Capítulo 3
Nenganemmalhquelha antancoc nema ennaqteianca'a
1
Quetlhenca' nqueluana'ac coleliejecjo ta mota anaqteianca'a. Apno la atawa' metno Jesucristo apnemolhema coliejecjo ta njan ma'a cacpota etnenwomoc na Jesucristo apnemolhema aniem'o apuetai'a actacmelcasemmalhco aptawa', mancaimelhcac aquiatecamoc la engialhoc ania'a actacmanma,
2
wanlha coca apuetai'a aptawa' actacmelcasemmalhco nque, ai'o njan Engiapom Neten.
3
Nqueluana la actengia'ia mota alalhnasemmalhco nquescama njan alalhnascama awa' neten anquec aquiaspecamoc, annatanma njan oro cacpota njan alentalhenma acmennawe nac.
4
Coca nleccawec apualhoc Engiapom Neten ma'a quetlhenca' malha alalhnascama au'alho'oc anac ncanec mancomasquenwomec actacmanma m'a, acto njan nalhepec au'alho'oc canjan altacmelquescamo au'alho'oc.
5
Lhnac nane na ntaiancoc nqueluana'ac aliamolhma, malha alalhnascama au'alho'oc mancoliasqueiacmo Engiapom Neten canja alleliejecjo mota anaqteianca'a.
6
Ca actemo lhnac nanec Sara aliejeco mota Abraham, altaianca njan apuesai'a apuesque ncoc aniem'o ai'o. Ncowac jata acnem quetlhenca' malha actaicamoc Sara allanenco la caselha altacmelo, mancoitec jata njan allai'acja la'a
njan ma'a.
7
Quetlhencap apquellennawa'ac, eltacmelcaso ta mota apquellanei'o apnaqteianca'a, meliennajo njan ncanec nalhep'awec au'alho'oc ma'a, ncotlhewancoc jata lhemec quetlhencap caselha metca aquianmoma acuesai'a nenganiemjaicama ta m'a. Ca apqueltacmelcaso la apquellanei'o quetlhencap ma'a, engialhoc jata njan Engiapom Neten apquelelmalhno la quetlhencap ma'a.
Apquellanemmacpelha etnancoc Jesucristo apquennemolhema
8
Mellasquesap anquec ame' apiesecsec anac quetlhencap, elhneso ta mota njan atlhenaicama apualho'oc po'oc la'a, ellamelap malha apquelialheng'a apancawec la'a, etnamoc jata njan apqueliamolhma canjan nalhep'awec apualho'oc.
9
Meliaqmoncasecja nquec apnaqtewaso la po'oc, meliaqmoncasecjanquec na apiamenwo la po'oc, ntasec coca ellancoc actacmanma apaioma m'a ncanec Engiapom Neten jata eltacmelquesquesec apquellaniemjaicama quetlhencap.
10
Ca ctemo nac na actalhesammalhca waccajac Engiapom Neten apaioma jenque'e:
«Enenlhet apquelto la engiangiemjama actacmanma, acpaijecja apualho'oc, ncaimelhquec meliatama ncolatsecama canjan metnec apmopuana ania'a.
11
Eiengiecjac na caselha ncolatsecama, elanac na caselha altacmelo, etengia mota njan metca acmasca.
12
Ncanec aptacmelcasquec Engiapom Neten apquelleto la apquelpeiwomo, engialhoc na apquelelmalhno la'a, coca apqueliengacjac ma'a meliamolhma nac».
13
Coca apquellanenco la mota quetlhencap caselha altacmelo, netamen mamma enenlhet ellanesquescac na caselha ncolatsecama m'a,
14
coca apqueluet'o la aquientalhnema necsa apquellanecamoc acpeiwomo, Engiapom Neten jata eltacmelquesquesec apquellaniemjaicama m'a. Mellaga nquec enenlhet, mennelhtenganquec na neten,
15
16
ellajo toca Cristo apto apuesque apanco'oc, elpeneso ta mota ancoc apquellatemmoicama la'a metca apqueliennai'o canjan nalhep'awec apualho'oc actemacja aquietnema aleljalhnecama apualho'oc Engiapom Neten. Eltacmelcasacpo ta njan cacpota ncotacmelcasoc na aquietnaicama apaqto'oc anac, cacpota njan enmancanwomoc ma'a apquellelto la apquellentepquescama apquelluesai'a acjemo m'a, apquetlheianma njan meliamolhma Jesucristo apquennemolhema quetlhencap ma'a.
17
Ca apquelto la Engiapom Neten ntase niecje m'a eluetac aquientalhnema aniem'o apquellanecamoc caselha altacmelo, jawe aniem'o apquellanecamoc caselha ncollatsecama.
18
Ca ctemo lhta njan Cristo aplengaianco aniem'o ennenco'o mangeliamolhma, apmesemmacpo lhta apanquec ma'a lhema actema njan ma'a, mancaimelhcac mocjom engietsepoc ma'a. Mamma lhta niecje njan aptemenweiacmo la lhma Cristo, coca aplengaianque lhta m'a aniem'o jengelpasmoma nengellelto nac mangeliamolhma, apmajai'a njan jenlaqlacjac napaqtec Engiapom Neten ma'a, apquetsepme lhta njan aptemo nac enenlhet engietsepoc jenque'e, coca netamen nnenque lhta aclhatecjasqueiacmo m'a, ca aniemjaianca lhta njan apiempejec ma'a.
19
Acmeiecjo lhta njan aclheianwecjo aquiepjonweiam aisecsec ma'a enjangoc aclhatmommalhca
20
aniem'o lhnac na nec mancolleliejecjoc Engiapom Neten ma'a, necsa aploma lhnac nanec Noe. Mepecjescamo lhnac nanec na Engiapom Neten epenacsec loma nemmen aquiawai'a m'a Noe, apqueluaiacmo lhnac nanec na tep 8 enenlhet apqueluaiwecamoc niecje.
21
Ca iemmen lhnac nanec ma'a aquietquesammalhca nellauquesammalhca conne iemmen anac cacpota njan ewoncasacpoc tep enenlhet. Ca nenlauquesammalhca nac conne iemmen jawe alhnascama engiempejec, wanlha coca acto malha alhnascama alquetamecama enwalhoc napaqtec Engiapom Neten, coca njan nenwoncasemmalhca nac tep aniem'o m'a nema aclhatecjasqueiam alhta Cristo,
22
apmeiecjo lhta neten, apnecjo aquiennacja apoctong Engiapom Neten, aptemenwecjo njan apuesque apiesecsec enenlhet neten canjan enjangoc acnema anmowanca'a, alientalhnemo njan ma'a.