Capítulo 24
Aplheianma Jesus ncotuasalhcac jata Engiapom Neten apnemacja
1
Aptepque lhta Jesus Engiapom Neten apnemacja m'a, ca apquelpaqmetcaso Inta apqueltamesaicamoc necsa apquetlhengama m'a actemacja Engiapom Neten apnemacja
2
Lhta aptac Jesus apcatemmonca m'a:
—Ncotuasalhca toca jam, metca nenwetai'a ta ncotnec necja atco'oc ma'a, jawe ngiapac anquec astacja nac—lhta aptac ma'a
3
Ca apquenmeiacjo lhta aquieto lhienep acjaiam Olivos, apne lhta Jesus ma'a, ca apquelelmalhnenca lhta apqueltamesaicamoc, lhta ptancoc:
—¿Se lha acnem ncotnec ma ie'? ¿Se lha caselha ncowac amanie ewatamoc mocjom lheiap? ¿Se lha caselha ncowac amanie ncotnec nnelha acnem jalhma nquec jam, je?—lhta aptancoc
4
5
Ca apquellatemmonca lhta Jesus, lhta aptac:
—Eluac jata apentalhnema enenlhet'awoc, elleltacpoc jata apancawec na Cristo, eliennencasancoc jata aplhamacjo enenlhet'awoc. Coca ellajo ta quetlhencap ma'a cacpota meliennenqueseje'.
6
Ellengac jata quetlhencap apquennapommap lhamacjo aiempec jalhmanquec jam, coca mellaga nquec quetlhencap ma'a, ncotnec jata m'a, coca mancowacmoc mocjom actacja nnelha acnem jalhmanquec jam.
7
Lhema apquellawacja ennapacpoc jata mo'oc apquellawacja, mancolhec jata aptecamoc enenlhet, ncoieujama ta njan lhepop lhamacjo apquellawacja.
8
Ampacjasecja toca ncotnec ma'a apquellengaianco aquientalhnema enenlhet lhma nquec jam.
9
Ncolhec jata allanconwacmo quetlhencap ma'a cacpota ncolhec altecponca apiempeioc, elleltacnewacpoc jata njan, cacpota ncolhec annapacjo aniem'o asqueltamesaicamoc quetlhencap.
10
Aplhaniec jata etnancoc jeliengiecja aptaicamoc jelieplecama, eselhnanecjac jata po'oc apanque', cacpota njan eltacnonwacjac jata njan po'oc.
11
Eluac jata njan apentalhnema apquetsecama ania'a apquenmopuanca ania'a, eliennenquesec jata apentalhnema enenlhet'awoc ma'a.
12
Ncomascoc jata njan apquellamelammap aniem'o neten anquec meliamolhma.
13
Coca ncolhec jata aluoncaso tep apquellelto nac meliasqueiam acuacmo ta actacja nnelha acnem.
14
Ncopaiesalhcac jata ania'a actacmanma actemacja apuesque Engiapom Neten alhma nquec jam cacpota elleng'ac aplhamacjo enenlhet'awoc, netamen ma'a ncowac jata actacja nnelha acnem.
15
16
¡Eltacmelcaso ta apquellailhemo, cacpota elianwomjo'! Aplheianmo lhnac nanec secama
ania'a Daniel, lhema acnem jata ncolhec actalhnescacmo caselha ncolatsecama nquec conne Engiapom Neten apnemacja, conne' acmeiommalhquelha nac, lhnac nacec aptemac Daniel ma'a. Apqueluet'ac jata nque' quetlhencap ma'a, ¡engiengiamoc jata! Apcacjanco la aquieto iocjalhma Judea, engiengiamoc jata enmancoc aquieto aquiau'acja nalhma' acjaiam lhepop.
17
Apcacjanco la tacjalhet apcacjaianquelha, ellentep jata m'a engiengiancoc ma'a, coca melentalhnenwacja nquec conne apcacjaiancolha apqueluecja la caselha apanco'oc.
