Capítulo 4
1
Aplengaianque lhta njan Cristo necsa apcaniemjaicama jenque'e nalhepop anac, ntasec na enmancoc tacja quetlhencap ma'a acuo'o la apquellengaianco aquientalhnema. Enenlhet apto la apmopuana ewascapoc necsa acuai'a la aquientalhnema, apmopuana njan etnescasentac coneng maniamolhma nac
2
cacpota njan aquiasponcomacja la apualhoc, apuanquec na elana mota caselha acleclemelha la apualhoc Engiapom Neten.
3
Nwenactenque lhta acnem apquellanecamoc caselha ncollatsecama quetlhencap, apqueltemenwecjo lhma, ncollatsecama mota apquenmajai'acja etnancoc, mellescama etawancoc aptecamoc, anmen alieiescama lhma, cacpota njan apqueltacnescasecamoc caselha aquiocja apquellanecamoc. Npelhcasquec apiempec Engiapom Neten caselha ncollatsecama nac ma'a, ca melleliejecjo nac Engiapom Neten aptaianquec actonac ma'a,
4
quetlhencap coca mmasquec apquelpasenwacmo m'a necsa apcaqnaicama la m'a apquellanecamoc anac ncollatsecama metca apquenmanweianlha, ca ncanec enenlhet anac meliamolhma elquenatquesec quetlhencap canjan eluannamaja aniem'o melpasmacjac colhuawe nac quetlhencap ma'a.
5
Coca netamen jata ma'a enenlhet'awoc meliamolhma nac ncollietoc jata apquetlheianwecja caselha apquellanecamoc napaqtec jengiecpelquemo ngiapom, eliecpecoc jata njan apquellelto apjalhnanco'oc canjan apquelletsepma.
6
Ca apquelletsepma nac nnenque lhta njan aleltennascamo ania'a actacmanma necsa lhta apquellaniemjaicama jenque'e nalhepop anac, nietne mota apquelletsepma aniem'o enenlhet apancawe
nac, coca netamen apquelletsema nquelloca mota apqueljango'oc aniem'o Engiapom Neten.
Actacmanma nempasmoma emmo'oc
7
Quetsec ncaimelhcac actemonwanlha nnelha acnem lhmanquec jam ca ncanec quetlhencap ntasec etnanco mota apqueltacmelcasemmacpo apancawec, elelmalhnancoc najan metca nnelha.
8
Ellamelacpo ta mota njan apiesecsec anac quetlhencap, enenlhet apto la m'a apcamelecjo po'oc, apmacjec na mocjom tacja niecje nquescama la aptewascama m'a.
9
Engiaqjes jata njan aquiacuatacjo apcacjaiancolha apiesecsec anac quetlhencap amaica apancoc la'a metca njan aptepquesaicama apuesai'a m'a.
10
Apquellanquec Engiapom Neten nenmopuana nac angellanjo caselha quetlhencap, enmama njan cacpota ncoltacmelquesquesec apquellaniemjaicama po'oc la'a.
11
Aquietno la nenmopuana nac angeliatama, ntasec etnec ma'a actemacja apianweiacmo aniem'o Engiapom Neten apaioma. Aquietno la njan nenmopuana nac jengasennama emmo'oc, etne ta njan ma'a, emama ta apiennactema apcaicamoc aniem'o Engiapom Neten, netamen jata m'a eltacnescasancoc enenlhet'awoc apuesai'a Engiapom Neten canjan aquieplomo apuesai'a Jesucristo apto acnema apmopuana, nietawec na etlhenec apiepjonweiacmo mancotnenwaiam annelha. Amen.
Actemacja nellengaianco aquientalhnema
12
Quetlhencap elialheng'a asquellamelaiam, mopallemmanquec apualho'oc apqueluet'o la aliepconma malha actonac talha la'a, mellananquec na mancoujec jata m'a.
13
Colpaijecja toca mota apualho'oc apqueluet'o la apquellengaianco, ca actemo lhta njan Cristo m'a, netamen ncolpaijecjac jata njan apualho'oc apquelhiacmo ta m'a aquieplomo aquiawai'a apientalhnemo.
14
Apqueltacnewacpo la njan aniem'o apquelleliejecjo Cristo, ntasec coca njan ncolpaijecjanquec apualho'oc ma'a ncanec Engiapom
Neten Apualhoc nquelloca mota lhemec quetlhencap ma'a.
15
Moclhem'a enenlhet apquellenganquec aquientalhnema aniem'o aptaicamoc ntequioma ngiapma'ac, apquenmengielhma, meliamolhma cacpota njan apquellapsonquescaiam apcacjaicamoc la po'oc, alietemo njan apquenmancanweiam ma'a.
16
Coca menmancanquec quetlhencap aniem'o la nema atlhencasecama aptaicamoc Jesucristo apquennemolhema, nema la njan aliematquesaicamaja, eltacnescasamoc jatoca Engiapom Neten quetlhencap ma'a.
17
Nwa'ac acnem Nengiecpelcammalhquelha, ennenco'o nengellelto nac Jesucristo apquennemolhema nwa'ac emaniaie' nellengaianco aquientalhnema ¡Neten anquec jatoca nja ncotnec apquellengaianco m'a apquellelto nac melleliejecjo' ania'a actacmanma aniem'o Engiapom Neten!
18
Ncotlhencasama ta njan meluoncasacpec tep apquellelto nac apquelpeiwomo ¡Awanjec anquec jatoca nja ncotnec apquellengaianco apquellelto nac meliamolhma, canjan apquellanecamo nac ncollatsecama!
19
Ca apquelto la etac aquientalhnema lheiap Engiapom Neten, ntasec na elhenquesec apquelanai'a caselha altacmelo lheiap m'a, ntasec na enquesec apualhoc ma'a ncanec apto lhta njan apquelanai'a lheiap ma'a, mancapuanquec na eiennenquesec ma'a.