enenlhet jata la ie apto apiatecamoc po'oc cacpota eltoc elanac caselha ncolatsecama m'a!
8
Ca apmec anac lheiap nlhoca la njan apmenec actemescaso la alanesquescama ncolatsecama, ntase niecje eliaqtemenec cacpota eliengioc mocjec anque'. Ntasec ncoitec aquiennactema apnengiec ncotnenwaianlhan nnelha apensema, mancolhnoc ma'a ncolhec aquiengiewo apiocjo panque aquieto mancospaneiacja talha.
9
Ca apaqtec anac lheiap actemesqueso la ncolatsecama apquelanai'a, elec jata eiengioc mocjec anque! Ntasec ncoitec aquiennactema apnengiec ncotnenwaianlha nnelha lhema apaqtec la'a, mancolhnoc ma'a ncolhec aquiengiewo apiocjo panque aquieto mancospaneiacja talha.
10
11
Meleltacnewa nquec nematca'ac anac, ncanec apqueleltacmelquescama mota Enenlhet Neten aquieto m'a napaqtec Tata apno m'a neten—
Nema aquietquescama nepquesec
12
—Apno la enenlhet 100 apnaqtoscama nepquesec, aplhenacmo la lhema ¿Co la ta etnec apuetep anac ma'a? Eliengiecjac jata secje 99 nepquesec cacpota ectemoc colhuawec anque aplheneiam lhec lhema.
13
Ca apuetacjo la m'a, neten anquec jata ncotnec acpaijecja apualhoc ma'a, aselhtec ma'a 99 lhquec metca apquetlheneiam.
14
Nnawec na m'a Apqueliapom quetlhencap apno m'a neten meltemoc elhnanmoc lhema nematcac anac—
Nentemacja nenmecjo tacja mocjom emmo'oc
15
— Apquelanescaso la caselha ncolatsecama apialheng lheiap, elpaqmetquesacpo ta apancawec lheiap cacpota eijanwesquescacjoc ma'a. Ca apianwacjo la'a, ellamelacpoc jata mocjom.
16
Man jata nquec eijanwacjoc ma'a, engiacja ta m'a eliama lhema nlhocala apcanet enenlhet cacpota eluetancoc ma'a actema la iocjalhmec anquec ma'a.
17
Man jata nquec engiasecja'ac mocjom, eltennanwacja ta napaqtawec apquennemolhema m'a. Man jata nque engiasecja'ac mocjom ma'a, etnesquesacpoc jata malha enenlhet meijamolhma, malha njan apquenmama pataccom impuesto Roma ancoc.
18
Jawe ngiapac anquec, ca apnaqteto la tama quetlhencap caselha jenque'e nalhepop anac, ncolhec jata njan acteto tama m'a neten, coca apqueljatsoscaso la quetlhencap tama jenque'e nalhepop anac, ncolhec jata njan acleccaso tama m'a neten
.
19
Apcanet la apiesecsec anac quetlhencap acnemo mo'oc coca apualho'oc cacpota elelmalhnama caselha Tata apno m'a neten, ellancoc jata m'a.
20
Apcacnacjec jata nquec apcanet nlhoca la apcanetolhem'a acnemo mo'oc apualho'oc eltacnescasancoc co asuesai'a, alhec jata njan apiesecsec ma'a—lhta ptac Jesus apquellano.
21
Ca aptetescacmo lhta Pedro apnacja Jesus ma'a, lhta aptac apcano:
—Apuesque ¿Selha nnelha atnec ascasecjecjo apto la jelanesquescama caselha ncolatsecama, wanlha nlho 7 nnelha m'a, je?—lhta aptac
22
—Mma', mancowacmoc ma'a 7 nac, metca nnelha ta etnec apcasecjecjo po'oc
—lhta aptac Jesus
Apietquescama Jesus nema asennaicama meniasecjecjo po'oc
23
24
—Engiapom Neten apto malha apiau'acja apuesque apquelanecjec nac waccajac apqueliaqmoicamoc pataccom apancoc apquenmacmesaicama, cnemo lhnac na aquiantemecjo lhema apmacmesaicama nquescama nquec apqueliaqmoma pataccom
apancoc ma'a.
25
Mamma lhnoca patacom apancoc cacpota eltaqjesoc ma'a. Coca apiau'acja apuesque lhnac ma'a apqueltemo lhna ncolhec aquiengiawo enenlhet anac, aquieplomo aptawa, apquetcac, cacpota njan lhamacjo caselha apanco'oc aquianmoma apqueliaqmoma, cacpota ncotjaniacjac apqueliaqmoma m'a.
26
Coca apmacmesaicama lhnac ma'a apquelteclhecuai'o lhnac aptapno'oc napaqtec apiau'acja apuesque apancoc, apcapiosemmacpec nac ma'a, lhna aptemac:
"Asqueltawec co'o mocjom elailhec mo'oc acnem, anwancocjac jata lhamacjo patacom apancoc" lhna aptemac.
27
Apietnai'awec nac napa'at apiau'acja apuesque m'a, lhna aptemac apcanemo:
"Motnama nque apualhoc, anwasecjecjoc jata lheiap, asmasquesacjec na jeliaqmoma, etaqjecja ta" lhna aptemac ma'a.
28
Ca aptaqjecjo lhnac apmacmesaicama m'a, aptaniei'o lhnac na aplhelhma apanque, apqueliaqmoma quetsec patacom, apatjetmo lhnac ma'a apiaqjapmo apiaspoc apmajai'a engiaqje' niecje, lhna aptemac apcanemo:
"¡Jeiancocja ta jeliaqmoma lhta colhuawe nac!" lhna aptemac.
29
Ca apquelteclheclhemo lhnac na aptapno'oc napaqtec aplhelhma m'a, apcapiosemmacpo, lhna aptemac:
"Asqueltawec co'o mocjom elailhec mo'oc acnem, anwancocjac jata lhamacjo patacom apancoc" lhna aptemac.
30
Coca mang nac ncomajai'ac elailhec ma'a, apqueltemo lhnac ncolhec actalhneso nemmammalhquelha acuacmo apiaqmoncasacjo apqueliaqmoma.
31
Apquellengai'ac nac na ania'a aplhamacja apquetlhelhma'ac ma'a, annatjescamo lhnac, apquelleltennasquecjo lhnac apiau'acja apuesque apanco'oc.
32
Netamen apuesque m'a apqueltemo lhnac ncolhec aquiantenwacjo apmacmesaicama lhnac meijamolhma, lhna aptemac apcanemo:
"Meijolhma nac lheiap, asmasquesacje lhta niecje lheiap apqueliaqmoma ncanec apcapiosecpe lhta apqueltemo anwasecjecjo,
33
ntasec lhec na etnec lheiap eietnajoc lhec na napa'at po'oc, ca astacja lhta asquelan'o lheiap" lhna aptemac.
34
Aplonquec na apiau'acja apuesque, apqueltemo lhnac ncolhec actalhneso nemmammalhquelha acuacmo aptaniacjo lhamacjo apqueliaqmoma lhta— lhta aptac Jesus apietquescama m'a
35
Lhta aptac mocjom Jesus apquellano apqueltamesaicamoc: —Ncolhoc jata njan quetlhencap ma'a co'o Tata apno m'a neten mellasecjacjo la po'oc jawe ngiapac anque—lhta aptac Jesus ma'a.