18
Apquellawa la nalhma', meltaqjo nquec eluacjac apquelentalhnema.
19
¡Aiosac'ac jata nqueluana'ac nlosawe nac cacpota njan secja apalleiam atcac!
20
Elelmalhnama ta Engiapom Neten cacpota mancoietec ma'a ieiam apualhoc anac, nlhoca la acnem nennecjelha nac necsa apquengiaicamoc apcacjenwanlha la'a,
21
ncanec awanjec jata ncotnec acmasca m'a, mang nac nanec eluetai'ac aquientalhnema nac lhennenga tep nac nanec ampaiosecja lhma nquec jam, mancotnanquec jata mocjom emmanie nac ma'a.
22
Coca eiacuatesoc jata Engiapom Neten aquientalhnema nac, ncanec apquellamelaiam apquellelto apqueliequiescama, melleltejec jata eletsepoc ma'a, coca meiacuateso la Engiapom Neten aquientalhnema nac, esaujacpoc jata enenlhet apqueletsepma.
23
¡Ellajo ta quetlhencap! Nnec jata nquec acto allano:
"¡Ellanjono, ca Cristo jenque'e! ¡Ellanjono, Cristo ja'e!"
Eliasquem jatoca m'a,
24
eluac jata njan apqueleltammap secama ania'a cacpota njan iama Cristo, ellanancoc jata njan caselha monwetai'o, caselha jempelapquescama njan, eliennenquesec jata enenlhet'awoc, quelha njan eliennenquesec ma'a apquellelto Engiapom Neten apqueliequiescama.
25
Asqueleltennasquec colhua amanie acuai'a ta m'a,
26
nnec jata nquec acto allano mocjom:
"Ellanjo no, Cristo nac lhec apua'ac ja'e aquieto nac metquelha temma"
Coca menmamonquec eliantenwomoc ma'a. Nnec jata nquec acto allano mocjom jenque'e: "Ellanjono jenque'e, ca apielhanmac Cristo jenque'e"
Coca apquenmopuanca'a ania'a m'a.
27
Lhamacjo enenlhet jata eluetac apuactamo ta Enenlhet Apquetca nac, malha apquelienmaiam jata ncotnec neten lhma nquec jam.
28
Ca apqueluet'o la'a quetlhencap apasmacja la mama', colhuawec anquec eliojoc caselha apac nietnac atsepma m'a.
29
Jata aquieco ta jeng lhamacjo aquientalhnema nac, ncomascoc jata aponmato acnem, ncomascoc jata njan apcapommato pelten, cacpota njan epallemmac iau'a, ncolieujama ta lhamacjo neten.
30
Netamen eluetac jata neten lhema caselha monwetai'o aptemacja ta Enenlhet Apquetca apquelhiaiam, eliapqalhec jata lhamacjo enenlhet'awoc alhma nquec jam aniem'o apquellai'a m'a, netamen eluetac jata apquelhiaiam Enenlhet Apquetca aisecsec iepjopai'a aquieplomo ta aquiawai'a nquec apmopuana cacpota njan apcapommatema aquiawai'a.
31
Ellapacsec jata Enenlhet Neten apquellennencasecama lhma nquec jam, elpaiwacsec jata trompeta cacpota engianquesecjac apquellelto apqueliequiescama apquelleniem'o alhma nquec jam.
32
Apquelliawec quetlhencap apqueluet'o la aicaja alhnancoc actengoc cacpota njan awa', ncanquetuacmec pelten acnem aliepuoiacja m'a.
33
Nnawec na m'a, apqueluet'o ta lhamacjo aquientalhnema astacja lhquec alheianma, colhuawec eliojoc ncanquetua'ac apuectanlha ta Enenlhet apquetca.
34
Ncowac jata nque'e amanie apqueletsepma enenlhet nenwanlha nac, jawe ngiapac anquec aspaioma nac.
