Capítulo 5
Actemacja apquellanemmacpelha etnancoc metno apquetco'oc
1
Colhua asmac'ac aleltennacsec metno apquetco'oc anac apquetlhenquesquescama nac apiesecsec anac quetlhencap, co'o njan asto motno apquetcoc, asuetaianco lhta njan aplengaianco Cristo, alhcac jata njan caselha altacmelo acmo'o ta ncowac emanie nac.
2
Asmac'ac allancoc lhema aspaioma, eltacmelques jata enenlhet'awoc apqueltemo lhta Engiapom Neten ellanamaja, malha la nepquesec ma'a. Eltacmelques jata njan anmajai'o nquec apualho'oc, jawe m'a cno la aliatenco ellanjoc caselha, jawe njan acno la aquianmoma pataccom, etnamoc coca alleclemo nquec apualho'oc.
3
Metnamonquec na ellanjoc aptemacja nac apuesque apquellaicamo nac aquientalhnema apquenmacmecama enenlhet, eluetasquesacpo ta njan apancawec aptaicamoc apqueltacmelcasemmacpo napaqtawec ma'a.
4
Netamen etlhewancoc jata aquianmoma malha actonac ma'a ncacquen awa' nac netsoma
actacmanma nocie', metca actepelcammalhca njan ma'a apuactamo
ta apuesque apanco'oc apquellanecama nepquesec.
Actemacja apquellanemmacpelha etnancoc apquetco'oc
5
Quetlhencap apquetco'oc elleliejecjo ta metno apquetco'oc anac, etnamoc jata njan nalhep'awec apualho'oc apiesecsec anac jam, ca actemo nac na actalhesammalhca waccajac Engiapom Neten apaioma jenque'e:
«Apquellammelhquec Engiapom Neten enenlhet'awoc anac apquellammacpojo', apqueltacmelcascasquec coca apquellaniemjaicama apquellelto nac nalhep'awec apualho'oc»
6
Etnamoc nalhep'awec, enmamoc na tacja etnancoc apuesque apanco'oc Engiapom Neten acnema apmopuana, netamen jata njan ma'a neten apancawec eltemascasecjac na m'a.
7
Moltamanquec na apualho'oc ncanec apenesawe mota Engiapom Neten apquenmajai'a elpasmoc.
8
Amanie la apquenmajai'a ellanancoc caselhaja, ncaimelhquec ncolquetmoc apualho'oc secje, elquetnamoc jata njan ncanec mancotno emmo'oc queliacjamei'o nloca motaja malha actonac quemjawa' la'a apielhaiwecamaja aptengia'ia mota apmac'acja la etuoc.
9
Elammelh jata njan aquieplomo aquiennactema meliasqueiam ma'a, ca aliepconma nac quetlhencap nnawec na apqueluetai'a m'a apquelialheng'a aplhamacjo lhmanquec jam.
10
Coca apqueluascapo la aquiacuatacjo nquec apquellengaianco aquientalhnema, eltemesquesec jata njan apquelpeiwomo Engiapom neten ma'a, eliennactecsep jata njan, eltengiasquesec jata njan apiempeioc, ellancoc jata njan apquelianweiacmo actemacja apqueluetai'a. Jai, etnec jata Engiapom Neten ma'a ncanec awanjec apquellamelaiam quetlhencap ma'a, apqueliequiesquec na cacpota elpasenwomoc actacmelacja nquec ncotnenwaiam annelha apquelpasmecja Jesucristo.
11
¡Ntasec jata etnec apuesque Engiapom Neten mancotnenwaiam annelha aquieplomo apmopuana! Amen.
12
Jai, aquiacuatema nquec waccajac anac astalhescama aniem'o njan jepasmoma astema emo'oc nengaqtec eialheng Silvano, astalhesquec waccajac anac asquellanemacja etnancoc, cacpota eluetasquesec caselha altacmelo alleniem'o Engiapon Neten aquiawai'a apquellamelaiam quetlhencap ma'a, etlhenques jata njan alpaijecja nac apualho'oc aniem'o apquellamelaiam ma'a.
13
Nquetlhenquec apquellualho'oc Jesucristo apquennemolhema jenque'e Babilonia quetlhencap jam, apquellelto njan apqueliequiescama Engiapom Neten, nlhenquec na apualhoc eietca Marcos.
14
Ntasec etnanco mota apquelpaiwesammap aquieplomo apetsesma apmalhempenec aniem'o njan apquellamelammacpo jam, asqueltawec na etnancoc metca acmasca apquelleto nac apquelpasmecja Cristo.