35
Neten cacpota njan nalhepop ncomasquenwomoc jata, coca aspaioma mancomasquenwomec jata, ncoietnecjac jata mancowaiam annelha.
36
Mamma ncoijoc acnem, hora njan ncowac jata m'a lhamacjo actemacja aquientalhnema, meliejec na Enenlhet Neten, meijec na m'a Apquetca nac, wanlha Apiapom ma'a apiawe.
37
38
39
Ca apuactamo ta mocjom Enenlhet Apquetca nac, njeclhec jatoca ncotnec necsa aptaiancolha nac apqueliaijecama enenlhet'awoc lhma nquec jam, coca ncotlapquesec jata apuecta' m'a. Ca actemo lhnac nanec Noe, enenlhet coca njeclhec lhnac nanec necsa aptaianquelha apqueliaijecamaja, aptoianquec nac aptecamoc, apienaianque najan, nqueliemjapeianquec ma'a. Coca Noe aptalhnenquec nac conne loma nemmen aquiawai'a m'a, ca acpelapquescamo lhnac acuai'a acmomai'a aquiawai'a, man nac eliamoc enenlhet'awoc acmajai'acja ncotnejec, apsaujommacpawec nac apqueluaiwecamoc ma'a. Jata ncotnec na apuactamo ta Enenlhet Apquetca nac, acpelapquescama nquec jata ncotnec ma'a.
40
Ca acnem acuo'o ta m'a, elloca ta apcanet enenlhet apquenmacmecama nalhma, lhema ta ncolhec aquiantemacjo, po'oc jata elhnecjac ma'a.
41
Janet jata njan nqueluana'ac ncolteclhencoc actec nteclheclhema ancoc, lhema ta ncolhec aquiantemacjo, mo'oc coca ncolhnecjac jata m'a.
42
Eleljalhnama ta mota, meliejec quetlhencap se lha acnem apuectanlha ta apuesque apanco'oc.
43
Jawe ngiapac anquec, apto apnemacja apiojo la selha hora ewa pelhasep apmenielhma, eljalhnama m'a cacpota mengianquejec etalhnenwomoc apnemacja emenielhec.
44
Nnawec na quetlhencap, elpeneso ta apquelleljalhnecama, ncanec ncotlapquesec jata apuecta' m'a Enenlhet Apquetca nac.
Nema annencasecama apiamolhma cacpota njan meijamolhma
45
Ntase etnancoc ma'a malha nema annencasecama apiamo apanque nac aptemacja la apecquencasecja apaioma apuesque apancoc eltacmelquesquesec apnemolhema', cacpota njan apquellaicamoc na actecamoc apquetcac apuesque apancoc, cacpota elhong ma'a.
46
47
Ca apuactamo la m'a apuesque apancoc, etanwetac jata actacmanma apmacmecama, etnescasecjac jata apquemjama apmanie lhamacjo apquetsecama apanco'oc anac ma'a, ncopaijecjac jata apualhoc nema annencasecama nac.
48
Coca nema annencasecama la meijamolhma, ncolhenec jata apualhoc alhaiec quelha ewatac apuesque apancoc.
49
Netamen eltecpoma apiempeioc aptemo lhemec nema anmacmesaicama m'a, cacpota elhong ma'a elpalhacuomoc na enenlhet meliamolhma m'a, anmen ato'oc cacpota njan mellescama aptaweicocja aptecamoc ma'a.
50
Coca ncotlapquesec jata ewata apuesque apancoc ma'a,
51
eiaqmoncasecjac jata aptemacja meijamolhma m'a, malha acto nac nema aquiaqmoncasecjac aptemacja meijamolhma apiennenquescama apuesque apancoc. Ewenec jata m'a, ncopelhcama ta apiempec na m'a aniem'o apcai'a—lhta aptac Jesus apquetlhecmoso m'a.